ਤਾਇਪੇ, 20 ਸਤੰਬਰ (ਪੋਸਟ ਬਿਊਰੋ)- ਅਮਰੀਕਾ ਦੇ ਸਹਾਇਕ ਵਿਦੇਸ਼ ਮੰਤਰੀ ਕੀਥ ਕਰੈਚ ਦੀ ਤਾਈਵਾਨ ਯਾਤਰਾ `ਤੇ ਚੀਨ ਦੀ ਲਗਾਤਾਰ ਦੂਜੇ ਦਿਨ ਖਿਝ ਸਾਹਮਣੇ ਆਈ ਹੈ। ਕੱਲ੍ਹ ਉਸ ਦੇ 19 ਲੜਾਕੂ ਜਹਾਜ਼ ਤਾਈਵਾਨ ਦੇ ਹਵਾਈ ਖੇਤਰ ਵਿੱਚ ਦਾਖਲ ਹੋਏ। ਇਸ ਟਾਪੂ ਨੁਮਾ ਖੇਤਰ ਦੀ ਹਵਾਈ ਫੌਜ ਦੇ ਜਹਾਜ਼ਾਂ ਨੇ ਚੀਨੀ ਜਹਾਜ਼ਾਂ ਨੂੰ ਖਦੇੜ ਦਿੱਤਾ। ਚੇਤੇ ਰਹੇ ਕਿ ਬੀਜਿੰਗ ਨੇ ਸ਼ੁੱਕਰਵਾਰ ਵੀ ਇਸੇ ਤਰ੍ਹਾਂ ਹਰਕਤ ਕੀਤੀ ਸੀ, ਜਦੋਂ ਉਸ ਨੇ 18 ਫਾਈਟਰ ਜੈਟ ਭੇਜੇ ਸਨ। ਇਸ `ਤੇ ਤਾਈਵਾਨ ਸਰਕਾਰ ਨੇ ਕਿਹਾ ਸੀ ਕਿ ਚੀਨ ਤੋਂ ਹਕੀਕਤ ਵਿੱਚ ਬਹੁਤ ਖਤਰਾ ਹੈ, ਉਹ ਲਗਾਤਾਰ ਧਮਕਾ ਰਿਹਾ ਹੈ। ਉਸ ਨੇ ਇਸ ਖੁਦਮੁਖਤਾਰ ਦੀਪ ਨੂੰ ਡਰਾਉਣ ਲਈ ਹਮਲਾਵਰੀ ਨੀਤੀ ਅਪਣਾ ਰੱਖੀ ਹੈ।
ਚੀਨ ਨੇ ਕੱਲ੍ਹ ਓਦੋਂ ਲੜਾਕੂ ਜਹਾਜ਼ ਭੇਜੇ ਸਨ, ਜਦੋਂ ਕੀਥ ਆਪਣੇ ਤਿੰਨ ਰੋਜ਼ਾ ਦੌਰੇ ਦੇ ਅਖੀਰ ਵਿੱਚ ਤਾਈਵਾਨ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਮੀਟਿੰਗ ਕਰ ਰਹੇ ਸਨ। ਚੀਨ ਇਸ ਖੇਤਰ ਨੂੰ ਆਪਣਾ ਹਿੱਸਾ ਮੰਨਦਾ ਹੈ ਅਤੇ ਉਸ ਨੇ ਅਮਰੀਕਾ ਅਤੇ ਤਾਈਵਾਨ ਦੀ ਗੰਢ ਤੁੱਪ ਦੀ ਸਖਤ ਨਿੰਦਾ ਕੀਤੀ ਹੈ। ਤਾਈਵਾਨ ਦੇ ਰੱਖਿਆ ਮੰਤਰਾਲੇ ਨੇ ਦੱਸਿਆ ਕਿ ਕੱਲ੍ਹ ਦੀ ਹਰਕਤ ਵਿੱਚ 19 ਚੀਨੀ ਜਹਾਜ਼ ਸ਼ਾਮਲ ਸਨ। ਇਨ੍ਹਾਂ ਵਿੱਚ 12 ਜੇ-16, ਦੋ ਜੇ-10, ਦੋ ਜੇ-11, ਇੱਕ ਵਾਈ-8 ਪਣਡੁੱਬੀ ਰੋਕੂ ਜਹਾਜ਼ ਅਤੇ ਦੋ ਐਚ-6 ਬੰਬਾਰ ਜਹਾਜ਼ ਸ਼ਾਮਲ ਸਨ। ਇਸ ਦੇ ਜਵਾਬ ਵਿੱਚ ਤਾਈਵਾਨ ਦੀ ਹਵਾਈ ਫੌਜ ਦੇ ਲੜਾਕੂ ਜਹਾਜ਼ ਰਵਾਨਾ ਕੀਤੇ ਗਏ ਅਤੇ ਗਤੀਵਿਧੀਆਂ `ਤੇ ਨਿਗਰਾਨੀ ਲਈ ਮਿਜ਼ਾਈਲ ਰੱਖਿਆ ਪ੍ਰਣਾਲੀਆਂ ਨੂੰ ਸਰਗਰਮ ਕੀਤਾ ਗਿਆ ਸੀ। ਤਾਈਵਾਨ ਇਸ ਸਾਲ ਆਪਣੇ ਖੇਤਰ ਦੇ ਕੋਲ ਕਈ ਵਾਰ ਚੀਨੀ ਲੜਾਕੂ ਜਹਾਜ਼ਾਂ ਦੇ ਪੁੱਜਣ ਦੀ ਸ਼ਿਕਾਇਤ ਕਰ ਚੁੱਕਾ ਹੈ। ਇਨ੍ਹਾਂ ਨੂੰ ਖਦੇੜਨ ਲਈ ਐਫ-16 ਅਤੇ ਦੂਜੇ ਲੜਾਕੂ ਜਹਾਜ਼ ਰਵਾਨਾ ਕੀਤੇ ਗਏ।