ਓਟਵਾ, 16 ਸਤੰਬਰ (ਪੋਸਟ ਬਿਊਰੋ) : ਮੈਂਬਰ ਪਾਰਲੀਆਮੈਂਟ ਰਹਿੰਦਿਆਂ ਹਾਸਲ ਹੋਏ 6 ਮਿਲੀਅਨ ਡਾਲਰ ਬਾਰੇ ਸਾਬਕਾ ਲਿਬਰਲ ਐਮਪੀ ਰਾਜ ਗਰੇਵਾਲ ਵੱਲੋਂ ਐਥਿਕਸ ਕਮਿਸ਼ਨਰ ਨੂੰ ਸੂਹ ਤੱਕ ਨਹੀਂ ਸੀ ਕੱਢੀ ਗਈ| ਇਹ ਜਾਣਕਾਰੀ ਨਵੇਂ ਦਸਤਾਵੇਜ਼ਾਂ ਤੋਂ ਹਾਸਲ ਹੋਈ|
ਇਨ੍ਹਾਂ ਦਸਤਾਵੇਜ਼ਾਂ ਤੋਂ ਇਹ ਵੀ ਪਤਾ ਲੱਗਿਆ ਹੈ ਕਿ ਗਰੇਵਾਲ ਉੱਤੇ ਇਹ ਦੋਸ਼ ਵੀ ਹੈ ਕਿ ਉਨ੍ਹਾਂ ਆਪਣੇ ਪਾਰਲੀਆਮੈਂਟਰੀ ਕੌਂਸਟੀਚੁਐਂਸੀ ਆਫਿਸ ਵਿੱਚ ਤਾਇਨਾਤ ਕਰਮਚਾਰੀ ਨਾਲ 5000 ਡਾਲਰ ਤੋਂ ਵੱਧ ਦੀ ਠੱਗੀ ਵੀ ਮਾਰੀ| ਦਸਤਾਵੇਜ਼ਾਂ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਗਰੇਵਾਲ ਨੇ ਮੈਂਬਰ ਪਾਰਲੀਆਮੈਂਟ ਰਹਿੰਦਿਆਂ ਆਪਣੇ ਕੰਮ ਦਾ ਹਵਾਲਾ ਦੇ ਕੇ ਧੋਖੇ ਨਾਲ, ਝੂਠ ਬੋਲਕੇ ਜਾਂ ਫਰਾਡ ਰਾਹੀਂ ਇਹ ਫੰਡ ਮੰਗੇ| ਇਹ ਫੰਡ ਉਨ੍ਹਾਂ ਆਪਣੇ ਨਿਜੀ ਫਾਇਦੇ ਲਈ ਵਰਤੇ|
ਇਹ ਵੀ ਆਖਿਆ ਗਿਆ ਕਿ ਗਰੇਵਾਲ ਨੇ ਆਪਣੇ ਹਲਕਾ ਆਫਿਸ ਬਜਟ ਨੂੰ ਵੀ ਨਿਜੀ ਫਾਇਦੇ ਲਈ ਵਰਤਿਆ| ਜ਼ਿਕਰਯੋਗ ਹੈ ਕਿ ਪਿਛਲੇ ਹਫਤੇ ਆਰਸੀਐਮਪੀ ਨੇ ਇਹ ਐਲਾਨ ਕੀਤਾ ਸੀ ਕਿ ਉਨ੍ਹਾਂ ਵੱਲੋਂ ਗਰੇਵਾਲ ਨੂੰ ਬ੍ਰੀਚ ਆਫ ਟਰੱਸਟ ਦੇ ਚਾਰ ਮਾਮਲਿਆਂ ਤੇ 5000 ਡਾਲਰ ਤੋਂ ਉੱਪਰ ਦਾ ਫਰਾਡ ਕਰਨ ਦੇ ਸਬੰਧ ਵਿੱਚ ਚਾਰਜ ਕੀਤਾ ਹੈ| ਇਸ ਦੌਰਾਨ ਗਰੇਵਾਲ ਦੀ ਨੁਮਾਇੰਦਗੀ ਕਰਨ ਵਾਲੀ ਫਰਮ ਸਟਾਕਵੁੱਡਜ਼ ਐਲਐਲਪੀ ਵੱਲੋਂ ਇਨ੍ਹਾਂ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਗਿਆ ਹੈ|
ਸਟਾਕਵੁੱਡਜ਼ ਦੇ ਵਕੀਲ ਨਾਦਰ ਹਸਨ ਨੇ ਇੱਕ ਬਿਆਨ ਜਾਰੀ ਕਰਕੇ ਆਖਿਆ ਕਿ ਗਰੇਵਾਲ ਵੱਲੋਂ ਸ਼ੁਰੂ ਤੋਂ ਹੀ ਇਨ੍ਹਾਂ ਦੋਸ਼ਾਂ ਤੋਂ ਇਨਕਾਰ ਕੀਤਾ ਜਾ ਰਿਹਾ ਹੈ| ਉਹ ਜਲਦ ਤੋਂ ਜਲਦ ਅਦਾਲਤ ਸਾਹਮਣੇ ਪੇਸ਼ ਹੋ ਕੇ ਆਪਣੇ ਨਾਂ ਨਾਲ ਲੱਗਿਆ ਇਹ ਦਾਗ ਸਾਫ ਕਰਨਾ ਚਾਹੁੰਦੇ ਹਨ| ਗਰੇਵਾਲ 6 ਅਕਤੂਬਰ ਨੂੰ ਅਦਾਲਤ ਸਾਹਮਣੇ ਪੇਸ਼ ਹੋ ਕੇ ਆਪਣਾ ਪੱਖ ਰੱਖਣਗੇ|