ਆਬੂ ਧਾਬੀ, 20 ਸਤੰਬਰ, (ਪੋਸਟ ਬਿਊਰੋ)- ਐਤਵਾਰ ਨੂੰ ਦੁਬਈ ਵਿੱਚ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ ਪੀ ਐੱਲ) ਦੇ ਦੂਸਰੇ ਦਿਨ ਬਹੁਤ ਰੋਮਾਂਚਕ ਮੁਕਾਬਲਾ ਦੇਖਣ ਨੂੰ ਮਿਲਿਆ। ਦਿੱਲੀ ਕੈਪੀਟਲਜ਼ ਦੀ ਟੀਮ ਨੇ ਕਿੰਗਜ਼ ਇਲੈਵਨ ਪੰਜਾਬ ਨੂੰ ਸੁਪਰ ਓਵਰ ਵਿੱਚ ਪੁੱਜ ਕੇ ਮੁਕਾਬਲੇ ਵਿੱਚ ਹਰਾ ਕੇ ਟੂਰਨਾਮੈਂਟ ਵਿੱਚ ਜਿੱਤ ਨਾਲ ਆਗਾਜ਼ ਕੀਤਾ।
ਇਸ ਤੋਂ ਪਹਿਲਾਂ ਬੱਲੇਬਾਜ਼ੀ ਸ਼ੁਰੂ ਕਰਦੇ ਹੋਏ ਦਿੱਲੀ ਟੀਮ ਨੇ ਮਾਰਕਸ ਸਟੋਈਨਿਸ ਦੇ ਧਮਾਕੇਦਾਰ ਅਰਧ ਸੈਂਕੜੇ ਦੇ ਦਮ `ਤੇ ਅੱਠ ਵਿਕਟਾਂ `ਤੇ 157 ਦੌੜਾਂ ਦਾ ਸਕੋਰ ਖੜ੍ਹਾ ਕੀਤਾ ਸੀ। ਇਸ ਦੇ ਜਵਾਬ ਵਿੱਚ ਪੰਜਾਬ ਦੀ ਟੀਮ ਨੇ ਮਯੰਕ ਅਗਰਵਾਲ ਦੀ 89 ਦੌੜਾਂ ਦੀ ਪਾਰੀ ਦੇ ਦਮ ਉੱਤੇ ਅੱਠ ਵਿਕਟਾਂ ਉੱਤੇ 157 ਦੌੜਾਂ ਬਣਾਈਆਂ ਤੇ ਮੈਚ ਟਾਈ ਹੋ ਗਿਆ। ਸਕੋਰ ਬਰਾਬਰ ਹੋਣ ਪਿੱਛੋਂ ਜੇਤੂ ਦਾ ਫ਼ੈਸਲਾ ਸੁਪਰ ਓਵਰ ਨਾਲ ਕੀਤਾ ਗਿਆ। ਦਿੱਲੀ ਵੱਲੋਂ ਕੈਗਿਸੋ ਰਬਾਦਾ ਨੇ ਪੰਜਾਬ ਨੂੰ ਸਿਰਫ਼ ਦੋ ਦੌੜਾਂ `ਤੇ ਆਲ ਆਊਟ (ਸੁਪਰ ਓਵਰ ਵਿੱਚ ਦੋ ਬੱਲੇਬਾਜ਼ ਆਊਟ ਹੋਣ `ਤੇ ਟੀਮ ਆਲ ਆਊਟ ਮੰਨੀ ਜਾਂਦੀ ਹੈ) ਕਰ ਦਿੱਤਾ। ਪੰਜਾਬ ਵੱਲੋਂ ਬੱਲੇਬਾਜ਼ੀ ਕਰਨ ਆਏ ਕਪਤਾਨ ਕੇਐੱਲ ਰਾਹੁਲ ਦੋ ਦੌੜਾਂ ਬਣਾ ਕੇ ਆਊਟ ਹੋ ਗਏ ਅਤੇ ਗਲੇਨ ਮੈਕਸਵੈਲ ਖ਼ਾਤਾ ਵੀ ਨਹੀਂ ਖੋਲ੍ਹ ਸਕੇ। ਇਸ ਦੇ ਬਾਅਦ ਦਿੱਲੀ ਨੇ ਬਿਨਾਂ ਵਿਕਟ ਗੁਆਏ ਤੀਜੀ ਗੇਂਦ ਉੱਤੇ ਇਹ ਟੀਚਾ ਹਾਸਲ ਕਰ ਕੇ ਜਿੱਤ ਦਰਜ ਕਰ ਲਈ।