ਸਮੱਗਰੀ-ਇੱਕ ਕੱਪ ਦਲੀਆ, ਅੱਧਾ ਕੱਪ ਦਹੀਂ, ਇੱਕ ਗਾਜਰ ਕੱਦੂਕਸ਼ ਕੀਤੀ ਹੋਈ, ਈਨੋ ਜਾਂ ਬੇਕਿੰਗ ਪਾਊਡਰ ਅੱਧਾ ਛੋਟਾ ਚਮਚ, ਪਾਣੀ 3/4 ਕੱਪ ਜਾਂ ਲੋੜ ਅਨੁਸਾਰ, ਨਮਕ 3/4 ਛੋਟਾ ਚਮਚ ਜਾਂ ਸਵਾਦ ਅਨੁਸਾਰ, ਹਰੀ ਧਨੀਆ ਇੱਕ ਵੱਡਾ ਚਮਚ ਬਰੀਕ ਕੱਟਿਆ ਹੋਇਆ।
ਤੜਕੇ ਲਈ-ਦੋ ਛੋਟੇ ਚਮਚ ਤੇਲ, ਰਾਈ ਇੱਕ ਛੋਟਾ ਚਮਚ, ਪੰਜ-ਛੇ ਕਾਜੂ, ਛੋਲਿਆਂ ਦੀ ਦਾਲ ਇੱਕ ਵੱਡਾ ਚਮਚ, ਕੜੀ ਪੱਤਾ, ਹਰੀ ਮਿਰਚ ਇੱਕ ਕੱਟੀ ਹੋਈ, ਇੱਕ ਛੋਟਾ ਚਮਚ ਅਦਰਕ ਕੱਦੂਕਸ ਕੀਤਾ ਹੋਇਆ।
ਵਿਧੀ-ਪੈਨ ਵਿੱਚ ਦਲੀਆ ਪਾ ਕੇ ਦੋ-ਤਿੰਨ ਮਿੰਟ ਤੱਕ ਭੰੁਨੋ। ਇਸ ਨੂੰ ਵੱਡੇ ਬਾਉਲ ਵਿੱਚ ਕਢ ਕੇ ਇੱਕ ਪਾਸੇ ਰੱਖੋ। ਕੜਾਹੀ ਵਿੱਚ ਤੇਲ ਗਰਮ ਕਰ ਕੇ ਰਾਈ ਤੜਕਾਓ। ਫਿਰ ਛੋਲਿਆ ਦੀ ਦਾਲ ਪਾ ਕੇ ਸੁਨਹਿਰੀ ਹੋਣ ਤੱਕ ਭੁੰਨੋ। ਕਾਜੂ ਪਾਓ ਤੇ ਹਲਕਾ ਭੂਰਾ ਹੋਣ ਤੱਕ ਭੁੰਨੋ। ਅਖੀਰ ਵਿੱਚ ਕੜੀ ਪੱਤੇ ਪਾ ਕੇ ਦੋ-ਚਾਰ ਸੈਕਿੰਡ ਭੁੰਨੋ। ਗੈਸ ਬੰਦ ਕਰ ਦਿਓ। ਇਹ ਤੜਕਾ ਦਲੀਏ ਵਾਲੇ ਬਾਉਲ ਵਿੱਚ ਪਾਓ। ਇਸੇ ਵਿੱਚ ਗਾਜਰ, ਹਰਾ ਧਨੀਆ ਤੇ ਨਮਕ ਪਾ ਕੇ ਚੰਗੀ ਤਰ੍ਹਾਂ ਮਿਲਾਓ। ਦਹੀਂ ਵੀ ਮਿਲਾਓ। ਥੋੜ੍ਹਾ-ਥੋੜ੍ਹਾ ਪਾਣੀ ਪਾਉਂਦੇ ਹੋਏ ਗਾੜ੍ਹਾ ਘੋਲ ਬਣਾਓ। ਮਿਸ਼ਰਣ ਨੂੰ ਦਸ ਮਿੰਟ ਢੱਕ ਕੇ ਰੱਖ ਦਿਓ। ਦਲੀਆ ਪਾਣੀ ਸੋਖਦਾ ਹੈ, ਇਸ ਲਈ ਦਸ ਮਿੰਟ ਬਾਅਦ ਫਿਰ ਲੋੜ ਅਨੁਸਾਰ ਪਾਣੀ ਮਿਲਾਓ। ਈਨੋ ਜਾਂ ਬੇਕਿੰਗ ਪਾਊਡਰ ਪਾ ਕੇ ਹੌਲੀ-ਹੌਲੀ ਮਿਲਾਓ। ਇਡਲੀ ਦੇ ਤਵੇ ਵਿੱਚ ਤੇਲ ਲਾ ਕੇ ਦਲੀਏ ਦਾ ਮਿਸ਼ਰਣ ਭਰੋ ਅਤੇ ਵੀਹ ਮਿੰਟ ਭਾਫ ਵਿੱਚ ਪਕਾਓ। ਦੋ ਮਿੰਟ ਦੇ ਲਈ ਠੰਢਾ ਹੋਣ ਦਿਓ ਅਤੇ ਫਿਰ ਹੌਲੀ ਜਿਹੇ ਕੱਢੋ। ਗਰਮ ਇਡਲੀ ਚਟਣੀ ਜਾਂ ਸੌਸ ਨਾਲ ਸਰਵ ਕਰੋ।