ਲੰਡਨ, 16 ਸਤੰਬਰ (ਪੋਸਟ ਬਿਊਰੋ)- ਤਾਮਿਲ ਨਾਡੂ ਦੇ ਇੱਕ ਮੰਦਰ ਵਿੱਚੋਂ ਕਈ ਸਾਲ ਪਹਿਲਾਂ ਚੁਰਾਈਆਂ ਭਗਵਾਨ ਰਾਮ, ਲਕਸ਼ਮਣ ਅਤੇ ਸੀਤਾ ਦੀ ਮੂਰਤੀਆਂ ਨੂੰ ਭਾਰਤ ਸਰਕਾਰ ਨੂੰ ਵਾਪਸ ਦੇ ਦਿੱਤਾ ਗਿਆ। ਇਨ੍ਹਾਂ ਮੂਰਤੀਆਂ ਦੇ ਅਸਲ ਇਤਿਹਾਸ ਅਤੇ ਮਹੱਤਵ ਨੂੰ ਜਾਨਣ ਪਿੱਛੋਂ ਇੱਕ ਸੰਗ੍ਰਹਿ ਕਰਤਾ ਨੇ ਖੁਦ ਇਨ੍ਹਾਂ ਮੂਰਤੀਆਂ ਨੂੰ ਵਾਪਸ ਕਰਨ ਦੀ ਪੇਸ਼ਕਸ਼ ਕੀਤੀ ਸੀ। ਇਨ੍ਹਾਂ ਮੂਰਤੀਆਂ ਦੀ ਚੋਰੀ 1978 ਵਿੱਚ ਹੋਈ ਸੀ, ਜਿਸ ਦੇ ਬਾਅਦ ਤਮਿਲ ਨਾਡੂ ਪੁਲਸ ਨੇ ਲੰਡਨ ਦੀ ਮੈਟ੍ਰੋਪੋਲਿਟਨ ਪੁਲਸ ਦੇ ਨਾਲ ਮਿਲ ਕੇ ਜਾਂਚ ਸ਼ੁਰੂ ਕੀਤੀ ਸੀ।
ਇੱਕ ਅਣਪਛਾਤੇ ਸੰਗ੍ਰਹਿ ਕਰਤਾ ਨੇ ਮੂਰਤੀਆਂ ਨੂੰ ਖ਼ਰੀਦਿਆ ਸੀ, ਜਿਸ ਨੇ ਮੈਟ੍ਰੋਪੋਲੀਟਨ ਪੁਲਸ ਨੂੰ ਇਸ ਘਟਨਾ ਦੀ ਜਾਣਕਾਰੀ ਦਿੱਤੀ ਸੀ। ਸੰਨ 1950 ਵਿੱਚ ਖਿੱਚੇ ਗਏ ਮੂਰਤੀਆਂ ਦੇ ਚਿੱਤਰਾਂ ਨਾਲ ਮਿਲਾਣ ਕਰਨ ਪਿੱਛੋਂ ਪਤਾ ਲੱਗਾ ਕਿ ਇਹ ਵਿਜੈ ਨਗਰ ਕਾਲ ਦੀਆਂ ਉਹੀ ਮੂਰਤੀਆਂ ਹਨ, ਜਿਨ੍ਹਾਂ ਨੂੰ ਤਾਮਿਲ ਨਾਡੂ ਦੇ ਨਾਗਪਟਨਮ ਜ਼ਿਲ੍ਹੇ ਵਿਚਲੇ ਅਨੰਤ ਮੰਗਲਮ ਵਿੱਚ ਸ਼੍ਰੀ ਰਾਜ ਗੋਪਾਲ ਸਵਾਮੀ ਮੰਦਰ ਤੋਂ ਚੁਰਾਇਆ ਗਿਆ ਸੀ। ਲੰਡਨ ਵਿੱਚ ਇੰਡੀਆ ਹਾਊਸ ਵਿੱਚ ਇੱਕ ਸਮਾਰੋਹ ਵਿੱਚ ਕੋਵਿਡ-19 ਦੇ ਚੱਲਦੇ ਥੋੜ੍ਹੇ ਜਿਹੇ ਮਹਿਮਾਨ ਸੱਦੇ ਗਏ ਸਨ ਅਤੇ ਲੰਡਨ ਸਥਿਤ ਸ਼੍ਰੀ ਮੁਰੂਗਨ ਮੰਦਰ ਦੇ ਪੁਜਾਰੀਆਂ ਨੇ ਮੂਰਤੀਆਂ ਦੀ ਪੂਜਾ-ਅਰਚਨਾ ਕੀਤੀ ਅਤੇ ਇਸਦੇ ਬਾਅਦ ਉਨ੍ਹਾਂ ਨੇ ਭਾਰਤ ਨੂੰ ਸੌਂਪ ਦਿੱਤਾ ਗਿਆ।