ਓਟਵਾ, 15 ਸਤੰਬਰ (ਪੋਸਟ ਬਿਊਰੋ) : ਪਾਰਲੀਆਮੈਂਟ ਹਿੱਲ ਦੀ ਰਾਖੀ ਕਰਨ ਵਾਲੀ ਪਾਰਲੀਆਮੈਂਟਰੀ ਪ੍ਰੋਟੈਕਟਿਵ ਸਰਵਿਸ (ਪੀਪੀਐਸ) ਦਾ ਮੈਂਬਰ ਕੋਵਿਡ-19 ਪਾਜ਼ੀਟਿਵ ਪਾਇਆ ਗਿਆ ਹੈ|
ਸੈਨੇਟਰਜ਼ ਤੇ ਸਟਾਫ ਨੂੰ ਸੈਨੇਟ ਹਿਊਮਨ ਰਿਸੋਰਸਿਜ਼ ਵੱਲੋਂ ਭੇਜੀ ਗਈ ਈਮੇਲ ਅਨੁਸਾਰ ਪੀਪੀਐਸ ਦਾ ਇਹ ਮੈਂਬਰ ਉਸ ਮੁੱਖ ਮੰਜ਼ਿਲ ਉੱਤੇ ਡਿਊਟੀ ਨਿਭਾਉਂਦਾ ਸੀ ਜਿੱਥੇ ਬਹੁਤੇ ਸੈਨੇਟਰਜ਼ ਦੇ ਆਫਿਸ ਹਨ| ਪਾਜ਼ੀਟਿਵ ਪਾਏ ਜਾਣ ਤੋਂ ਪਹਿਲਾਂ ਇਹ ਸਟਾਫ ਮੈਂਬਰ ਪਾਰਲੀਆਮੈਂਟ ਹਿੱਲ ਦੇ ਕਈ ਹੋਰਨਾਂ ਥਾਂਵਾਂ ਉੱਤੇ ਵੀ ਘੁੰਮ ਚੁੱਕਿਆ ਸੀ|
ਇਸ ਕਰਮਚਾਰੀ ਨੂੰ 2 ਸਤੰਬਰ ਨੂੰ ਲੱਛਣ ਮਹਿਸੂਸ ਹੋਣੇ ਸ਼ੁਰੂ ਹੋਏ ਤੇ ਉਸ ਨੇ 3 ਸਤੰਬਰ ਨੂੰ ਕੋਵਿਡ-19 ਟੈਸਟ ਕਰਵਾ ਲਿਆ| ਪਰ ਉਸ ਨੇ ਕੰਮ ਉੱਤੇ ਜਾਣਾ ਜਾਰੀ ਰੱਖਿਆ ਤੇ ਉਹ ਇਸ ਦੌਰਾਨ 8 ਸਤੰਬਰ ਤੱਕ ਪਾਰਲੀਆਮੈਂਟਰੀ ਬ੍ਰੇਕ ਰੂਮਜ਼, ਲਾਕਰ ਰੂਮਜ਼, ਗਾਰਡ ਹੱਟਜ਼, ਐਲੇਵੇਟਰਜ਼ ਤੇ ਹੋਰਨਾਂ ਥਾਂਵਾਂ ਉੱਤੇ ਵੀ ਗਿਆ| ਫਿਰ ਉਸ ਨੇ 10 ਸਤੰਬਰ ਨੂੰ ਆਪਣੇ ਪਾਜ਼ੀਟਿਵ ਆਉਣ ਦੀ ਰਿਪੋਰਟ ਪੀਪੀਐਸ ਨੂੰ ਕੀਤੀ|
ਪੀਪੀਐਸ ਨੇ ਬਾਅਦ ਵਿੱਚ ਭੇਜੀ ਇੱਕ ਈਮੇਲ ਵਿੱਚ ਆਖਿਆ ਕਿ ਸਿੰਪਟਮੈਟਿਕ ਪਾਏ ਜਾਣ ਤੋਂ ਪਹਿਲਾਂ ਤੇ ਬਾਅਦ ਵਿੱਚ ਇਹ ਕਰਮਚਾਰੀ ਜਿਨ੍ਹਾਂ ਇਲਾਕਿਆਂ ਵਿੱਚ ਗਿਆ ਉੱਥੋਂ ਦੀ ਡੀਪ ਕਲੀਨਿੰਗ ਕਰਵਾਈ ਜਾ ਚੁੱਕੀ ਹੈ ਤੇ ਉਸ ਨੇ ਆਪਣੀ ਆਖਰੀ ਸ਼ਿਫਟ ਦੌਰਾਨ ਜਿਸ ਗੱਡੀ ਦੀ ਵਰਤੋਂ ਕੀਤੀ ਉਸ ਨੂੰ ਵੀ ਪੂਰੀ ਤਰ੍ਹਾਂ ਸਾਫ ਕਰਵਾਇਆ ਜਾ ਚੁੱਕਿਆ ਹੈ|
ਹੁਣ ਇਹ ਕਰਮਚਾਰੀ ਸੈਲਫ ਆਈਸੋਲੇਸ਼ਨ ਵਿੱਚ ਹੈ| ਇਸ ਤੋਂ ਇਲਾਵਾ ਕਾਂਟੈਕਟ ਟਰੇਸਿੰਗ ਵਿੱਚ 19 ਵਿਅਕਤੀ ਇਸ ਦੇ ਸੰਪਰਕ ਵਿੱਚ ਆਏ ਦੱਸੇ ਜਾਂਦੇ ਹਨ ਤੇ ਉਨ੍ਹਾਂ ਨੂੰ ਵੀ 14 ਦਿਨਾਂ ਲਈ ਸੈਲਫ ਆਈਸੋਲੇਸ਼ਨ ਵਿੱਚ ਭੇਜ ਦਿੱਤਾ ਗਿਆ ਹੈ|