ਬ੍ਰਿਸਬੇਨ, 28 ਸਤੰਬਰ (ਪੋਸਟ ਬਿਊਰੋ)- ਆਸਟਰੇਲੀਆਈ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਏਲਿਸਾ ਹਿਲੀ ਨੇ ਬੀਤੇ ਦਿਨ ਅੰਤਰਰਾਸ਼ਟਰੀ ਟੀ-20 ਵਿੱਚ ਵਿਕਟ ਕੀਪਿੰਗ ਵਿੱਚ ਮਹਿੰਦਰ ਸਿੰਘ ਧੋਨੀ ਨੂੰ ਪਛਾੜ ਦਿੱਤਾ ਹੈ।
ਹਿਲੀ ਟੀ-20 ਵਿੱਚ ਸਭ ਤੋਂ ਜ਼ਿਆਦਾ ਸ਼ਿਕਾਰ ਫੜਨ ਦੇ ਮਾਮਲੇ ਵਿੱਚ ਧੋਨੀ ਤੋਂ ਅੱਗੇ ਨਿਕਲ ਗਈ ਹੈ ਤੇ ਉਹ ਪੁਰਸ਼ ਅਤੇ ਮਹਿਲਾ ਕ੍ਰਿਕਟ ਦੋਵਾਂ ਵਿੱਚ ਸਭ ਤੋਂ ਵੱਧ ਸ਼ਿਕਾਰ ਫੜਨ ਵਾਲੀ ਵਿਕਟ ਕੀਪਰ ਬਣ ਗਈ ਹੈ। ਹਿਲੀ ਨੇ ਇਹ ਨਾਮਣਾ ਨਿਊਜ਼ੀਲੈਂਡ ਦੇ ਖਿਲਾਫ ਖੇਡੇ ਗਏ ਦੂਸਰੇ ਟੀ-20 ਮੈਚ ਵਿੱਚ ਹਾਸਲ ਕੀਤਾ ਹੈ। ਉਸ ਨੇ 99 ਟੀ-20 ਅੰਤਰ ਰਾਸ਼ਟਰੀ ਮੈਚਾਂ ਵਿੱਚ 92 ਸ਼ਿਕਾਰ ਬਣਾਏ ਹਨ। ਉਹ ਧੋਨੀ ਤੋਂ ਇੱਕ ਕਦਮ ਅੱਗੇ ਹੈ। ਧੋਨੀ ਦੇ ਨਾਂਅ 91 ਸ਼ਿਕਾਰ ਹਨ। ਹਿਲੀ ਤੋਂ ਬਾਅਦ 39 ਸਾਲਾਂ ਦੀ ਇੰਗਲੈਂਡ ਦੀ ਸਾਰਾ ਟੇਲਰ ਦਾ ਨਾਮ ਆਉਂਦਾ ਹੈ ਜਿਸ ਦੇ ਨਾਂਅ `ਤੇ 74 ਸ਼ਿਕਾਰ ਹਨ। ਰਾਚੇਲ ਪ੍ਰੀਸਟ ਨੇ 72 ਸ਼ਿਕਾਰ ਕੀਤੇ ਹਨ। ਮੇਰਿਸਾ ਅਗੁਈਲੀਆ ਦੇ ਨਾਂਅ `ਤੇ 70 ਸ਼ਿਕਾਰ ਹਨ। ਉਨ੍ਹਾਂ ਪਿੱਛੋਂ ਦਿਨੇਸ਼ ਰਾਮਦੀਨ ਹੈ ਜਿਸ ਦੇ ਨਾਂਅ 63 ਸ਼ਿਕਾਰ ਹਨ। ਰਾਮਦੀਨ ਦੇ ਬਾਅਦ ਮੁਸ਼ਫੀਕੁਰ ਰਹੀਮ ਦੇ ਹਿੱਸੇ 61 ਸ਼ਿਕਾਰ ਹਨ।