* ਚੋਰ ਨਕਦੀ ਅਤੇ ਸੋਨੇ ਦੀਆਂ ਵਾਲੀਆਂ ਲੈ ਗਏ
ਗੋਰਾਇਆ, 20 ਸਤੰਬਰ (ਪੋਸਟ ਬਿਊਰੋ)- ਕੱਲ੍ਹ ਰਾਤ ਚੋਰਾਂ ਨੇ ਘਰ ਸੁੱਤੇ ਹੋਏ ਪਰਵਾਰ ਨੂੰ ਨਿਸ਼ਾਨਾ ਬਣਾ ਕੇ ਘਰ `ਚੋਂ ਪਰਸ, ਨਕਦੀ, ਸੋਨੇ ਦੇ ਗਹਿਣੇ ਚੋਰੀ ਕਰ ਲਏ। ਪਰਵਾਰ ਨੂੰ ਚੋਰੀ ਹੋਏ ਪਰਸ ਬਾਹਰ ਗਲੀ ਵਿੱਚ ਕੂੜੇ ਦੇ ਢੇਰ `ਤੇ ਪਏ ਮਿਲੇ, ਜਿਸ ਵਿੱਚ ਕੁਝ ਕਾਗਜ਼ਾਤ ਹੀ ਚੋਰ ਛੱਡ ਗਏ, ਬਾਕੀ ਸਾਮਾਨ ਲੈ ਕੇ ਚੋਰ ਫਰਾਰ ਹੋ ਗਏ।
ਇਸ ਬਾਰੇ ਸੋਨੂੰ ਕੁਮਾਰ ਪੁੱਤਰ ਰਾਜ ਕੁਮਾਰ ਵਾਸੀ ਗੋਰਾਇਆ ਨੇ ਦੱਸਿਆ ਕਿ ਦੇਰ ਰਾਤ ਉਹ ਆਪਣੇ ਪਰਵਾਰ ਸਮੇਤ ਸੁੱਤੇ ਪਏ ਸਨ। ਤਕਰੀਬਨ ਤਿੰਨ ਵਜੇ ਇੱਕ ਅਣਪਛਾਤਾ ਵਿਅਕਤੀ ਉਨ੍ਹਾਂ ਦੇ ਘਰ ਦੀ ਕੰਧ ਟੱਪ ਕੇ ਲੱਕੜੀ ਦੀ ਪੌੜੀ ਰਸਤੇ ਉਨ੍ਹਾਂ ਦੇ ਘਰ ਵਿੱਚ ਵੜਿਆ, ਜਿਸ ਦੇ ਪੈਰਾਂ ਦੇ ਨਿਸ਼ਾਨ ਕੰਧ `ਤੇ ਲੱਗੇ ਹਨ ਅਤੇ ਜੋ ਨੇੜੇ ਦੁਕਾਨ `ਤੇ ਲੱਗੇ ਸੀ ਸੀ ਟੀ ਵੀ ਕੈਮਰੇ ਵਿੱਚ ਵੀ ਆਇਆ ਹੈ। ਚੋਰ ਕਮਰੇ ਵਿੱਚੋਂ ਉਸ ਦੀ ਪਤਨੀ ਦਾ ਤੇ ਉਸ ਦਾ ਪਰਸ ਲੈ ਗਿਆ। ਪਰਸ ਵਿੱਚ 9500 ਰੁਪਏ ਦੀ ਨਕਦੀ, ਪੰਜ ਗਰਾਮ ਸੋਨੇ ਦੀਆਂ ਵਾਲੀਆਂ, ਜ਼ਰੂਰੀ ਦਸਤਾਵੇਜ਼, ਬਾਈਕ ਦੇ ਪੇਪਰ, ਏ ਟੀ ਐਮ ਕਾਰਡ ਸਨ। ਉਨ੍ਹਾਂ ਨੂੰ ਚੋਰੀ ਦਾ ਪਤਾ ਸਵੇਰੇ ਓਦੋਂ ਲੱਗਾ ਜਦ ਉਹ ਆਪਣੇ ਪਰਸ ਲੱਭ ਰਹੇ ਸਨ। ਜਦੋਂ ਉਨ੍ਹਾਂ ਨੇ ਬਾਹਰ ਜਾ ਕੇ ਦੇਖਿਆ ਤਾਂ ਉਨ੍ਹਾਂ ਦੇ ਪਰਸ ਕੂੜੇ ਦੇ ਢੇਰ `ਤੇ ਪਏ ਸਨ ਜਿਸ ਵਿੱਚੋਂ ਨਕਦੀ ਅਤੇ ਸੋਨੇ ਦੀਆਂ ਵਾਲੀਆਂ ਗਾਇਬ ਸਨ, ਪਰ ਕੁਝ ਕਾਗਜ਼ਾਤ ਉਸ ਵਿੱਚ ਸਨ। ਉਨ੍ਹਾਂ ਨੇ ਸੀ ਸੀ ਟੀ ਵੀ ਚੈਕ ਕੀਤਾ ਤਾਂ ਉਸ ਵਿੱਚ ਰਾਤ ਤਕਰੀਬਨ ਤਿੰਨ ਵਜੇ ਇੱਕ ਅਣਪਛਾਤਾ ਵਿਅਕਤੀ ਦੇਖਿਆ ਗਿਆ ਹੈ। ਪੀੜਤ ਨੇ ਦੱਸਿਆ ਕਿ ਉਸ ਨੇ ਇਸ ਬਾਰੇ ਗੋਰਾਇਆ ਪੁਲਸ ਨੂੰ ਵੀ ਸੂਚਿਤ ਕੀਤਾ ਤੇ ਲਿਖਤੀ ਸ਼ਿਕਾਇਤ ਦਿੱਤੀ, ਪਰ ਪੁਲਸ ਪ੍ਰਸ਼ਾਸਨ ਵੱਲੋਂ ਉਸ ਦੀ ਕੋਈ ਸੁਣਵਾਈ ਨਹੀਂ ਕੀਤੀ ਗਈ ਅਤੇ ਮੌਕਾ ਦੇਖਣਾ ਵੀ ਪੁਲਸ ਨੇ ਮੁਨਾਸਬ ਨਹੀਂ ਸਮਝਿਆ।