ਐਕਟਿੰਗ ਦੇ ਨਾਲ ਗਾਇਕੀ ਦੁਨੀਆ ਵਿੱਚ ਵੀ ਕਦਮ ਰੱਖ ਰਹੇ ਟਾਈਗਰ ਸ਼ਰਾਫ ਦੇ ਪਹਿਲੇ ਗਾਣੇ ਦੀ ਰਿਲੀਜ਼ ਡੇਟ ਸਾਹਮਣੇ ਆ ਗਈ ਹੈ। ਉਨ੍ਹਾਂ ਦਾ ਪਹਿਲਾ ਮਿਊਜ਼ਿਕ ਵੀਡੀਓ ‘ਅਨਬਿਲੀਵਲਬ’ 22 ਸਤੰਬਰ ਨੂੰ ਰਿਲੀਜ਼ ਹੋਵੇਗਾ। ਇਸ ਮਿਊਜ਼ਿਕ ਵੀਡੀਓ ਦੇ ਟੀਜਰ ਦੇ ਨਾਲ ਇੰਸਟਾਗ੍ਰਾਮ 'ਤੇ ਇਸ ਦੀ ਰਿਲੀਜ਼ ਡੇਟ ਜਨਤਕ ਕਰਦੇ ਹੋਏ ਟਾਈਗਰ ਨੇ ਲਿਖਿਆ, ‘‘ਦੋਸਤੋ ਪੇਸ਼ ਹੈ ਮੇਰੇ ਪਹਿਲੇ ਗਾਣੇ ਦਾ ਟੀਜ਼ਰ, ਉਮੀਦ ਹੈ ਤੁਹਾਨੂੰ ਇਹ ਪਸੰਦ ਆਏਗਾ ਅਤੇ ਮੈਂ ਤੁਹਾਨੂੰ ਸਿਰਫ ਇਹੀ ਕਹਿਣਾ ਚਾਹਾਂਗਾ ਕਿ ਯੂ ਆਰ ਅਨਬਿਲੀਵਲਬ।” ਟੀਜਰ ਵਿੱਚ ਟਾਈਗਰ ਕਿਸੇ ਇਮਾਰਤ ਦੀ ਛੱਤ 'ਤੇ ਹੱਥ ਵਿੱਚ ਮਾਈਕ ਫੜੀ ਗਾਣਾ ਗਾਉਂਦੇ ਹੋਏ ਨਜ਼ਰ ਆ ਰਹੇ ਹਨ।
ਦੱਸਣਾ ਬਣਦਾ ਹੈ ਕਿ ਇਸ ਗਾਣੇ ਦੀ ਕਲਪਨਾ ਟਾਈਗਰ ਨੇ ਖੁਦ ਲਾਕਡਾਊਨ ਦੌਰਾਨ ਕੀਤੀ। ਇਸ ਮਿਊਜ਼ਿਕ ਵੀਡੀਓ ਵਿੱਚ ਗਾਣੇ ਦੇ ਨਾਲ-ਨਾਲ ਪ੍ਰਸ਼ੰਸਕਾਂ ਨੂੰ ਉਸ ਦਾ ਡਾਂਸ ਵੀ ਦੇਖਣ ਨੂੰ ਮਿਲੇਗਾ। ਬਿੱਗ ਬੈਂਗ ਮਿਊਜ਼ਿਕ ਲੇਬਲ ਦੇ ਤਹਿਤ ਬਣੇ ਇਸ ਮਿਊਜ਼ਿਕ ਵੀਡੀਓ ਨੂੰ ‘ਸਟੂਡੈਂਟ ਆਫ ਦਿ ਈਅਰ 2’ ਦੇ ਡਾਇਰੈਕਟਰ ਪੁਨੀਤ ਮਲਹੋਤਰਾ ਨੇ ਨਿਰਦੇਸ਼ਤ ਕੀਤਾ ਹੈ। ਟਾਈਗਰ ਸ਼ਰਾਫ ਫਿਲਮ ‘ਹੀਰੋਪੰਤੀ 2’ ਵਿੱਚ ਨਜ਼ਰ ਆਉਣਗੇ।