ਯੂ ਐੱਨ ਓ, 16 ਸਤੰਬਰ (ਪੋਸਟ ਬਿਊਰੋ)- ਯੂ ਐੱਨ ਕਮਿਸ਼ਨ ਆਨ ਦਾ ਸਟੇਟਸ ਆਫ ਵੂਮੈਨ (ਸੀ ਐਸ ਡਬਲਯੂ) ਦੀ ਇੱਕ ਮਹੱਤਵ ਪੂਰਨ ਚੋਣ ਵਿੱਚ ਭਾਰਤ ਨੇ ਚੀਨ ਨੂੰ ਹਰਾ ਕੇ ਕਮਿਸ਼ਨ ਦੀ ਮੈਂਬਰੀ ਹਾਸਲ ਕੀਤੀ ਹੈ। ਇਹ ਵਿਸ਼ਵ ਸੰਸਥਾ ਲਿੰਗ ਅਧਾਰਤ ਬਰਾਬਰੀ ਅਤੇ ਮਹਿਲਾ ਸ਼ਕਤੀਕਰਨ ਦੇ ਖੇਤਰ ਵਿੱਚ ਕੰਮ ਕਰਦੀ ਹੈ।
ਸੀ ਐਸ ਡਬਲਿਯੂ ਅਸਲ ਵਿੱਚ ਯੂ ਐੱਨ ਆਰਥਿਕ ਅਤੇ ਸਮਾਜਕ ਪ੍ਰੀਸ਼ਦ (ਈ ਸੀ ਓ ਐਸ ਓ ਸੀ) ਦਾ ਇੱਕ ਕਮਿਸ਼ਨ ਹੈ। ਵਰਨਣ ਯੋਗ ਹੈ ਕਿ ਇਸੇ ਸਾਲ ਭਾਰਤ ਨੂੰ ਯੂ ਐੱਨ ਸੁਰੱਖਿਆ ਕੌਂਸਲ ਦਾ ਅੱਠਵੀਂ ਵਾਰ ਆਰਜ਼ੀ ਮੈਂਬਰ ਵੀ ਚੁਣਿਆ ਗਿਆ ਹੈ। ਉਦੋਂ ਕੁੱਲ 192 ਵੋਟਾਂ ਵਿੱਚੋਂ ਭਾਰਤ ਨੂੰ 184 ਪਈਆਂ ਸਨ। ਸੁਰੱਖਿਆ ਕੌਂਸਲ ਵਿੱਚ ਭਾਰਤ ਦਾ ਕਾਰਜ ਕਾਲ ਦੋ ਸਾਲਾਂ ਦਾ ਹੋਵੇਗਾ ਅਤੇ ਇਹ ਇੱਕ ਜਨਵਰੀ 2021 ਤੋਂ ਸ਼ੁਰੂ ਹੋਵੇਗਾ।
54 ਮੈਂਬਰੀ ਈ ਸੀ ਓ ਐਸ ਓ ਸੀ ਨੇ ਜਨਰਲ ਅਸੈਂਬਲੀ ਹਾਲ ਵਿੱਚ ਆਪਣੇ 2021 ਸੈਸ਼ਨ ਦੀ ਪਹਿਲੀ ਬੈਠਕ ਕੀਤੀ, ਜਿਸ ਵਿੱਚ ਏਸ਼ਿਅਨ ਦੇਸ਼ਾਂ ਦੀਆਂ ਦੋ ਸੀਟਾਂ ਲਈ ਅਫਗਾਨਿਸਤਾਨ, ਭਾਰਤ ਅਤੇ ਚੀਨ ਇਕੱਠੇ ਚੋਣ ਮੈਦਾਨ ਵਿੱਚ ਸਨ। ਯੂ ਐੱਨ ਦੇ ਰਾਜਦੂਤ ਅਦੇਲਾ ਰਾਜ ਦੀ ਅਗਵਾਈ ਵਿੱਚ ਹੋਈ ਚੋਣ ਮੌਕੇ ਅਫਗਾਨਿਸਤਾਨ ਨੂੰ 39 ਅਤੇ ਭਾਰਤ ਨੂੰ 38 ਵੋਟ ਮਿਲੇ। ਯੂ ਐੱਨ ਸੁਰੱਖਿਆ ਕੌਂਸਲ ਦੇ ਪੱਕੇ ਮੈਂਬਰ ਚੀਨ ਨੂੰ ਸਿਰਫ 27 ਵੋਟ ਮਿਲੇ ਅਤੇ ਉਹ ਲੋੜੀਂਦੇ ਬਹੁਮਤ ਲਈ ਜ਼ਰੂਰੀ 28 ਵੋਟਾਂ ਵੀ ਪਵਾਉਣ ਤੋਂ ਅਸਫਲ ਰਿਹਾ।
ਯੂ ਐੱਨ ਵਿੱਚ ਭਾਰਤ ਦੇ ਪੱਕੇ ਪ੍ਰਤੀਨਿਧੀ ਟੀ ਐਸ ਤ੍ਰਿਮੂਰਤੀ ਨੇ ਟਵੀਟ ਕੀਤਾ ਕਿ ਭਾਰਤ ਨੇ ਮਾਣਮੱਤੀ ਈ ਸੀ ਓ ਐਸ ਓ ਸੀ ਸੰਸਥਾ ਵਿੱਚ ਆਪਣੀ ਸੀਟ ਪੱਕੀ ਕਰ ਲਈ ਹੈ। ਭਾਰਤ ਨੂੰ ਮਹਿਲਾ ਕਮਿਸ਼ਨ ਆਨ ਸਟੇਟਸ ਫਾਰ ਵੂਮੈਨ ਦਾ ਮੈਂਬਰ ਚੁਣਿਆ ਗਿਆ ਹੈ। ਇਹ ਲਿੰਗ ਅਧਾਰਤ ਬਰਾਬਰੀ ਅਤੇ ਮਹਿਲਾ ਸ਼ਕਤੀਕਰਨ ਨੂੰ ਉਤਸ਼ਾਹ ਦੇਣ ਲਈ ਸਾਡੀ ਵਚਨਬੱਧਤਾ ਦਾ ਨਤੀਜਾ ਹੈ। ਅਸੀਂ ਮੈਂਬਰ ਦੇਸ਼ਾਂ ਨੂੰ ਉਨ੍ਹਾਂ ਦੇ ਸਮਰਥਨ ਲਈ ਧੰਨਵਾਦ ਦਿੰਦੇ ਹਾਂ। ਚੋਣ ਨਤੀਜਿਆਂ ਨੂੰ ਮਹਿਲਾ ਸਮਾਨਤਾ ਤੇ ਸ਼ਕਤੀਕਰਨ ਨਾਲ ਜੁੜੇ ਚੀਨ ਦੇ ਖਰਾਬ ਰਿਕਾਰਡ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ।