ਡੇਰਾ ਬੱਸੀ, 16 ਅਕਤੂਬਰ (ਪੋਸਟ ਬਿਊਰੋ)- ਏਥੋਂ ਵੈਲਕਮ ਯੂਨੀਅਨ ਦੇ ਇੱਕ ਡਰਾਈਵਰ ਦੇ ਖ਼ਾਤੇ ਵਿੱਚੋਂ 21 ਹਜ਼ਾਰ 500 ਰੁਪਏ ਨਿਕਲਣ ਦੀ ਖਬਰ ਹੈ, ਜਦ ਕਿ ਉਸ ਨੇ ਕਿਸੇ ਨਾਲ ਕੋਈ ਕੋਡ ਵੀ ਸਾਂਝਾ ਨਹੀਂ ਸੀ ਕੀਤਾ। ਪੀੜਤ ਮਨਜੀਤ ਸਿੰਘ ਪੁੱਤਰ ਗਿਆਨ ਸਿੰਘ ਵਾਸੀ ਬਨੂੜ ਨੇ ਦੱਸਿਆ ਕਿ ਉਸ ਨੇ ਨਾ ਕਿਸੇ ਨਾਲ ਪਿੰਨ ਨੰਬਰ ਸਾਂਝਾ ਕੀਤਾ ਅਤੇ ਨਾ ਏ ਟੀ ਐਮ ਕਾਰਡ ਬਦਲਿਆ, ਏ ਟੀ ਐਮ ਕਾਰਡ ਵਿੱਚੋਂ ਫਿਰ ਵੀ ਖ਼ਾਤੇ ਵਿੱਚੋਂ ਪੈਸੇ ਨਿਕਲ ਗਏ ਹਨ। ਉਸ ਨੇ ਪੁਲਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ, ਜਿਸ ਦੀ ਜਾਂਚ ਚਲ ਰਹੀ ਹੈ।ਮਨਜੀਤ ਸਿੰਘ ਨੇ ਦੱਸਿਆ ਕਿ ਉਹ ਡੇਰਾ ਬੱਸੀ ਵੈਲਕਮ ਯੂਨੀਅਨ ਵਿੱਚ ਡਰਾਈਵਰ ਹੈ। ਬੀਤੀ 13 ਅਕਤੂਬਰ ਸ਼ਾਮ ਕਰੀਬ ਪੌਣੇ ਪੰਜ ਵਜੇ ਬੈਂਕ ਤੋਂ ਦੋ ਮੈਸੇਜ ਆਏ, ਜਿਸ ਵਿੱਚ ਪਹਿਲਾਂ ਇੱਕ ਹਜ਼ਾਰ ਅਤੇ ਫਿਰ 10 ਹਜ਼ਾਰ ਰੁਪਏ ਦੀ ਨਿਕਾਸੀ ਵਿਖਾਈ ਗਈ। ਉਸ ਨੇ ਬੈਂਕ ਜਾ ਕੇ ਆਪਣਾ ਖਾਤੇ ਦੀ ਜਾਂਚ ਕਰਵਾਈ ਤਾਂ ਪਤਾ ਲੱਗਾ ਕਿ ਉਸ ਦੇ ਬੈਂਕ ਵਿੱਚੋਂ 21,500 ਰੁਪਏ ਕੁਰੂਕਸ਼ੇਤਰ ਦੀ ਏ ਟੀ ਐਮ ਵਿੱਚੋਂ ਕੱਢੇ ਗਏ ਹਨ। ਉਨ੍ਹਾਂ ਦੱਸਿਆ ਕਿ ਬੈਂਕ ਦਾ ਏ ਟੀ ਐਮ ਉਸ ਕੋਲ ਮੌਜੂਦ ਹੈ। ਬੈਂਕ ਅਧਿਕਾਰੀਆਂ ਨੇੇ ਚੈਕ ਕੀਤਾ ਅਤੇ ਉਸ ਕੋਲ ਕਾਰਡ ਵੀ ਅਸਲੀ ਸੀ। ਉਨ੍ਹਾਂ ਇਸ ਦੀ ਸ਼ਿਕਾਇਤ ਬਨੂੜ ਦੇ ਬੈਂਕ ਦੀ ਸਾਖ਼ਾ ਅਤੇ ਬਨੂੜ ਪੁਲਸ ਨੂੰ ਦਰਜ ਕਰਵਾਈ, ਜਿਸ ਦੀ ਪੁਲਸ ਜਾਂਚ ਕਰ ਰਹੀ ਹੈ।ਬੈਂਕ ਦੇ ਸਹਾਇਕ ਮੈਨੇਜਰ ਨੇ ਦੱਸਿਆ ਕਿ ਸ਼ਿਕਾਇਤ ਮਿਲ ਗਈ ਹੈ ਅਤੇ ਮਾਮਲਾ ਏ ਟੀ ਐਮ ਕਲੋਨਿੰਗ ਦਾ ਹੋ ਸਕਦਾ ਹੈ। ਉਨ੍ਹਾਂ ਉਚ ਅਧਿਕਾਰੀਆਂ ਨੂੰ ਸੂਚਿਤ ਕਰ ਦਿੱਤਾ ਹੈ। ਪੈਸੇ ਕੁਰੂਕਸ਼ੇਤਰ ਗੀਤਾ ਨਿਕੇਤਨ ਨੇੜੇ ਏ ਟੀ ਐਮ ਵਿੱਚੋਂ ਨਿਕਲੇ ਹਨ, ਜਿਸ ਦੀ ਸੀ ਸੀ ਟੀ ਵੀ ਫ਼ੁਟੇਜ਼ ਵੇਖੀ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਅਜਿਹੇ ਕੇਸਾਂ ਵਿੱਚ 72 ਘੰਟੇ ਅੰਦਰ ਸ਼ਿਕਾਇਤ ਮਿਲ ਜਾਣ `ਤੇ ਜਾਂਚ ਅਸਾਨੀ ਨਾਲ ਹੋ ਜਾਂਦੀ ਹੈ।