ਢਾਕਾ, 15 ਸਤੰਬਰ (ਪੋਸਟ ਬਿਊਰੋ)- ਬੰਗਲਾ ਦੇਸ਼ ਦੇ ਵਿਦੇਸ਼ ਮੰਤਰੀ ਏ ਕੇ ਮੋਮਨ ਨੇ ਕਿਹਾ ਹੈ ਕਿ ਮਿਆਂਮਾਰ ਨੂੰ ਪ੍ਰਭਾਵਸ਼ਾਲੀ ਤਰੀਕੇ ਨਾਲ ਰੋਹਿੰਗਿਆ ਮੁਸਲਮਾਨਾਂ ਦੀ ਵਾਪਸੀ ਪ੍ਰਕਿਰਿਆ ਲਈ ਇਸ ਵਿੱਚ ਭਾਰਤ ਸਮੇਤ ਮਿੱਤਰ ਦੇਸ਼ਾਂ ਦੇ ਗੈਰ ਫੌਜੀ ਨਿਗਰਾਨ ਨੂੰ ਸ਼ਾਮਲ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਮਨੁੱਖੀ ਸਮੱਸਿਆ ਹੱਲ ਨਾ ਹੋਈ ਤਾਂ ਇਸ ਨਾਲ ਕੱਟੜਵਾਦ ਅਤੇ ਅੱਤਵਾਦ ਵਧੇਗਾ, ਜੋ ਇਸ ਖੇਤਰ ਦੀ ਸ਼ਾਂਤੀ ਅਤੇ ਸਥਿਰਤਾ ਲਈ ਖ਼ਤਰਾ ਹੋਵੇਗਾ।
ਦੱਖਣੀ ਪੂਰਬੀ ਏਸ਼ੀਆਈ ਦੇਸ਼ਾਂ ਦੇ ਸੰਗਠਨ ਆਸੀਆਨ ਦੀ 27ਵੀਂ ਬੈਠਕ ਨੂੰ ਸੰਬੋਧਨ ਕਰਦੇ ਹੋਏ ਮੋਮਨ ਨੇ ਕਿਹਾ ਕਿ ਰੋਹਿੰਗਿਆ ਮੁਸਲਮਾਨ ਆਪਣੇ ਦੇਸ਼ (ਮਿਆਂਮਾਰ) ਨਹੀਂ ਵਾਪਸ ਜਾ ਰਹੇ, ਕਿਉਂਕਿ ਉਨ੍ਹਾਂ ਨੂੰ ਸੁਰੱਖਿਆ ਤੇ ਹੋਰ ਮੁੱਦਿਆਂ ਬਾਰੇ ਆਪਣੀ ਸਰਕਾਰ ਉੱਤੇ ਭਰੋਸਾ ਨਹੀਂ ਹੈ। ਇਸ ਬੈਠਕ ਦਾ ਆਯੋਜਨ ਵੀਅਤਨਾਮ ਨੇ ਕੀਤਾ ਸੀ। ਵੀਡੀਓ ਕਾਨਫਰੰਸ ਰਾਹੀਂ ਮੰਤਰੀ ਪੱਧਰ ਦੀ ਬੈਠਕ ਨੂੰ ਸੰਬੋਧਨ ਕਰਦੇ ਹੋਏ ਮੋਮਨ ਨੇ ਕਿਹਾ ਅਰਥ ਵਿਵਸਥਾ, ਹਾਲਾਤ, ਜ਼ੋਖਮ ਅਤੇ ਸਮਾਜ ਉੱਤੇ ਪੈਣ ਵਾਲੇ ਵਿਆਪਕ ਅਸਰ ਦੇ ਬਾਵਜੂਦ ਬੰਗਲਾ ਦੇਸ਼ ਨੇ ਮਿਆਂਮਾਰ ਤੋਂ ਆਏ 11 ਲੱਖ ਲੋਕਾਂ ਨੂੰ ਮਨੱਖੀ ਆਧਾਰ `ਤੇ ਸ਼ਰਨ ਦਿੱਤੀ ਹੈ। ਮਿਆਂਮਾਰ ਸਾਡਾ ਮਿੱਤਰ ਦੇਸ਼ ਹੈ, ਇਸ ਲਈ ਬੰਗਲਾ ਦੇਸ਼ ਨੇ ਉਨ੍ਹਾਂ ਦੀ ਵਾਪਸੀ ਦੇ ਲਈ ਮਿਆਂਮਾਰ ਦੇ ਨਾਲ ਤਿੰਨ ਸਮਝੌਤਿਆਂ `ਤੇ ਦਸਤਖਤ ਵੀ ਕੀਤੇ ਹਨ।