ਓਟਵਾ, 17 ਸਤੰਬਰ (ਪੋਸਟ ਬਿਊਰੋ) : ਚੀਨ ਦੀ ਟੈਲੀਕੌਮ ਕੰਪਨੀ ਹੁਆਵੇ ਆਪਣੀ 5ਜੀ ਟੈਕਨਾਲੋਜੀਜ਼ ਲਈ ਕੈਨੇਡੀਅਨ ਮਾਰਕਿਟ ਵਿੱਚ ਹੀ ਰਹਿਣਾ ਚਾਹੁੰਦੀ ਹੈ| ਇਸ ਦੇ ਨਾਲ ਹੀ ਕੰਪਨੀ ਇਹ ਭਰੋਸਾ ਵੀ ਦੇਣਾ ਚਾਹੁੰਦੀ ਹੈ ਕਿ ਉਸ ਵੱਲੋਂ ਆਪਣੇ ਇਸ ਸਿਸਟਮ ਦੀ ਵਰਤੋਂ ਜਾਸੂਸੀ ਕਰਨ ਲਈ ਨਹੀਂ ਕੀਤੀ ਜਾਵੇਗੀ|
ਹੁਆਵੇ ਕੈਨੇਡਾ ਦਾ ਤਾਂ ਇੱਥੋਂ ਤੱਕ ਕਹਿਣਾ ਹੈ ਕਿ ਉਹ ਜਾਸੂਸੀ ਨਾ ਕਰਨ ਲਈ ਲੀਗਲ ਪਲੈੱਜ ਤੱਕ ਕਰਨ ਲਈ ਤਿਆਰ ਹੈ| ਗਲੋਬ ਐਂਡ ਮੇਲ ਵੱਲੋਂ ਹਾਸਲ ਕੀਤੇ ਗਏ ਦਸਤਾਵੇਜ਼ਾਂ ਅਨੁਸਾਰ ਇੱਕ ਖਾਸ ਪ੍ਰਕਿਰਿਆ ਰਾਹੀਂ ਟੈਕ ਕੰਪਨੀ ਵੱਲੋਂ ਇਹ ਸਿੱਧ ਕਰਨ ਦੀ ਪੇਸ਼ਕਸ਼ ਕੀਤੀ ਜਾ ਰਹੀ ਹੈ ਕਿ ਉਸ ਦੇ ਸਾਜੋæ ਸਮਾਨ ਵਿੱਚ ਜਾਸੂਸੀ ਕਰਨ ਵਾਲੀ ਕੋਈ ਚੋਰ ਮੋਰੀ ਨਹੀਂ ਹੈ|
ਗਲੋਬ ਐਂਡ ਮੇਲ ਦਾ ਕਹਿਣਾ ਹੈ ਕਿ ਕੰਪਨੀ ਵੱਲੋਂ ਇਸ ਵਾਅਦੇ ਦੀ ਫੈਡਰਲ ਸਰਕਾਰ ਨੂੰ ਰਸਮੀ ਤੌਰ ਉੱਤੇ ਕੋਈ ਪੇਸ਼ਕਸ਼ ਤਾਂ ਨਹੀਂ ਕੀਤੀ ਗਈ ਪਰ ਇਹ ਵਚਨਬੱਧਤਾ ਜ਼ਰੂਰ ਦਰਸਾਈ ਗਈ ਹੈ ਕਿ ਚੀਨ ਦੀਆਂ ਸਕਿਊਰਿਟੀ ਏਜੰਸੀਜ਼ ਵੱਲੋਂ ਕੀਤੀ ਜਾਣ ਵਾਲੀ ਬੇਨਤੀ ਨੂੰ ਰੱਦ ਕੀਤਾ ਜਾਵੇਗਾ| ਇੱਥੇ ਦੱਸਣਾ ਬਣਦਾ ਹੈ ਕਿ ਤਥਾ ਕਥਿਤ ਫਾਈਵ ਆਈਜ਼ ਗੱਠਜੋੜ ਵਿੱਚ ਕੈਨੇਡਾ ਹੀ ਅਜਿਹਾ ਹੈ ਜਿਸਨੇ ਹੁਆਵੇ ਉੱਤੇ 5ਜੀ ਤਕਨਾਲੋਜੀ ਲਈ ਪਾਬੰਦੀ ਨਹੀਂ ਲਾਈ ਜਦਕਿ ਅਮਰੀਕਾ, ਯੂਕੇ ਤੇ ਆਸਟਰੇਲੀਆ ਅਜਿਹਾ ਕਰ ਚੁੱਕੇ ਹਨ|
ਹਾਲਾਂਕਿ ਟਰੂਡੋ ਸਰਕਾਰ ਵੱਲੋਂ ਇਸ ਬਾਰੇ ਕੋਈ ਫੈਸਲਾ ਨਹੀਂ ਦਿੱਤਾ ਗਿਆ ਹੈ ਪਰ ਤਿੰਨ ਵੱਡੀਆਂ ਕੈਨੇਡੀਅਨ ਟੈਲੀਕੌਮ ਸਰਵਿਸ ਪ੍ਰੋਵਾਈਡਰ ਕੰਪਨੀਆਂ ਪਹਿਲਾਂ ਹੀ ਆਪਣੇ ਹੋਰ 5ਜੀ ਭਾਈਵਾਲਾਂ ਦੀ ਚੋਣ ਕਰ ਚੁੱਕੀਆਂ ਹਨ|