ਲੰਡਨ, 22 ਸਤੰਬਰ (ਪੋਸਟ ਬਿਊਰੋ) : ਫਾਰਮਾਸਿਊਟਿਕਲ ਕੰਪਨੀਆਂ ਗਲੈਕਸੋਸਮਿੱਥਲਾਈਨ (GlaxoSmithKline) ਤੇ ਸੈਨੋਫੀ ਨੇ ਆਪਣੀ ਕਥਿਤ ਤੌਰ ਉੱਤੇ ਪ੍ਰਭਾਵੀ ਕੋਵਿਡ-19 ਵੈਕਸੀਨ ਦੀਆਂ 72 ਮਿਲੀਅਨ ਡੋਜ਼ਿਜ਼ ਕੈਨੇਡਾ ਨੂੰ ਮੁਹੱਈਆ ਕਰਵਾਉਣ ਲਈ ਸਹਿਮਤੀ ਦੇ ਦਿੱਤੀ ਹੈ| ਸਰਕਾਰਾਂ ਅਜਿਹੀਆਂ ਵੈਕਸੀਨਜ਼ ਦੀਆਂ ਸਪਲਾਈਜ਼ ਖਰੀਦ ਰਹੀਆਂ ਹਨ ਜਿਹੜੀਆਂ ਅਜੇ ਕਾਰਗਰ ਸਿੱਧ ਵੀ ਨਹੀਂ ਹੋਈਆਂ|
ਅਜਿਹਾ ਇਸ ਆਸ ਨਾਲ ਕੀਤਾ ਜਾ ਰਿਹਾ ਹੈ ਕਿ ਜਿਹੜੀ ਵੈਕਸੀਨ ਕੰਮ ਕਰ ਗਈ ਉਸ ਦੀ ਕਿਤੇ ਥੁੜ੍ਹ ਨਾ ਹੋ ਜਾਵੇ| ਮੰਗਲਵਾਰ ਨੂੰ ਇਨ੍ਹਾਂ ਕੰਪਨੀਆਂ ਨੇ ਦੁਨੀਆ ਭਰ ਵਿੱਚ ਇਸ ਵੈਕਸੀਨ ਨੂੰ ਕਿਫਾਇਤੀ ਢੰਗ ਨਾਲ ਉਪਲਬਧ ਕਰਵਾਉਣ ਦੀ ਆਪਣੀ ਵਚਨਬੱਧਤਾ ਦੁਹਰਾਈ| ਜੀਐਸਕੇ ਦੀ ਵੈਕਸੀਨ ਯੂਨਿਟ ਦੇ ਪ੍ਰੈਜ਼ੀਡੈਂਟ ਰੌਜਰ ਕੌਨਰ ਨੇ ਇੱਕ ਬਿਆਨ ਜਾਰੀ ਕਰਕੇ ਆਖਿਆ ਕਿ ਦੋਵਾਂ ਕੰਪਨੀਆਂ ਕੋਲ ਪੂਰੀ ਦੁਨੀਆਂ ਵਿੱਚ ਆਰ ਐਂਡ ਡੀ (R&D) ਤੇ ਉਤਪਾਦਨ ਦੀ ਸਮਰੱਥਾ ਹੈ|
ਬਿਆਨ ਵਿੱਚ ਇਹ ਵੀ ਆਖਿਆ ਗਿਆ ਕਿ ਅਸੀਂ ਵੈਕਸੀਨ ਦਾ ਉਤਪਾਦਨ ਵਧਾਉਣ ਲਈ ਸਖਤ ਮਿਹਨਤ ਕਰ ਰਹੇ ਹਾਂ| ਕੈਨੇਡਾ ਸਰਕਾਰ ਵੱਲੋਂ ਇਹ ਐਲਾਨ ਸਾਡੀਆਂ ਕੋਸ਼ਿਸ਼ਾਂ ਦੀ ਹੀ ਤਾਈਦ ਹੈ| ਇਸ ਤੋਂ ਪਹਿਲਾਂ ਇਹ ਕੰਪਨੀਆਂ ਅਮਰੀਕਾ, ਯੂਰਪੀਅਨ ਯੂਨੀਅਨ ਤੇ ਯੂਨਾਈਟਿਡ ਕਿੰਗਡਮ ਸਰਕਾਰਾਂ ਨਾਲ ਵੀ ਕਰਾਰ ਕਰ ਚੁੱਕੀਆਂ ਹਨ|