ਵਿਕਟੋਰੀਆ, 21 ਸਤੰਬਰ (ਪੋਸਟ ਬਿਊਰੋ) : ਐਨਡੀਪੀ ਵੱਲੋਂ ਪ੍ਰੋਵਿੰਸ ਵਿੱਚ ਕਾਇਮ ਕੀਤੀ ਗਈ ਘੱਟ ਗਿਣਤੀ ਸਰਕਾਰ ਦੇ ਤਿੰਨ ਸਾਲ ਪੂਰੇ ਹੋਣ ਤੋਂ ਬਾਅਦ ਬ੍ਰਿਟਿਸ਼ ਕੋਲੰਬੀਅਨਜ਼ ਨੂੰ ਇੱਕ ਵਾਰੀ ਫਿਰ ਅਗਲੇ ਮਹੀਨੇ ਅਚਨਚੇਤੀ ਚੋਣਾਂ ਦਾ ਸਾਹਮਣਾ ਕਰਨਾ ਹੋਵੇਗਾ|
ਪ੍ਰੀਮੀਅਰ ਜੌਹਨ ਹੌਰਗਨ ਨੇ ਸੋਮਵਾਰ ਨੂੰ ਨਿਊਜ਼ ਕਾਨਫਰੰਸ ਵਿੱਚ 24 ਅਕਤੂਬਰ ਨੂੰ ਚੋਣਾਂ ਕਰਵਾਉਣ ਦਾ ਐਲਾਨ ਕੀਤਾ| ਇਸ ਤੋਂ ਪਹਿਲਾਂ ਉਨ੍ਹਾਂ ਲੈਫਟੀਨੈਂਟ ਗਵਰਨਰ ਨਾਲ ਮੁਲਾਕਾਤ ਕਰਕੇ ਵਿਧਾਨਸਭਾ ਭੰਗ ਕਰਨ ਦੀ ਮੰਗ ਕੀਤੀ| ਆਪਣੇ ਲੈਂਗਫੋਰਡ ਸਥਿਤ ਘਰ ਦੇ ਬਾਹਰੋਂ ਗੱਲ ਕਰਦਿਆਂ ਹੌਰਗਨ ਨੇ ਆਖਿਆ ਕਿ ਉਨ੍ਹਾਂ ਲਈ ਇਹ ਫੈਸਲਾ ਸੌਖਾ ਨਹੀਂ ਸੀ|
ਹਾਲਾਂਕਿ ਬੀਸੀ ਵਿੱਚ ਆਮ ਚੋਣਾਂ ਅਕਤੂਬਰ 2021 ਵਿੱਚ ਕਰਵਾਈਆਂ ਜਾਣੀਆਂ ਨਿਰਧਾਰਤ ਸਨ ਪਰ ਪ੍ਰੀਮੀਅਰ ਨੇ ਆਖਿਆ ਕਿ 12 ਮਹੀਨੇ ਹੋਰ ਇੰਤਜ਼ਾਰ ਕਰਨ ਨਾਲ ਕੋਵਿਡ-19 ਮਹਾਂਮਾਰੀ ਨਾਲ ਨਜਿੱਠਣ ਦੀਆਂ ਸਰਕਾਰ ਦੀਆਂ ਕੋਸ਼ਿਸ਼ਾਂ ਨੂੰ ਨੁਕਸਾਨ ਪਹੁੰਚ ਸਕਦਾ ਸੀ| ਮਹਾਂਮਾਰੀ ਦੌਰਾਨ ਹੌਰਗਨ ਦੀ ਲੋਕਪ੍ਰਿਅਤਾ ਵੋਟਰਾਂ ਵਿੱਚ ਕਾਫੀ ਵਧੀ ਹੈ| ਕਿਸੇ ਵੀ ਕੈਨੇਡੀਅਨ ਪ੍ਰੀਮੀਅਰ ਨਾਲੋਂ ਹੌਰਗਨ ਨੂੰ ਵਧੇਰੇ ਪਸੰਦੀਦਾ ਪ੍ਰੀਮੀਅਰ ਦਾ ਦਰਜਾ ਹਾਸਲ ਹੋਇਆ ਹੈ|
ਇਸ ਦੌਰਾਨ ਬੀਸੀ ਦੇ ਲਿਬਰਲ ਆਗੂ ਐਂਡਰਿਊ ਵਿਲਕਿੰਸਨ ਨੇ ਆਖਿਆ ਕਿ ਪ੍ਰੀਮੀਅਰ ਵੱਲੋਂ ਚੋਣਾਂ ਕਰਵਾਏ ਜਾਣ ਦਾ ਫੈਸਲਾ ਲੋਕਾਂ ਨਾਲੋਂ ਸਿਆਸਤ ਨੂੰ ਤਰਜੀਹ ਦੇਣ ਵਾਲਾ ਹੈ| ਸਾਡੇ ਕੋਲ ਅਜਿਹੀ ਸਰਕਾਰ ਹੈ ਜਿਹੜੀ ਇਸ ਤਰ੍ਹਾਂ ਦੀ ਮਹਾਂਮਾਰੀ ਦਰਮਿਆਨ ਸਾਨੂੰ ਚੋਣਾਂ ਵਿੱਚ ਧੱਕ ਰਹੀ ਹੈ|