* ਚੀਨੀ ਕੰਪਨੀ ਬਾਈਟਡਾਂਸ ਵੱਲੋਂ ਮਾਈਕ੍ਰੋਸਾਫਟ ਦੀ ਬੋਲੀ ਰੱਦ
ਨਿਊ ਯਾਰਕ, 15 ਸਤੰਬਰ (ਪੋਸਟ ਬਿਊਰੋ)- ਚੀਨੀ ਐਪ ਟਿਕਟਾਕ ਉੱਤੇ ਅਮਰੀਕਾ ਵਿੱਚ ਪਾਬੰਦੀ ਲੱਗਣ ਦਾ ਖਤਰਾ ਇਕ ਵਾਰ ਟਲ ਗਿਆ ਹੈ। ਇਸ ਐਪ ਦੀ ਮਾਲਕ ਚੀਨੀ ਕੰਪਨੀ ਬਾਈਟਡਾਂਸ ਨੇ ਮਾਈਕ੍ਰੋਸਾਫਟ ਦੀ ਬੋਲੀ ਰੱਦ ਕਰ ਕੇ ਟਿਕਟਾਕ ਲਈ ਅਮਰੀਕੀ ਕੰਪਨੀ ‘ਓਰੇਕਲ` ਨੂੰ ਤਕਨੀਕੀ ਭਾਈਵਾਲ ਬਣਾਉਣਾ ਮੰਨ ਲਿਆ ਹੈ। ਓਰੇਕਲ ਅਮਰੀਕਾ ਵਿੱਚ ਟਿਕਟਾਕ ਦੇ ਯੂਜ਼ਰ ਡਾਟਾ ਦਾ ਪ੍ਰਬੰਧ ਦੇਖੇਗੀ। ਇਸ ਤਰ੍ਹਾਂ ਟਿਕਟਾਕ ਨੇ ਕਾਰੋਬਾਰ ਨਹੀਂ ਵੇਚਿਆ। ਅਜੇ ਸਾਫ ਨਹੀਂ ਹੈ ਕਿ ਸੌਦੇ ਨੂੰ ਵਾਈਟ ਹਾਊਸ ਦੀ ਮਨਜ਼ੂਰੀ ਮਿਲੇਗੀ ਜਾਂ ਨਹੀਂ।
ਵਰਨਣ ਯੋਗ ਹੈ ਕਿ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਚੀਨੀ ਐਪ ਨੂੰ ਰਾਸ਼ਟਰੀ ਸੁਰੱਖਿਆ ਦੇ ਲਈ ਖਤਰਾ ਮੰਨਦੇ ਹੋਏ ਦੋ ਕਾਰਜਕਾਰੀ ਹੁਕਮ ਜਾਰੀ ਕੀਤੇ ਸਨ। ਇਸ ਪਿੱਛੋਂ ਟਿਕਟਾਕ ਲਈ ਆਪਣਾ ਅਮਰੀਕੀ ਕਾਰੋਬਾਰੀ ਬੰਦ ਕਰਨ ਜਾਂ ਕਿਸੇ ਕੰਪਨੀ ਨੂੰ ਵੇਚਣ ਲਈ 12 ਨਵੰਬਰ ਤੱਕ ਦਾ ਸਮਾਂ ਸੀ। ਓਰੇਕਲ ਨਾਲ ਭਾਈਵਾਲੀ ਵਿੱਚ ਟਿਕਟਾਕ ਇਸ ਮੁਸ਼ਕਲ ਵਿੱਚ ਬਾਹਰ ਨਿਕਲਦੀ ਲੱਗਦੀ ਹੈ। ਮਾਈਕ੍ਰੋਸਾਫਟ ਦੇ ਕਹਿਣ ਮੁਤਾਬਕ ‘ਬਾਈਟਡਾਂਸ ਨੇ ਸਾਨੂੰ ਦੱਸਿਆ ਹੈ ਕਿ ਉਹ ਟਿਕਟਾਕ ਦਾ ਅਮਰੀਕੀ ਕਾਰੋਬਾਰ ਸਾਨੂੰ ਨਹੀਂ ਵੇਚ ਰਹੀ। ਸਾਡੀ ਰਾਏ ਹੈ ਕਿ ਦੇਸ਼ ਦੀ ਸੁਰੱਖਿਆ ਦੇ ਪੱਖੋਂ ਸਾਡੀ ਪੇਸ਼ਕਸ਼ ਅਮਰੀਕੀ ਯੂਜ਼ਰਸ ਲਈ ਚੰਗੀ ਸੀ।` ਅਜੇ ਇਹ ਸਪੱਸ਼ਟ ਨਹੀਂ ਕਿ ਟਿਕਟਾਕ ਵੱਲੋਂ ਤਕਨੀਕੀ ਭਾਈਵਾਲ ਵਜੋਂ ਓਰੇਕਲ ਦੀ ਚੋਣ ਉਸ ਵੱਲੋਂ ਚੀਨੀ ਐਪ ਵਿੱਚ ਵੱਡੀ ਹਿੱਸੇਦਾਰੀ ਹਾਸਲ ਕਰਨ ਨਾਲ ਵੀ ਹੈ ਕਿ ਨਹੀਂ।