ਵਾਸ਼ਿੰਗਟਨ, 17 ਸਤੰਬਰ (ਪੋਸਟ ਬਿਊਰੋ)- ਪਿਛਲੇ ਸਾਲ ਦੋ ਵੱਡੇ ਹਾਦਸਿਆਂ ਦੇ ਬਾਅਦ ਨਿਸ਼ਾਨੇ ਉੱਤੇ ਆਈ 737 ਮੈਕਸ ਜਹਾਜ਼ਾਂ ਦੀ ਨਿਰਮਾਤਾ ਕੰਪਨੀ ਬੋਇੰਗ ਇੱਕ ਵਾਰ ਫਿਰ ਸਵਾਲਾਂ ਦੇ ਘੇਰੇ ਵਿੱਚ ਆ ਗਈ ਹੈ।
ਯੂ ਐਸ ਹਾਊਸ ਆਫ ਰਿਪ੍ਰੇਜੈਟੇਟਿਵ ਟ੍ਰਾਂਸਪੋਰਟ ਕਮੇਟੀ (ਯੂ ਐਸ ਐਚ ਆਰ ਟੀ ਸੀ) ਨੇ ਬੋਇੰਗ 737 ਮੈਕਸ ਹਾਦਸੇ ਬਾਰੇ ਨਵੀਂ ਰਿਪੋਰਟ ਪੇਸ਼ ਕੀਤੀ ਹੈ, ਜਿਸ ਵਿੱਚ ਦਾਅਵਾ ਕੀਤਾ ਗਿਆ ਕਿ ਕੰਪਨੀ ਨੇ ਬੋਇੰਗ ਡਿਜ਼ਾਈਨ ਦੀਆਂ ਖਾਮੀਆਂ ਨੂੰ ਲੁਕਾ ਕੇ ਰੱਖਿਆ ਅਤੇ ਪਾਇਲਟਾਂ ਅਤੇ ਪਾਲਸੀ ਮੇਕਰਾਂ ਨੇ ਉਸ ਦਾ ਸਾਥ ਦਿੱਤਾ ਸੀ। ਕਮੇਟੀ ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਜਹਾਜ਼ ਦੇ ਡਿਜ਼ਾਈਨ ਵਿੱਚ ਕੁਝ ਵੱਡੇ ਤਕਨੀਕੀ ਨੁਕਸ ਸਨ, ਜਿਸ ਬਾਰੇ ਕੰਪਨੀ ਨੇ ਫਿਰ ਵੀ 737 ਮੈਕਸ ਦੀਆਂ ਉਡਾਣਾਂ ਜਾਰੀ ਰੱਖੀਆਂ। ਇਹੋ ਕਾਰਨ ਸੀ ਕਿ ਇੰਡੋਨੇਸ਼ੀਆ ਅਤੇ ਇਥੋਪੀਆ ਵਰਗੇ ਦੋ ਵੱਡੇ ਹਾਦਸੇ ਹੋਏ। ਰਿਪੋਰਟ ਦੇ ਅਨੁਸਾਰ ਇਨ੍ਹਾਂ ਹਾਦਸਿਆਂ ਪਿੱਛੋਂ ਵੀ ਬੋਇੰਗ ਕੰਪਨੀ ਨੇ ਸਬਕ ਨਹੀਂ ਸੀ ਸਿੱਖਿਆ ਅਤੇ ਗਲਤੀਆਂ ਕੀਤੀਆਂ। ਰਿਪੋਰਟ ਵਿੱਚ ਪਤਾ ਲੱਗਾ ਹੈ ਕਿ ਦੁਨੀਆ ਦੀ ਸਭ ਤੋਂ ਵੱਡੀ ਅਮਰੀਕੀ ਜਹਾਜ਼ ਨਿਰਮਾਤਾ ਕੰਪਨੀ ਨੇ ਬੋਇੰਗ ਦੇ ਨਵੇਂ ਡਿਜ਼ਾਈਨ ਵਿੱਚ ਖਾਮੀਆਂ ਨੂੰ ਨਜ਼ਰ ਅੰਦਾਜ਼ ਕੀਤਾ ਸੀ। ਇਸ ਰਿਪੋਰਟ ਵਿੱਚ ਇਹ ਵੀ ਦੋਸ਼ ਲਾਇਆ ਗਿਆ ਕਿ ਪਾਇਲਟਾਂ ਆਦਿ ਨੇ ਵੀ ਕੰਪਨੀ ਨੂੰ ਖੁਸ਼ ਕਰਨ ਦੇ ਲਈ ਇਨ੍ਹਾਂ ਗਲਤੀਆਂ `ਤੇ ਪਰਦਾ ਪਾ ਦਿੱਤਾ।
ਵਰਨਣ ਯੋਗ ਹੈ ਕਿ ਪਿਛਲੇ ਸਾਲ 29 ਅਕਤੂਬਰ ਨੂੰ ਬੋਇੰਗ 737 ਮੈਕਸ ਦੁਰਘਟਨਾ ਗ੍ਰਸਤ ਹੋ ਗਿਆ ਸੀ ਜਿਸ ਨਾਲ ਜਹਾਜ਼ ਵਿੱਚ ਸਵਾਰ ਸਾਰੇ 189 ਲੋਕਾਂ ਦੀ ਮੌਤ ਹੋ ਗਈ ਸੀ। ਇਸ ਤੋਂ ਪਹਿਲਾਂ ਮਾਰਚ 2019 ਵਿੱਚ ਬੋਇੰਗ ਦਾ ਇੱਕ ਮੈਕਸ ਜਹਾਜ਼ ਇਥੋਪੀਆ ਵਿੱਚ ਹਾਦਸੇ ਦਾ ਸ਼ਿਕਾਰ ਹੋਇਆ ਤੇ ਇਸ ਵਿੱਚ 157 ਲੋਕਾਂ ਦੀ ਮੌਤ ਹੋਈ ਸੀ। ਇਨ੍ਹਾਂ ਦੋ ਹਾਦਸਿਆਂ ਪਿੱਛੋਂ ਦੁਨੀਆ ਭਰ ਵਿੱਚ ਬੋਇੰਗ ਦੇ 737 ਮੈਕਸ ਜਹਾਜ਼ਾਂ ਦੀਆਂ ਉਡਾਣਾਂ ਬੰਦ ਕੀਤੀਆਂ ਗਈਆਂ ਸਨ।