ਸਾਨ ਫਰਾਂਸਿਸਕੋ, 20 ਸਤੰਬਰ (ਪੋਸਟ ਬਿਊਰੋ)- ਇਸ ਤਿੰਨ ਨਵੰਬਰ ਨੂੰ ਹੋ ਰਹੀਆਂ ਅਮਰੀਕੀ ਚੋਣਾਂ ਵਿੱਚ ਇਸ ਵਾਰ ਪੰਜਾਬੀ ਲੋਕ ਵੱਡੀ ਗਿਣਤੀ ਵਿੱਚ ਦਿਲਚਸਪੀ ਹੀ ਨਹੀਂ ਲੈ ਰਹੇ, ਸਗੋਂ ਸਰਗਰਮੀ ਨਾਲ ਉਮੀਦਵਾਰਾਂ ਵਜੋਂ ਚੋਣ ਮੈਦਾਨ ਵਿੱਚ ਵੀ ਉਤਰੇ ਹੋਏ ਹਨ। ਇਸ ਵਾਰ ਦਿਲਚਸਪ ਗੱਲ ਇਹ ਵੀ ਹੈ ਕਿ ਕੈਲੀਫੋਰਨੀਆ ਦੇ ਸ਼ਹਿਰ ਲੈਥਰੋਪ ਤੋਂ ਪੰਜਵੀਂ ਵਾਰ ਮੇਅਰ ਬਣਨ ਵਾਲੇ ਨਵਾਂ ਸ਼ਹਿਰ ਦੇ ਪਿੰਡ ਲੰਗੇਰੀ ਦੇ ਸੋਨੀ ਧਾਲੀਵਾਲ ਲਗਾਤਾਰ ਦੂਸਰੀ ਵਾਰ ਬਿਨਾਂ ਮੁਕਾਬਲਾ ਮੇਅਰ ਬਣਨ ਵਾਲੇ ਹਨ। ਮਿਲਵਰਤਨ ਪੱਖੋਂ ਤੇ ਆਪਣੀ ਕਾਰਜਸ਼ੈਲੀ ਕਰ ਕੇ ਸੋਨੀ ਧਾਲੀਵਾਲ ਦਾ ਚੰਗਾ ਅਸਰ ਰਸੂਖ ਹੈ। ਯੂਨੀਅਨ ਸਿਟੀ ਦੇ ਮੌਜੂਦਾ ਵਾਈਸ ਮੇਅਰ ਗੈਰੀ ਸਿੰਘ ਫਿਰ ਚੋਣ ਮੈਦਾਨ ਵਿੱਚ ਹਨ ਅਤੇ ਤੀਜੀ ਵਾਰ ਕੌਂਸਲ ਮੈਨ ਬਣ ਸਕਦੇ ਹਨ। ਜਲੰਧਰ ਦੇ ਸ਼ਹਿਰ ਗੁਰਾਇਆ ਨੇੜੇ ਪਿੰਡ ਬੜਾ ਪਿੰਡ ਦੇ ਇੰਜੀਨੀਅਰ ਨਰਿੰਦਰ ਸਿੰਘ ਉਰਫ ਨਿੱਕ ਸਹੋਤਾ ਸੈਲਮਾ ਯੂਨੀਫਾਈਡ ਸਕੂਲ ਬੋਰਡ ਤੋਂ ਪਹਿਲੀ ਵਾਰ ਇਸ ਚੋਣ ਮੈਦਾਨ ਵਿਚ ਹਨ। ਇਨ੍ਹਾਂ ਦੇ ਪਿਤਾ ਅਤੇ ਅਮਰੀਕਾ ਦੇ ਸਫਲ ਕਿਸਾਨ ਨਿਰਮਲ ਸਿੰਘ ਸਹੋਤਾ ਦਾ ਸੈਲਮਾ ਤੇ ਫਰਿਜ਼ਨੋ ਦਾ ਇਲਾਕੇ ਵਿੱਚ ਚੰਗਾ ਅਸਰ ਰਸੂਖ ਹੈ।
ਪੱਤਰਕਾਰੀ ਨਾਲ ਲੰਬੇ ਅਰਸੇ ਤੋਂ ਜੁੜੇ ਮਹਿੰਦਰ ਸਿੰਘ ਕੰਡਾ ਸੀਰੀਸ ਸ਼ਹਿਰ ਦੇ ਸਿਟੀ ਕੌਂਸਲ ਵਜੋਂ ਡਿਸਟ੍ਰਿਕ ਤਿੰਨ ਤੋਂ ਚੋਣ ਮੈਦਾਨ ਵਿੱਚ ਹਨ। ਅੰਮ੍ਰਿਤਸਰ ਦੇ ਬਿਕਰਮਜੀਤ ਸਿੰਘ ਵਿੱਕ ਬਾਜਵਾ ਸਿਲੀਕਾਨ ਵੈਲੀ ਦੇ ਪ੍ਰਮੁੱਖ ਸ਼ਹਿਰ ਫਰੀਮਾਂਟ ਤੋਂ ਮੇਅਰ ਵਜੋਂ ਚੋਣ ਮੈਦਾਨ ਵਿੱਚ ਹਨ ਅਤੇ ਇਨ੍ਹਾਂ ਦਿਨਾਂ ਵਿੱਚ ਕਾਫੀ ਸਰਗਰਮੀ ਨਾਲ ਆਪਣੀ ਚੋਣ ਮੁਹਿੰਮ ਚਲਾਉਣ ਲੱਗੇ ਹੋਏ ਹਨ। ਵਿਕ ਬਾਜਵਾ ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਹਨ। ਮਾਹਿਲਪੁਰ ਨੇੜਲੇ ਪਿੰਡ ਨੰਗਲ ਦੇ ਯੂਬਾ ਸਿਟੀ ਦੇ ਜ਼ਿਮੀਂਦਾਰ ਤੇ ਨੇਤਾ ਦੀਦਾਰ ਸਿੰਘ ਬੈਂਸ ਦੇ ਸਪੁੱਤਰ ਕਰਮ ਬੈਂਸ ਯੂਬਾ ਸਿਟੀ ਦੇ ਡਿਸਟ੍ਰਿਕਟ ਚਾਰ ਤੋਂ ਸੁਪਰਵਾਈਜ਼ਰ ਵਜੋਂ ਚੋਣ ਮੈਦਾਨ ਵਿੱਚ ਹਨ। ਇਹ ਪਰਵਾਰ ਲੰਬੇ ਅਰਸੇ ਤੋਂ ਸਿੱਖ ਸਿਆਸਤ ਵਿੱਚ ਹੈ, ਇਸ ਕਰ ਕੇ ਬੈਂਸ ਦੀ ਚੋਣ ਮੁਹਿੰਮ ਨੂੰ ਚੰਗਾ ਹੁਲਾਰਾ ਮਿਲ ਸਕਦਾ ਹੈ। ਇਸ ਵਾਰ ਅਮਰੀਕੀ ਚੋਣ ਮੈਦਾਨ ਵਿੱਚ ਪੰਜਾਬਣਾਂ ਵੀ ਖੁਦ ਉਮੀਦਵਾਰ ਵਜੋਂ ਉਤਸ਼ਾਹ ਨਾਲ ਚੋਣ ਸਰਗਰਮੀਆਂ ਤੇਜ਼ ਕਰ ਰਹੀਆਂ ਹਨ। ਪੰਜਾਬੀ ਭਾਈਚਾਰੇ ਨੂੰ ਉਤਸ਼ਾਹ ਜਨਕ ਹੁੰਗਾਰਾ ਮਿਲ ਸਕਦਾ ਹੈ। ਆਉਣ ਵਾਲੇ ਸਮੇਂ ਵਿੱਚ ਪੰਜਾਬੀਆਂ ਦੀ ਨਵੀਂ ਪੀੜ੍ਹੀ ਅਮਰੀਕਨ ਸਿਆਸਤ ਵੱਲ ਪ੍ਰੇਰਿਤ ਹੋ ਸਕਦੀ ਹੈ। ਯੂਨੀਅਨ ਸਿਟੀ ਦੇ ਵਾਈਸ ਮੇਅਰ ਗੈਰੀ ਸਿੰਘ ਨੇ ਇੱਕ ਮੁਲਾਕਾਤ ਵਿੱਚ ਕਿਹਾ ਕਿ ਇਹ ਬਹੁਤ ਹੀ ਖੁਸ਼ੀ ਵਾਲੀ ਗੱਲ ਹੈ ਕਿ ਵੱਡੀ ਗਿਣਤੀ ਵਿੱਚ ਪੰਜਾਬੀ ਭਾਈਚਾਰਾ ਅਮਰੀਕੀ ਸਿਆਸਤ ਵੱਲ ਪ੍ਰੇਰਿਤ ਹੋ ਰਿਹਾ ਹੈ।