ਨਿਊਯਾਰਕ, 18 ਸਤੰਬਰ (ਪੋਸਟ ਬਿਊਰੋ)- ਮਿਸ਼ੇਲਿਨ-ਸਟਾਰ ਸ਼ੈਫ ਵਿਕਾਸ ਖੰਨਾ ਨੂੰ ਕੋਵਿਡ-19 ਮਹਾਮਾਰੀ ਦੌਰਾਨ ਵੱਡੀ ਪੱਧਰ `ਤੇ ਖਾਣਾ ਵੰਡਣ ਦੀ ਮੁਹਿੰਮ ਚਲਾ ਕੇ ਭਾਰਤ `ਚ ਲੱਖਾਂ ਲੋਕਾਂ ਨੂੰ ਖਾਣਾ ਦੇਣ ਲਈ 2020 ਦੇ ਵੱਕਾਰੀ ‘ਏਸ਼ੀਆ ਗੇਮ ਚੇਂਜਰ` ਪੁਰਸਕਾਰ ਨਾਲ ਸਨਮਾਨਤ ਕੀਤਾ ਜਾਵੇਗਾ।
ਵਿਕਾਸ ਖੰਨਾ ਨੇ ਇਹ ਮੁਹਿੰਮ ਭਾਰਤ ਤੋਂ ਹਜ਼ਾਰਾਂ ਮੀਲ ਦੂਰ ਮੈਨਹਟਨ `ਚ ਆਪਣੇ ਘਰੋਂ ਚਲਾਈ ਸੀ। ਅਮਰੀਕਾ ਦੀ ਇੱਕ ਗੈਰ-ਲਾਭ ਕਾਰੀ ਸੰਸਥਾ ਨੇ ‘ਏਸ਼ੀਆ ਗੇਮ ਚੇਂਜਰ ਐਵਾਰਡਾਂ` ਦੀ ਸ਼ੁਰੂਆਤ ਕੀਤੀ ਸੀ। ਇਸ ਸੁਸਾਈਟੀ ਵੱਲੋਂ ਏਸ਼ੀਆ ਦੇ ਭਵਿੱਖ ਵਿੱਚ ਸਕਾਰਾਤਮਕ ਯੋਗਦਾਨ ਪਾਉਣ ਵਾਲੇ ਅਸਲ ਗੁਰੂਆਂ ਨੂੰ ਸਨਮਾਨਤ ਕੀਤਾ ਜਾਂਦਾ ਹੈ। ਸਾਲ 2020 ਦੇ ਇਸ ਪੁਰਸਕਾਰ ਲਈ ਕੱਲ੍ਹ ਸੁਸਾਈਟੀ ਨੇ ਜਿਨ੍ਹਾਂ ਛੇ ਸ਼ਖਸੀਅਤਾਂ ਦੇ ਨਾਵਾਂ ਦਾ ਐਲਾਨ ਕੀਤਾ, ਉਨ੍ਹਾਂ ਵਿਚੋਂ ਵਿਕਾਸ ਖੰਨਾ (48) ਇਕੱਲੇ ਭਾਰਤੀ ਹਨ। ਖੰਨਾ ਨੂੰ ਲੋੜ ਤੇ ਦੁੱਖ ਦੇ ਸਮੇਂ ਭਾਰਤ `ਚ ਲੱਖਾਂ ਲੋਕਾਂ ਤੱਕ ਹਰ ਲੋੜੀਂਦੀਆਂ ਚੀਜ਼ਾਂ ਪਹੁੰਚਾਉਣ ਲਈ ਸਨਮਾਨਤ ਕੀਤਾ ਜਾ ਰਿਹਾ ਹੈ। ਅਪ੍ਰੈਲ ਮਹੀਨੇ ਤੋਂ ਅੱਜ ਤੱਕ ਵਿਕਾਸ ਖੰਨਾ ‘ਫੀਡ ਇੰਡੀਆ` ਤਹਿਤ ਸਾਢੇ ਤਿੰਨ ਕਰੋੜ ਦਾ ਖਾਣਾ ਵੰਡ ਚੁੱਕੇ ਹਨ।
ਉਨ੍ਹਾਂ ਤੋਂ ਇਲਾਵਾ ਪ੍ਰਮੁੱਖ ਸੈਲਿਸਟ ਯੋ ਯੋ ਮਾ, ਟੈਨਿਸ ਚੈਂਪੀਅਨ ਨਾਓਮੀ ਓਸਾਕਾ, ਕੋਰੀਆ ਬੁਆਇ ਬੈਂਡ ਬੀ ਟੀ ਐਸ ਤੇ ਆਸਕਰ ਜੇਤੂ ਫਿਲਮ ‘ਪੈਰਾਸਾਈਟ` ਦੀ ਨਿਰਮਾਤਾ ਮਾਈਕੀ ਲੀ ਅਤੇ ਕਾਰੋਬਾਰੀ ਆਗੂ ਤੇ ਪਰਉਪਕਾਰੀ ਜੋਅ ਅਤੇ ਕਲਾਰਾ ਸਾਈ ਨੂੰ ਵੀ ‘ਏਸ਼ੀਆ ਗੇਮ ਚੇਂਜਰ ਪੁਰਸਕਾਰ` ਨਾਲ ਸਨਮਾਨਿਆ ਜਾਵੇਗਾ। ਇਸ ਬਾਰੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਖੰਨਾ ਨੇ ਕਿਹਾ ਕਿ ਉਹ ਏਸ਼ੀਆਈ ਸਭਿਆਚਾਰ ਨੂੰ ਪ੍ਰੋਮੋਟ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾ ਰਹੀ ਐਨੀ ਮਸ਼ਹੂਰ ਸੰਸਥਾ ਤੋਂ ਸਨਮਾਨ ਹਾਸਲ ਕਰ ਕੇ ਨਿਮਰ ਮਹਿਸੂਸ ਕਰ ਰਹੇ ਹਨ।