ਇਟੋਬੀਕੋ, 23 ਸਤੰਬਰ (ਪੋਸਟ ਬਿਊਰੋ) : ਫਰਕਿਨ ਆਨ ਦ ਬੇਅ ਪੱਬ ਦੇ ਇੱਕ ਕਰਮਚਾਰੀ ਦੇ ਕੋਵਿਡ-19 ਪਾਜ਼ੀਟਿਵ ਆਉਣ ਤੋਂ ਬਾਅਦ ਪੱਬ ਨੂੰ ਆਰਜ਼ੀ ਤੌਰ ਉੱਤੇ ਬੰਦ ਕਰ ਦਿੱਤਾ ਗਿਆ ਹੈ|
ਇਹ ਪੱਬ ਇਟੋਬੀਕੋ ਵਿੱਚ ਲੇਕ ਸ਼ੋਰ ਨੇੜੇ 68 ਮਰੀਨ ਪਰੇਡ ਡਰਾਈਵ ਉੱਤੇ ਸਥਿਤ ਹੈ| ਪੱਬ ਵੱਲੋਂ ਆਪਣੇ ਗਾਹਕਾਂ ਨੂੰ ਲਿਖੇ ਗਏ ਪੱਤਰ ਵਿੱਚ ਆਖਿਆ ਗਿਆ ਹੈ ਕਿ ਉਨ੍ਹਾਂ ਵੱਲੋਂ ਇਸ ਆਸ ਨਾਲ ਇਸ ਪੱਬ ਨੂੰ ਆਰਜ਼ੀ ਤੌਰ ਉੱਤੇ ਬੰਦ ਕੀਤਾ ਜਾ ਰਿਹਾ ਹੈ ਤਾਂ ਕਿ ਜਦੋਂ ਹਾਲਾਤ ਠੀਕ ਹੋ ਜਾਣ ਤਾਂ ਇਸ ਪੱਬ ਨੂੰ ਮੁੜ ਖੋਲ੍ਹਿਆ ਜਾ ਸਕੇ|
ਜਿਹੜਾ ਕਰਮਚਾਰੀ ਪਾਜ਼ੀਟਿਵ ਆਇਆ ਹੈ ਉਸ ਨੇ ਆਖਰੀ ਵਾਰੀ ਇੱਥੇ 20 ਸਤੰਬਰ ਨੂੰ ਸਵੇਰੇ 10:30 ਤੋਂ ਸ਼ਾਮੀਂ 6:00 ਵਜੇ ਤੱਕ ਕੰਮ ਕੀਤਾ ਸੀ| ਪੱਬ ਦੀ ਮੈਨੇਜਮੈਂਟ ਨੇ ਦੱਸਿਆ ਕਿ ਉਨ੍ਹਾਂ ਟੋਰਾਂਟੋ ਪਬਲਿਕ ਹੈਲਥ ਨਾਲ ਸੰਪਰਕ ਕਰਕੇ ਕਾਂਟਰੈਕਟ ਟਰੇਸਿੰਗ ਸਬੰਧੀ ਵੇਰਵੇ ਸਾਂਝੇ ਕੀਤੇ ਹਨ|
ਪਬਲਿਕ ਹੈਲਥ ਅਧਿਕਾਰੀਆਂ ਦੀ ਗਾਇਡੈਂਸ ਅਨੁਸਾਰ ਇਸ ਲੋਕੇਸ਼ਨ ਦੇ ਸਾਰੇ ਮੁਲਾਜ਼ਮ ਹੀ ਸੈਲਫ ਆਈਸੋਲੇਸ਼ਨ ਵਿੱਚ ਚਲੇ ਗਏ ਹਨ ਤੇ ਕੰਮ ਤੋਂ ਪਰਤਣ ਤੋਂ ਪਹਿਲਾਂ ਉਨ੍ਹਾਂ ਨੂੰ ਟੈਸਟ ਕਰਵਾਉਣੇ ਹੋਣਗੇ|