ਟੋਰਾਂਟੋ, 17 ਸਤੰਬਰ (ਪੋਸਟ ਬਿਊਰੋ) : ਦੇਸ਼ ਭਰ ਵਿੱਚ ਕੋਵਿਡ-19 ਟੈਸਟਿੰਗ ਸੈਂਟਰਜ਼ ਦੇ ਬਾਹਰ ਲੱਗਣ ਵਾਲੀਆਂ ਲਾਈਨਾਂ ਦਿਨੋਂ ਦਿਨ ਲੰਮੀਆਂ ਹੀ ਹੁੰਦੀਆਂ ਜਾ ਰਹੀਆਂ ਹਨ ਤੇ ਇਸ ਦੌਰਾਨ ਫੈਡਰਲ ਸਰਕਾਰ ਵੱਲੋਂ ਫੰਡਾਂ ਦੇ ਰੂਪ ਵਿੱਚ ਕਈ ਬਿਲੀਅਨ ਡਾਲਰ ਹੋਰ ਦੇਣ ਤੇ ਮਹਾਂਮਾਰੀ ਸਬੰਧੀ ਮਾਪਦੰਡਾਂ ਵਿੱਚ ਸੁਧਾਰ ਕਰਨ ਦਾ ਤਹੱਈਆ ਪ੍ਰਗਟਾਇਆ ਜਾ ਰਿਹਾ ਹੈ|
ਕੱਲ੍ਹ 19 ਬਿਲੀਅਨ ਡਾਲਰ ਦੇ ਸੇਫ ਰੀਸਟਾਰਟ ਅਗਰੀਮੈਂਟ ਦਾ ਫੈਡਰਲ ਸਰਕਾਰ ਵੱਲੋਂ ਐਲਾਨ ਕੀਤਾ ਗਿਆ| ਇਸ ਰਕਮ ਨੂੰ ਕੋਵਿਡ-19 ਟੈਸਟਿੰਗ ਤੇ ਕਾਂਟੈਕਟ ਟਰੇਸਿੰਗ, ਪ੍ਰੋਵਿੰਸ਼ੀਅਲ ਹੈਲਥ ਕੇਅਰ ਸਿਸਟਮ ਦੀ ਸਮਰੱਥਾ ਵਿੱਚ ਸੁਧਾਰ ਕਰਨ, ਪਬਲਿਕ ਟਰਾਂਜ਼ਿਟ ਵਰਗੀਆਂ ਲੋੜੀਂਦੀਆਂ ਸਰਵਿਸਿਜ਼ ਨੂੰ ਮੁੜ ਸ਼ੁਰੂ ਕਰਨ ਤੇ ਹੋਰ ਕਈ ਤਰ੍ਹਾਂ ਦੇ ਬੈਨੇਫਿਟ ਮੁਹੱਈਆ ਕਰਵਾਉਣ ਵਾਲੇ ਪਾਸੇ ਲਾਇਆ ਜਾਵੇਗਾ|
ਇਹ ਐਲਾਨ ਉਸ ਸਮੇਂ ਕੀਤਾ ਗਿਆ ਜਦੋਂ ਦੇਸ਼ ਭਰ ਦੇ ਟੈਸਟਿੰਗ ਸੈਂਟਰਾਂ ਉੱਤੇ ਟੈਸਟ ਕਰਵਾਉਣ ਵਾਲਿਆਂ ਦੀਆਂ ਲੰਮੀਆਂ ਲਾਈਨਾਂ ਬਾਰੇ ਰਿਪੋਰਟ ਕੀਤਾ ਗਿਆ| ਫੈਡਰਲ ਪਬਲਿਕ ਹੈਲਥ ਅਧਿਕਾਰੀਆਂ ਨੇ ਦੱਸਿਆ ਕਿ ਵੀਕੈਂਡ ਉੱਤੇ ਟੈਸਟਿੰਗ ਸਾਈਟਸ ਉੱਤੇ ਟੈਸਟ ਕਰਵਾਉਣ ਵਾਲਿਆਂ ਦੀ ਗਿਣਤੀ ਵਿੱਚ ਕਾਫੀ ਵਾਧਾ ਹੋਇਆ, ਇੱਥੋਂ ਤੱਕ ਕਿ ਕਈ ਲੋਕਾਂ ਨੂੰ ਮੁੜਨਾ ਵੀ ਪਿਆ|
ਲੰਡਨ, ਓਨਟਾਰੀਓ ਵਿੱਚ ਦੋ ਟੈਸਟਿੰਗ ਸਾਈਟਸ ਉੱਤੇ ਵੱਡੀਆਂ ਲਾਈਨਾਂ ਵੇਖਣ ਨੂੰ ਮਿਲੀਆਂ ਜਦਕਿ ਓਟਵਾ ਦੇ ਟੈਸਟਿੰਗ ਸੈਂਟਰ ਵਿੱਚ ਤਾਂ ਉਡੀਕ ਸਮਾਂ ਹੀ ਛੇ ਘੰਟਿਆਂ ਦਾ ਸੀ| ਨੋਵਾ ਸਕੋਸ਼ੀਆ ਵਿੱਚ ਪ੍ਰੋਵਿੰਸ਼ੀਅਲ ਐਨਡੀਪੀ ਵੱਲੋਂ ਵਿਦਿਆਰਥੀਆਂ ਤੇ ਅਧਿਆਪਕਾਂ ਲਈ ਕੋਵਿਡ-19 ਟੈਸਟਿੰਗ ਨੂੰ ਫਾਸਟ ਟਰੈਕ ਕਰਨ ਦੀ ਮੰਗ ਕੀਤੀ ਗਈ| ਮਾਪਿਆਂ ਵੱਲੋਂ ਇਹ ਸ਼ਿਕਾਇਤ ਕੀਤੀ ਗਈ ਕਿ ਆਪਣੇ ਬੱਚਿਆਂ ਦੇ ਟੈਸਟ ਨਤੀਜਿਆਂ ਲਈ ਉਹ ਬਹੁਤੀ ਉਡੀਕ ਨਹੀਂ ਕਰ ਸਕਦੇ|
ਇਸ ਦੌਰਾਨ ਐਡਮੰਟਨ ਤੇ ਲਵਲ, ਕਿਊਬਿਕ ਵਿੱਚ ਨਵੇਂ ਟੈਸਟਿੰਗ ਸੈਂਟਰ ਪਿੱਛੇ ਜਿਹੇ ਖੋਲ੍ਹੇ ਗਏ ਹਨ ਤੇ ਇੱਕ ਹੋਰ ਸੈਂਟਰ ਬਰੈਂਪਟਨ, ਓਨਟਾਰੀਓ ਵਿੱਚ ਜਲਦ ਖੁੱਲ੍ਹਣ ਜਾ ਰਿਹਾ ਹੈ|