ਵਾਸਿੰਗਟਨ, 15 ਸਤੰਬਰ (ਪੋਸਟ ਬਿਊਰੋ) : ਮੰਗਲਵਾਰ ਨੂੰ ਵ੍ਹਾਈਟ ਹਾਊਸ ਵਿੱਚ ਹੋਣ ਜਾ ਰਹੇ ਇੱਕ ਸਮਾਰੋਹ ਵਿੱਚ ਯੂਨਾਈਟਿਡ ਅਰਬ ਅਮੀਰਾਤ ਅਤੇ ਬਹਿਰੇਨ ਵੱਲੋਂ ਇਜ਼ਰਾਈਲ ਨਾਲ ਡਿਪਲੋਮੈਟਿਕ ਸਬੰਧ ਕਾਇਮ ਕਰਨ ਲਈ ਸ਼ਾਂਤੀ ਸਮਝੌਤੇ ਉੱਤੇ ਦਸਤਖ਼ਤ ਕੀਤੇ ਜਾਣਗੇ| ਇੱਥੇ ਹੀ ਬੱਸ ਨਹੀਂ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਸਮਰਥਕ ਇਸ ਨੂੰ ਰਾਸ਼ਟਰਪਤੀ ਦੀ ਵੱਡੀ ਪ੍ਰਾਪਤੀ ਦੱਸ ਰਹੇ ਹਨ ਤੇ ਇਹ ਆਖ ਰਹੇ ਹਨ ਕਿ ਇਨ੍ਹਾਂ ਨੇਕ ਕੰਮਾਂ ਲਈ ਹੀ ਟਰੰਪ ਨੂੰ ਨੋਬਲ ਪੀਸ ਪ੍ਰਾਈਜ਼ ਮਿਲਣਾ ਚਾਹੀਦਾ ਹੈ|
ਇਸ ਸਮਝੌਤੇ ਉੱਤੇ ਸਾਈਨ ਕਰਕੇ ਯੂਏਈ ਤੇ ਬਹਿਰੇਨ ਤੀਜੇ ਤੇ ਚੌਥੇ ਮੱਧ ਪੂਰਬੀ ਦੇਸ਼ ਬਣ ਜਾਣਗੇ ਜਿਹੜੇ ਰਸਮੀ ਤੌਰ ਉੱਤੇ ਭਾਈਵਾਲ ਵਜੋਂ ਇਜ਼ਰਾਈਲ ਨੂੰ ਮਾਨਤਾ ਦੇ ਰਹੇ ਹਨ| ਅਮਰੀਕਾ ਵਿੱਚ ਯੂਏਈ ਦੇ ਸਫੀਰ ਯੂਸਫ ਅਲ ਓਤਾਇਬਾ ਨੇ ਇੱਕ ਟੈਕਸਟ ਮੈਸੇਜ ਵਿੱਚ ਆਖਿਆ ਕਿ ਇਸ ਰੀਜਨ ਦੇ ਲੋਕ ਝਗੜਿਆਂ ਤੋਂ ਅੱਕ ਚੁੱਕੇ ਹਨ| ਇਹ ਸਮਝੌਤਾ ਨਾ ਸਿਰਫ ਰੀਜਨ ਲਈ ਚੰਗਾ ਹੋਵੇਗਾ ਸਗੋਂ ਅਮਰੀਕਾ ਨੂੰ ਵੀ ਇਸ ਤੋਂ ਫਾਇਦਾ ਹੋਵੇਗਾ|
ਦੁਪਹਿਰ ਸਮੇਂ ਹੋਣ ਵਾਲੇ ਇਸ ਸਮਾਰੋਹ ਵਿੱਚ ਹਿੱਸਾ ਲੈਣ ਲਈ ਯੂਏਈ ਤੇ ਬਹਿਰੇਨ ਦੇ ਵਿਦੇਸ਼ ਮੰਤਰੀਆਂ ਤੋਂ ਇਲਾਵਾ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਾਯਾਹੂ ਵੀ ਇੱਥੇ ਪਹੁੰਚਣਗੇ| ਇਸ ਸਮਝੌਤੇ ਦਾ ਫਲਸਤੀਨੀ ਆਗੂਆਂ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਹੈ|