ਵਾਸ਼ਿੰਗਟਨ, 21 ਸਤੰਬਰ (ਪੋਸਟ ਬਿਊਰੋ)- ਅਮਰੀਕਾ ਵਿੱਚ ਫੈਡਰਲ ਅਧਿਕਾਰੀਆਂ ਨੇ ਵ੍ਹਾਈਟ ਹਾਊਸ ਦੇ ਪਤੇ ਉੱਤੇ ਆਏ ਇੱਕ ਲਿਫ਼ਾਫ਼ੇ ਵਿੱਚ ਜ਼ਹਿਰ ‘ਰਿਸਿਨ' ਹੋਣ ਦਾ ਪਤਾ ਲਾਇਆ ਹੈ।
ਇੱਕ ਅਧਿਕਾਰੀ ਨੇ ਪ੍ਰੈਸ ਨੂੰ ਦੱਸਿਆ ਕਿ ਇਹ ਚਿੱਠੀ ਉਸ ਸਰਕਾਰੀ ਵਿਭਾਗ ਵਿੱਚ ਫੜੀ ਗਈ ਜੋ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਰਾਸ਼ਟਰਪਤੀ ਦਫ਼ਤਰ ਵ੍ਹਾਈਟ ਹਾਊਸ ਲਈ ਆਉਣ ਵਾਲੀ ਡਾਕ ਦੀ ਜਾਂਚ ਕਰਦਾ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਸ਼ੁਰੂ ਦੀ ਜਾਂਚ ਵਿੱਚ ਇਸ ਵਿੱਚ ‘ਰਿਸਿਨ' ਹੋਣ ਦੀ ਪੁਸ਼ਟੀ ਹੋਈ ਹੈ। ਇਹ ਕੈਸਟਰ ਸੀਡ (ਅਰੰਡੀ ਦੇ ਬੀਜ) ਵਿੱਚ ਸੁਭਾਵਕ ਰੂਪ ਵਿੱਚ ਪਾਇਆ ਜਾਣ ਵਾਲਾ ਜ਼ਹਿਰੀਲਾ ਪਦਾਰਥ ਹੈ। ਫੈਡਰਲ ਜਾਂਚ ਕਰਤਾ ਇਹ ਪਤਾ ਲਾ ਰਹੇ ਹਨ ਕਿ ਇਹ ਲਿਫ਼ਾਫ਼ਾ ਕਿੱਥੋਂ ਆਇਆ ਅਤੇ ਕਿਸ ਨੇ ਭੇਜਿਆ ਹੈ। ਐਫ਼ ਬੀ ਆਈ, ਸੀਕਰੇਟ ਸਰਵਿਸ ਅਤੇ ਅਮਰੀਕੀ ਡਾਕ ਨਿਰੀਖਣ ਸੇਵਾ ਜਾਂਚ ਦੀ ਅਗਵਾਈ ਕਰ ਰਹੇ ਹਨ। ਐਫ਼ ਬੀ ਆਈ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਏਜੰਟ ‘ਅਮਰੀਕੀ ਸਰਕਾਰੀ ਡਾਕ ਵਿਭਾਗ ਵਿੱਚ ਆਈ ਇਸ ਸ਼ੱਕੀ ਚਿੱਠੀ ਦੀ ਜਾਂਚ ਹੋ ਰਹੀ ਹੈ ਤੇ ਇਸ ਦਾ ਜਨਤਕ ਸੁਰੱਖਿਆ ਲਈ ਕੋਈ ਖ਼ਤਰਾ ਨਹੀਂ ਹੈ।’ ਜ਼ਿਕਰ ਯੋਗ ਹੈ ਕਿ ਸਮੁੰਦਰੀ ਫੌਜ ਦੇ ਇੱਕ ਸੀਨੀਅਰ ਕਰਮਚਾਰੀ ਨੂੰ ਟਰੰਪ ਅਤੇ ਉਨ੍ਹਾਂ ਦੇ ਪ੍ਰਸ਼ਾਸਨ ਦੇ ਮੈਂਬਰਾਂ ਨੂੰ ਇਸ ਪ੍ਰਕਾਰ ਦੇ ਲਿਫ਼ਾਫ਼ੇ ਭੇਜਣ ਦੇ ਦੋਸ਼ ਵਿੱਚ 2018 ਵਿੱਚ ਗ਼੍ਰਿਫ਼ਤਾਰ ਕੀਤਾ ਗਿਆ ਸੀ।