ਓਨਟਾਰੀਓ,20 ਸਤੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੀਆਂ ਨਰਸਾਂ ਦੀ ਰੈਗੂਲੇਟਰੀ ਬੌਡੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਸਿਸਟਮ ਨੂੰ ਸਾਈਬਰਸਕਿਊਰਿਟੀ ਸਬੰਧੀ ਗੜਬੜ ਦਾ ਸਾਹਮਣਾ ਕਰਨਾ ਪਿਆ ਹੈ। ਇਸ ਕਾਰਨ ਕੁੱਝ ਸੇਵਾਵਾਂ ਆਰਜ਼ੀ ਤੌਰ ਉੱਤੇ ਉਪਲਬਧ ਨਹੀਂ ਹੋਣਗੀਆਂ।
ਦ ਕਾਲਜ ਆਫ ਨਰਸਿਜ਼ ਆਫ ਓਨਟਾਰੀਓ ਦਾ ਕਹਿਣਾ ਹੈ ਕਿ ਕੁੱਝ ਆਨਲਾਈਨ ਸੇਵਾਵਾਂ ਜਿਵੇਂ ਕਿ ਫਾਈਂਡ ਅ ਨਰਸ, ਤੇ ਮੈਂਬਰ ਅਤੇ ਐਪਲੀਕੈਂਟ ਪੋਰਟਲਜ਼ 8 ਸਤੰਬਰ ਤੋਂ ਹੀ ਡਾਊਨ ਪਏ ਹਨ। ਗਰੁੱਪ ਦਾ ਕਹਿਣਾ ਹੈ ਕਿ ਇਸ ਘਟਨਾ ਤੋਂ ਬਾਅਦ ਉਹ ਇਹ ਜਾਂਚ ਕਰਵਾ ਰਹੇ ਹਨ ਕਿ ਕਿਤੇ ਇਸ ਨਾਲ ਨਿਜੀ ਜਾਣਕਾਰੀ ਨੂੰ ਤਾਂ ਕੋਈ ਨੁਕਸਾਨ ਨਹੀਂ ਪਹੁੰਚਿਆ।
ਉਨ੍ਹਾਂ ਆਖਿਆ ਕਿ ਇਸ ਘਟਨਾ ਨੂੰ ਠੱਲ੍ਹ ਪਾਉਣ ਲਈ ਉਨ੍ਹਾਂ ਵੱਲੋਂ ਫੌਰੀ ਕਦਮ ਚੁੱਕੇ ਗਏ। ਇੱਥੇ ਹੀ ਬੱਸ ਨਹੀਂ ਫੋਰੈਂਸਿਕ ਜਾਂਚ ਵਿੱਚ ਮਦਦ ਲਈ ਉਨ੍ਹਾਂ ਵੱਲੋਂ ਸਾਈਬਰਸਕਿਊਰਿਟੀ ਫਰਮ ਦੀਆਂ ਸੇਵਾਵਾਂ ਵੀ ਲਈਆਂ ਜਾ ਰਹੀਆਂ ਹਨ। ਗਰੁੱਪ ਦਾ ਕਹਿਣਾ ਹੈ ਕਿ ਜੇ ਕਿਸੇ ਨੂੰ ਕਿਸੇ ਪ੍ਰੈਕਟਿਸ਼ਨਰ ਬਾਰੇ ਕੋਈ ਚਿੰਤਾ ਹੈ ਤਾਂ ਉਹ ਅਜੇ ਵੀ ਕਾਲਜ ਦੀ ਵੈੱਬਸਾਈਟ ਨੂੰ ਸਿ਼ਕਾਇਤ ਭੇਜ ਸਕਦੇ ਹਨ।