ਓਟਵਾ, 22 ਸਤੰਬਰ (ਪੋਸਟ ਬਿਊਰੋ) : ਫੈਡਰਲ ਕਾਰਬਨ ਟੈਕਸ ਸੰਵਿਧਾਨਕ ਹੈ ਜਾਂ ਨਹੀਂ ਇਹ ਤੈਅ ਕਰਨ ਲਈ ਸੁਪਰੀਮ ਕੋਰਟ ਆਫ ਕੈਨੇਡਾ ਵੱਲੋਂ ਅੱਜ ਸੁਣਵਾਈ ਸੁæਰੂ ਕੀਤੀ ਜਾਵੇਗੀ|
ਪ੍ਰੋਵਿੰਸਿਜ਼, ਜਿਨ੍ਹਾਂ ਕੋਲ ਕਾਰਬਨ ਟੈਕਸ ਸਬੰਧੀ ਆਪਣਾ ਕੋਈ ਸਿਸਟਮ ਨਹੀਂ ਹੈ, ਵਿੱਚ ਕਾਰਬਨ ਟੈਕਸ ਲਾਉਣ ਦੀ ਓਟਵਾ ਦੀ ਨੀਤੀ ਨਾਲ ਸਬੰਧਤ ਤਿੰਨ ਵੱਖ ਵੱਖ ਮਾਮਲਿਆਂ ਵਿੱਚ ਅਦਾਲਤ ਵੱਲੋਂ ਦੋ ਦਿਨ ਤੱਕ ਜਿਰ੍ਹਾ ਸੁਣੀ ਜਾਵੇਗੀ| 2019 ਵਿੱਚ ਸਸਕੈਚਵਨ ਤੇ ਓਨਟਾਰੀਓ ਵਿੱਚ ਅਪੀਲ ਕੋਰਟ ਨੇ ਓਟਵਾ ਦੇ ਹੱਕ ਵਿੱਚ ਫੈਸਲਾ ਸੁਣਾਇਆ ਸੀ|
ਇਸ ਸਾਲ ਫਰਵਰੀ ਵਿੱਚ ਅਲਬਰਟਾ ਕੋਰਟ ਆਫ ਅਪੀਲ ਨੇ ਆਖਿਆ ਕਿ ਟੈਕਸ ਸੰਵਿਧਾਨਕ ਨਹੀਂ ਹੈ ਤੇ ਇਹ ਪ੍ਰੋਵਿੰਸ਼ੀਅਲ ਸ਼ਕਤੀਆਂ ਦੀ ਉਲੰਘਣਾ ਹੈ| ਓਨਟਾਰੀਓ ਤੇ ਸਸਕੈਚਵਨ ਵੱਲੋਂ ਇਸ ਸਬੰਧ ਵਿੱਚ ਕੀਤੀ ਗਈ ਅਪੀਲ ਮਾਰਚ ਵਿੱਚ ਹੋਣੀ ਸੀ ਪਰ ਕੋਵਿਡ-19 ਮਹਾਂਮਾਰੀ ਕਾਰਨ ਇਹ ਮੁਲਤਵੀ ਹੋ ਗਈ|
ਇਸ ਦੇਰੀ ਕਾਰਨ ਅਲਬਰਟਾ ਨੂੰ ਵੀ ਆਪਣਾ ਕੇਸ ਫਾਈਲ ਕਰਨ ਦਾ ਮੌਕਾ ਮਿਲ ਗਿਆ| ਇਸ ਲਈ ਹੁਣ ਇਨ੍ਹਾਂ ਸਾਰੇ ਮਾਮਲਿਆਂ ਦੀ ਸੁਣਵਾਈ ਇੱਕੋ ਵੇਲੇ ਸੁæਰੂ ਹੋਵੇਗੀ|