ਜਲੰਧਰ, 17 ਸਤੰਬਰ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੇ ਗੋਪਾਲ ਨਗਰ ਦੇ ਇੱਕ ਨੌਜਵਾਨ ਦੇ ਨਾਲ ਆਨਲਾਈਨ ਠੱਗੀ ਕਰ ਕੇ ਜਆਲਸਾਜ਼ ਨੇ ਉਸ ਦੇ ਅਕਾਊਂਟ ਵਿੱਚ 42,359 ਰੁਪਏ ਕਢਵਾ ਲਏ ਹਨ। ਪੀੜਤ ਰੋਹਿਤ ਕੁਮਾਰ ਨੇ ਪੁਲਸ ਕਮਿਸ਼ਨਰ ਨੂੰ ਸ਼ਿਕਾਇਤ ਦਿੱਤੀ ਤੇ ਕਮਿਸ਼ਨਰ ਨੇ ਸਾਈਬਰ ਸੈਲ ਥਾਣਾ ਦੋ ਦੀ ਪੁਲਸ ਨੂੰ ਮਾਰਕ ਕੀਤੀ ਹੈ।
ਰੋਹਿਤ ਕੁਮਾਰ ਨੇ ਦੱਸਿਆ ਕਿ 10 ਸਤੰਬਰ ਨੂੰ ਉਨ੍ਹਾਂ ਆਪਣੇ ਕਿਸੇ ਦੋਸਤ ਨੂੰ 1500 ਰੁਪਏ ਫੋਨ-ਪੇ ਦੇ ਰਾਹੀਂ ਭੇਜੇ ਸਨ, ਪਰ ਪੈਸੇ ਉਸ ਨੂੰ ਨਹੀਂ ਮਿਲੇ। 13 ਸਤੰਬਰ ਨੂੰ ਫੋਨ-ਪੇ ਦੀ ਹੈਲਪਲਾਈਨ ਨੂੰ ਕਾਲ ਕੀਤੀ ਤਾਂ ਕਿਸੇ ਨੇ ਕਾਲ ਰਿਸੀਵ ਨਹੀਂ ਕੀਤੀ। ਫਿਰ ਕਾਲ ਆਈ ਤਾਂ ਜਾਅਲਸਾਜ਼ ਨੇ ਉਨ੍ਹਾਂ ਨੂੰ ਅਕਾਊਂਟ ਦੀ ਡਿਟੇਲ ਦਿੱਤੀ। ਜਦੋਂ ਉਨ੍ਹਾਂ ਨੇ ਓ ਕੇ ਕੀਤਾ ਤਾਂ ਉਸੇ ਸਮੇਂ ਅਕਾਊਂਟ ਤੋਂ 42,359 ਰੁਪਏ ਨਿਕਲ ਗਏ। ਉਸ ਪਿੱਛੋਂ ਉਸ ਨੰਬਰ `ਤੇ ਗੱਲ ਨਹੀਂ ਹੋ ਸਕੀ। ਕੁਝ ਦੇਰ ਬਾਅਦ ਜਾਅਲਸਾਜ਼ ਨੇ ਕਿਹਾ ਕਿ ਤੁਸੀਂ ਅਕਾਊਂਟ ਵਿੱਚ 53 ਹਜ਼ਾਰ ਰੁਪਏ ਹੋਰ ਪਾ ਦਿਓ ਤਾਂ ਸਾਰੀ ਰਕਮ ਵਾਪਸ ਆ ਜਾਏਗੀ। ਉਨ੍ਹਾਂ ਨੇ ਇਸ ਦੀ ਸ਼ਿਕਾਇਤ ਪੁਲਸ ਨੂੰ ਦੇ ਦਿੱਤੀ। ਵਰਨਣ ਯੋਗ ਹੈ ਕਿ ਸੋਸ਼ਲ ਮੀਡੀਆ ਤੋਂ ਜਾਅਲਸਾਜ਼ ਆਪਣੀ ਐਡ ਬਣਾ ਕੇ ਲਾ ਦਿੰਦੇ ਹਨ। ਜਦ ਕੋਈ ਵਿਅਕਤੀ ਹੈਲਪ ਲਾਈਨ ਜਾਂ ਕਸਟਮਰ ਕੇਅਰ ਦਾ ਨੰਬਰ ਲੱਭਦਾ ਹੈ ਤਾਂ ਫੇਕ ਆਈ ਡੀ ਵਾਲੇ ਨੰਬਰ ਮਿਲ ਜਾਂਦੇ ਹਨ। ਉਥੇ ਕਾਲ ਕਰਦੇ ਸਾਰ ਲੋਕ ਉਨ੍ਹਾਂ ਦੀ ਚੁੰਗਲ ਵਿੱਚ ਫਸ ਜਾਂਦੇ ਹਨ।