ਟੋਰਾਂਟੋ,20 ਸਤੰਬਰ(ਪੋਸਟ ਬਿਊਰੋ): ਟੋਰਾਂਟੋ ਇਲਾਕੇ ਵਿੱਚ ਘਰਾਂ ਦੀ ਮੰਗ ਵਿੱਚ ਆਈ ਉਛਾਲ ਕਾਰਨ ਅਗਸਤ ਮਹੀਨੇ ਘਰਾਂ ਦੀ ਵਿੱਕਰੀ ਤੇ ਕੀਮਤਾਂ ਵਿੱਚ ਰਿਕਾਰਡਤੋੜ ਵਾਧਾ ਦਰਜ ਕੀਤਾ ਗਿਆ। ਇਸ ਤੋਂ ਮਹਿਸੂਸ ਹੋ ਰਿਹਾ ਹੈ ਕਿ ਕੋਵਿਡ-19 ਮਹਾਂਮਾਰੀ ਤੋਂ ਹਾਊਸਿੰਗ ਮਾਰਕਿਟ ਨਿਕਲਣ ਦੀ ਕਾਮਯਾਬ ਕੋਸਿਸ ਕਰ ਰਹੀ ਹੈ।
ਟੋਰਾਂਟੋ ਰੀਜਨਲ ਰੀਅਲ ਅਸਟੇਟ ਬੋਰਡ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਅਗਸਤ ਵਿੱਚ ਐਮ ਐਲ ਐਸ ਸਿਸਟਮ ਦੇ ਅੰਕੜਿਆਂ ਮੁਤਾਬਕ 10,775 ਘਰਾਂ ਦੀ ਵਿੱਕਰੀ ਹੋਈ, ਜੋ ਕਿ ਇੱਕ ਸਾਲ ਪਹਿਲਾਂ ਵਿਕੇ 7,682 ਘਰਾਂ ਨਾਲੋਂ 40 ਫੀ ਸਦੀ ਵੱਧ ਹੈ। ਡਿਟੈਚਡ ਘਰਾਂ ਦੀ ਵਿੱਕਰੀ ਵਿੱਚ 50.6 ਫੀ ਸਦੀ ਤੇ ਸੈਮੀ ਡਿਟੈਚਡ ਘਰਾਂ ਦੀ ਵਿੱਕਰੀ ਵਿੱਚ 66.8 ਫੀ ਸਦੀ ਵਾਧਾ ਦਰਜ ਕੀਤਾ ਗਿਆ। ਇਸ ਦੌਰਾਨ ਕੌਂਡੋ ਦੀ ਸੇਲ ਮੱਠੀ ਰਹੀ, ਇਸ ਵਿੱਚ 10.9 ਫੀ ਸਦੀ ਵਾਧਾ ਹੀ ਦਰਜ ਕੀਤਾ ਗਿਆ।ਇਸ ਰੀਜਨ ਵਿੱਚ ਵਿਕੇ ਘਰਾਂ ਦੀ ਔਸਤ ਕੀਮਤ 951,404 ਡਾਲਰ ਦਰਜ ਕੀਤੀ ਗਈ ਜੋ ਕਿ ਇੱਕ ਸਾਲ ਪਹਿਲਾਂ ਘਰਾਂ ਦੀ ਕੀਮਤ 792,134 ਡਾਲਰ ਦੇ ਮੁਕਾਬਲੇ 20 ਫੀ ਸਦੀ ਵੱਧ ਰਹੀ।
ਇਸ ਦੌਰਾਨ ਮੈਟਰੋ ਵੈਨਕੂਵਰ ਵਿੱਚ ਘਰਾਂ ਦੀ ਵਿੱਕਰੀ ਅਗਸਤ ਵਿੱਚ 3,047 ਤੱਕ ਪਹੁੰਚ ਗਈ। ਦ ਰੀਅਲ ਅਸਟੇਟ ਬੋਰਡ ਆਫ ਗ੍ਰੇਟਰ ਵੈਨਕੂਵਰ ਦਾ ਕਹਿਣਾ ਹੈ ਕਿ ਪਿਛਲੇ ਮਹੀਨੇ ਵਿਕੇ ਘਰਾਂ ਦੀ ਗਿਣਤੀ ਪਿਛਲੇ 10 ਸਾਲਾਂ ਵਿੱਚ ਅਗਸਤ ਮਹੀਨੇ ਵਿਕੇ ਔਸਤ ਘਰਾਂ ਦੀ ਗਿਣਤੀ (20 ਫੀ ਸਦੀ) ਤੋਂ ਵੱਧ ਰਹੀ। ਹਾਲਾਂਕਿ ਜੁਲਾਈ ਵਿੱਚ ਵਿਕੇ 3128 ਘਰਾਂ ਦੇ ਮੁਕਾਬਲੇ ਅਗਸਤ ਵਿੱਚ ਵਿਕੇ ਘਰਾਂ ਦੀ ਗਿਣਤੀ ਥੋੜ੍ਹੀ ਜਿਹੀ ਘੱਟ ਰਹੀ।ਘਰਾਂ ਦੀਆਂ ਕੀਮਤਾਂ ਇਸ ਸਾਲ ਅਗਸਤ ਵਿੱਚ ਸਾਲ 2019 ਵਿੱਚ ਇਸੇ ਅਰਸੇ ਦੇ ਮੁਕਾਬਲੇ 5.3 ਫੀ ਸਦੀ ਵੱਧ ਰਹੀਆਂ ਤੇ ਜੁਲਾਈ ਦੇ ਮੁਕਾਬਲੇ 0.7 ਫੀ ਸਦੀ ਵੱਧ ਰਹੀਆਂ। ਬੋਰਡ ਦੀ ਚੇਅਰ ਕੌਲੈੱਟ ਗਰਬਰ ਦਾ ਕਹਿਣਾ ਹੈ ਕਿ ਇਨ੍ਹਾਂ ਕੀਮਤਾਂ ਵਿੱਚ ਆਏ ਉਛਾਲ ਦਾ ਕਾਰਨ ਉਹ ਲੋਕ ਹਨ ਜਿਨ੍ਹਾਂ ਨੇ ਕੋਵਿਡ-19 ਮਹਾਂਮਾਰੀ ਕਾਰਨ ਬਸੰਤ ਵਿੱਚ ਘਰ ਖਰੀਦਣ ਦੀਆਂ ਆਪਣੀਆਂ ਯੋਜਨਾਵਾਂ ਨੂੰ ਟਾਲ ਦਿੱਤਾ ਸੀ।