ਓਨਟਾਰੀਓ, 23 ਸਤੰਬਰ (ਪੋਸਟ ਬਿਊਰੋ) : ਇਸ ਹਫਤੇ ਤੋਂ ਓਨਟਾਰੀਓ ਦੇ ਤਿੰਨ ਹਸਪਤਾਲਾਂ ਵਿੱਚ ਕੋਵਿਡ-19 ਲਈ ਸਲਾਇਵਾ ਟੈਸਟ ਵੀ ਹੋਇਆ ਕਰਨਗੇ| ਇਸ ਦੀ ਪੁਸ਼ਟੀ ਕੱਲ੍ਹ ਪ੍ਰੀਮੀਅਰ ਡੱਗ ਫੋਰਡ ਵੱਲੋਂ ਕੀਤੀ ਗਈ|
ਇਹ ਟੈਸਟ ਡਾਊਨਟਾਊਨ ਦੇ ਹੇਠ ਲਿਖੇ ਹਸਪਤਾਲਾਂ ਵਿੱਚ ਹੋਇਆ ਕਰਨਗੇ :
• 76 ਗ੍ਰੈਨਵਿਲ ਸਟਰੀਟ ਉੱਤੇ ਸਥਿਤ ਵੁਮਨਜ਼ ਕਾਲਜ ਹਾਸਪਿਟਲ
• 101 ਕਾਲਜ ਸਟਰੀਟ ਉੱਤੇ ਯੂਨੀਵਰਸਿਟੀ ਹੈਲਥ ਨੈੱਟਵਰਕ
• 600 ਯੂਨੀਵਰਸਿਟੀ ਐਵਨਿਊ ਵਿਖੇ ਮਾਊਂਟ ਸਿਨਾਇ ਹਾਸਪਿਟਲ, ਟੋਰਾਂਟੋ
ਇੱਕ ਸੀਨੀਅਰ ਸਰਕਾਰੀ ਸੂਤਰ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਕਿ ਇਹ ਟੈਸਟ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਕੀਤੇ ਜਾਣ ਵਾਲੇ ਟੈਸਟ ਵਰਗਾ ਹੀ ਹੋਵੇਗਾ| ਇਸ ਲਈ ਹੈਲਥ ਕੈਨੇਡਾ ਤੋਂ ਮਨਜ਼ੂਰੀ ਲੈਣ ਦੀ ਵੀ ਕੋਈ ਲੋੜ ਨਹੀਂ| ਪਰ ਉਨ੍ਹਾਂ ਦਾ ਵਿਸ਼ਲੇਸ਼ਣ ਕਰਨ ਲਈ ਉਨ੍ਹਾਂ ਨੂੰ ਲੈਬ ਵਿੱਚ ਭੇਜਿਆ ਜਾਣਾ ਜ਼ਰੂਰੀ ਹੈ|
ਬੀਸੀ ਵਿੱਚ ਪਿਛਲੇ ਹਫਤੇ ਕਿੰਡਰਗਾਰਟਨ ਤੋਂ ਲੈ ਕੇ 12 ਕਲਾਸ ਤੱਕ ਦੇ ਬੱਚਿਆਂ ਲਈ ਸੇਲਾਈਨ ਗਾਰਗਲ ਟੈਸਟ ਵੀ ਸ਼ੁਰੂ ਕੀਤਾ ਗਿਆ ਹੈ| ਇਸ ਲਈ ਬੱਚਿਆਂ ਤੇ ਟੀਨੇਜਰਜ਼ ਲਈ ਕੋਵਿਡ-19 ਸਬੰਧੀ ਜਾਂਚ ਕਰਵਾਉਣਾ ਸੁਖਾਲਾ ਹੋ ਸਕਦਾ ਹੈ| ਪ੍ਰਾਈਵੇਟ ਅਤੇ ਹੈਲਥ ਅਧਿਕਾਰੀਆਂ ਨੇ ਪਿਛਲੇ ਹਫਤੇ ਇਹ ਆਖਿਆ ਸੀ ਕਿ ਸਲਾਇਵਾ ਅਧਾਰਿਤ ਕੋਵਿਡ-19 ਟੈਸਟ ਇਸ ਸਾਲ ਦੇ ਅੰਤ ਤੱਕ ਉਪਲਬਧ ਹੋਵੇਗਾ|
ਪਬਲਿਕ ਹੈਲਥ ਓਨਟਾਰੀਓ ਦੇ ਚੀਫ ਆਫ ਮਾਇਕਰੋਬਾਇਓਲੋਜੀ ਐਂਡ ਲੈਬੋਰੇਟਰੀ ਸਾਇੰਸ ਦਾ ਕਹਿਣਾ ਹੈ ਕਿ ਇਹ ਟੈਸਟ ਬੱਚਿਆਂ ਤੇ ਉਨ੍ਹਾਂ ਵਿਅਕਤੀਆਂ ਲਈ ਲਾਹੇਵੰਦ ਹੈ ਜਿਹੜੇ ਨੱਕ ਵਿੱਚੋਂ ਸਵੈਬ ਰਾਹੀਂ ਜਾਂਚ ਨਹੀਂ ਕਰਵਾ ਸਕਦੇ|