ਬੀਜਿੰਗ, 15 ਅਕਤੂਬਰ (ਪੋਸਟ ਬਿਊਰੋ) : ਚੀਨ ਤੇ ਤਾਇਵਾਨ ਦਰਮਿਆਨ ਤਣਾਅ ਵਧਣ ਤੋਂ ਬਾਅਦ ਚੀਨ ਦੇ ਰਾਸ਼ਟਰਪਤੀ ਜੀ ਜਿਨਪਿੰਗ ਨੇ ਆਪਣੇ ਦੇਸ਼ ਦੀ ਸੈਨਾ ਨੂੰ ਜੰਗ ਦੀ ਤਿਆਰੀ ਕਰਨ ਦੇ ਹੁਕਮ ਦੇ ਦਿੱਤੇ ਹਨ| ਇਹ ਖੁਲਾਸਾ ਜ਼ਿਨਹੁਆ ਦੀ ਸਰਕਾਰੀ ਨਿਊਜ਼ ਏਜੰਸੀ ਦੀ ਰਿਪੋਰਟ ਵਿੱਚ ਕੀਤਾ ਗਿਆ|
ਜ਼ੀ ਨੇ ਇਹ ਟਿੱਪਣੀਆਂ ਗੁਆਂਗਡੌਂਗ ਪ੍ਰੋਵਿੰਸ ਵਿੱਚ ਫੌਜੀ ਟਿਕਾਣੇ ਉੱਤੇ ਮਰੀਨ ਫੌਜੀ ਟੁਕੜੀਆਂ ਦਾ ਨਰੀਖਣ ਕਰਨ ਸਮੇਂ ਕੀਤੀਆਂ| ਜ਼ੀ ਦੇ ਇਸ ਦੌਰੇ ਦਾ ਅਸਲ ਮਕਸਦ ਸ਼ੈਨਜ਼ੈਨ ਸਪੈਸ਼ਲ ਇਕਨੌਮਿਕ ਜ਼ੋਨ ਦੀ 40ਵੀਂ ਵਰ੍ਹੇਗੰਢ ਦੇ ਜਸ਼ਨ ਮਨਾਉਣਾ ਸੀ| ਪਰ ਇਹ ਟਿੱਪਣੀ ਉਸ ਸਮੇਂ ਆਈ ਹੈ ਜਦੋਂ ਚੀਨ ਦੇ ਸਬੰਧ ਕੈਨੇਡਾ ਤੇ ਅਮਰੀਕਾ ਤੋਂ ਇਲਾਵਾ ਹੋਰਨਾਂ ਦੇਸ਼ਾਂ ਨਾਲ ਵੀ ਕੋਈ ਬਹੁਤੇ ਸੁਖਾਵੇਂ ਨਹੀਂ ਹਨ|
ਇਸ ਮਹੀਨੇ ਦੇ ਅੰਤ ਵਿੱਚ ਰੌਇਲ ਕੈਨੇਡੀਅਨ ਨੇਵੀ ਦੇ ਬੇੜੇ ਜਾਪਾਨ ਵਿੱਚ ਸੈਲਫ ਡਿਫੈਂਸ ਫੋਰਸਿਜ਼ ਤੇ ਯੂਐਸ ਮਿਲਟਰੀ ਦੀਆਂ ਸਾਂਝੀਆਂ ਫੌਜੀ ਮਸ਼ਕਾਂ ਵਿੱਚ ਹਿੱਸਾ ਲੈਣਗੇ| ਚੀਨ ਦੇ ਰਾਸ਼ਟਰਪਤੀ ਲਈ ਹਾਲ ਦੀ ਘੜੀ ਚਿੰਤਾ ਦਾ ਵਿਸ਼ਾ ਤਾਇਵਾਨ ਹੈ| ਜ਼ਿਕਰਯੋਗ ਹੈ ਕਿ ਕਈ ਦਹਾਕਿਆਂ ਤੋਂ ਚੀਨ, ਤਾਇਵਾਨ ਉੱਤੇ ਆਪਣਾ ਦਾਅਵਾ ਕਰਦਾ ਰਿਹਾ ਹੈ| ਪਿਛਲੇ ਮਹੀਨਿਆਂ ਵਿੱਚ ਇਹ ਖੜੋਤ ਹੋਰ ਵੱਧ ਗਈ| ਚੀਨ ਦੇ ਲੜਾਕੂ ਜਹਾਜ਼ਾਂ ਤੇ ਨੇਵੀ ਦੇ ਬੇੜਿਆਂ ਨੂੰ ਤਾਇਵਾਨ ਦੇ ਇਲਾਕੇ ਵਿੱਚ ਜਾਂਦਿਆਂ ਵੇਖਿਆ ਗਿਆ ਹੈ|