ਵਾਸ਼ਿੰਗਟਨ, 14 ਸਤੰਬਰ, (ਪੋਸਟ ਬਿਊਰੋ)- ਚੀਨ ਨਾਲ ਕਈ ਤਰ੍ਹਾਂ ਦੇ ਤਣਾਅ ਦੌਰਾਨ ਅਮਰੀਕਾ ਨੇ ਅੱਜ ਚੀਨ ਵਿਚਲੇ ਆਪਣੇ ਰਾਜਦੂਤ ਟੇਰੀ ਬ੍ਰੈਂਸਟੈਡ ਨੂੰ ਵਾਪਸ ਸੱਦਣ ਦਾ ਫ਼ੈਸਲਾ ਕਰ ਲਿਆ ਹੈ। ਵਿਦੇਸ਼ ਮੰਤਰੀ ਮਾਈਕ ਪੌਂਪੀਓ ਨੇ ਅੱਜ ਇਹ ਜਾਣਕਾਰੀ ਦਿੰਦੇ ਸਮੇਂ ਰਾਜਦੂਤ ਨੂੰ ਵਾਪਸ ਸੱਦਣ ਦਾ ਕੋਈ ਕਾਰਨ ਨਹੀਂ ਦੱਸਿਆ। ਇਸ ਬਾਰੇ ਦੂਤਘਰ ਵੱਲੋਂ ਵੀ ਕੋਈ ਪ੍ਰਤੀਕਿਰਿਆ ਨਹੀਂ ਮਿਲੀ। ਦੂਸਰੇ ਪਾਸੇ ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਵਾਂਗ ਵੇਨਬਿਨ ਨੇ ਕਿਹਾ ਕਿ ਅਜੇ ਤਕ ਉਨ੍ਹਾਂ ਨੂੰ ਬ੍ਰੈਂਸਟੈਡ ਦੇ ਅਹੁਦਾ ਛੱਡਣ ਦੀ ਰਸਮੀ ਸੂਚਨਾ ਨਹੀਂ ਮਿਲੀ। ਵਰਨਣ ਯੋਗ ਹੈ ਕਿ ਦੁਵੱਲੇ ਵਪਾਰ ਤੇ ਕੋਰੋਨਾ ਮਹਾਮਾਰੀ ਦੇ ਮਾਮਲਿਆਂ ਬਾਰੇ ਅਮਰੀਕਾ ਅਤੇ ਚੀਨ ਦੇ ਸਬੰਧ ਤਣਾਅ ਪੂਰਨ ਹਨ।
ਇਸ ਮੌਕੇ ਅਮਰੀਕੀ ਵਿਦੇਸ਼ ਮੰਤਰੀ ਪੌਂਪੀਓ ਨੇ ਟਵੀਟ ਕੀਤਾ ਕਿ ਮੈਂ ਤਿੰਨ ਸਾਲਾਂ ਤੋਂ ਵੱਧ ਸਮੇਂ ਤਕ ਚੀਨ ਵਿਚ ਅਮਰੀਕਾ ਦੀ ਸੇਵਾ ਕਰਨ ਲਈ ਰਾਜਦੂਤ ਟੇਰੀ ਬ੍ਰੈਂਸਟੈਡ ਦਾ ਧੰਨਵਾਦ ਕਰਦਾ ਹਾਂ, ਉਨ੍ਹਾਂ ਨੇ ਅਮਰੀਕਾ-ਚੀਨ ਸਬੰਧਾਂ ਨੂੰ ਮੁੜ ਸਥਾਪਿਤ ਕਰਨ ਵਿਚ ਮਹੱਤਵ ਪੂਰਨ ਯੋਗਦਾਨ ਦਿੱਤਾ ਹੈ।
ਦੂਸਰੇ ਪਾਸੇ ਇਕ ਅਣਪਛਾਤੇ ਸਰੋਤ ਦੇ ਹਵਾਲੇ ਨਾਲ ਸੀ ਐੱਨ ਐੱਨ ਨੈੱਟਵਰਕ ਨੇ ਇਹ ਕਿਹਾ ਹੈ ਕਿ ਬ੍ਰੈਂਸਟੈਡ ਅਗਲੇ ਨਵੰਬਰ ਵਿਚ ਹੋ ਰਹੀ ਰਾਸ਼ਟਰਪਤੀ ਚੋਣ ਤੋਂ ਪਹਿਲਾਂ ਆਪਣਾ ਅਹੁਦਾ ਛੱਡ ਸਕਦੇ ਹਨ। ਪਿਛਲੇ ਹਫ਼ਤੇ ਚੀਨ ਦੇ ਅਖਬਾਰ ਪੀਪਲਜ਼ ਡੇਲੀ ਨੇ ਟੇਰੀ ਬ੍ਰੈਂਸਟੈਡ ਦਾ ਇਕ ਲੇਖ ਨੂੰ ਛਾਪਣ ਤੋਂ ਇਨਕਾਰ ਕਰ ਦਿੱਤਾ ਸੀ, ਜਿਸ ਮਗਰੋਂ ਦੋਵਾਂ ਦੇਸ਼ਾਂ ਨੇ ਇਕ-ਦੂਜੇ ਉੱਤੇ ਪ੍ਰੈੱਸ ਦੀ ਆਜ਼ਾਦੀ ਰੋਕਣ ਦਾ ਦੋਸ਼ ਲਾਇਆ ਸੀ।ਆਯੋਵਾ ਸਟੇਟ ਦੇ ਸਾਬਕਾ ਗਵਰਨਰ ਟੈਰੀ ਬ੍ਰੈਂਸਟੈਡ ਦਾ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ 1985 ਤੋਂ ਕੰਮਕਾਜੀ ਰਿਸ਼ਤਾ ਰਹਿ ਚੁੱਕਾ ਹੈ। ਜਿੰਨਪਿੰਗ ਇਕ ਖੇਤੀ ਅਧਿਕਾਰੀ ਵਜੋਂਅਮਰੀਕਾ ਦੀ ਇਸ ਸਟੇਟ ਵਿੱਚਆਏ ਸਨ। ਸਾਲ 2011 ਵਿਚ ਓਦੋਂ ਦੇ ਉਪ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਬੀਜਿੰਗ ਵਿਚ ਟੈਰੀ ਬ੍ਰੈਂਸਟੈਡ ਨਾਲ ਮੁਲਾਕਾਤ ਕੀਤੀ ਸੀ ਅਤੇ ਫਿਰ ਆਯੋਵਾ ਦੀ ਯਾਤਰਾ ਦੌਰਾਨ ਉਨ੍ਹਾਂ ਨੂੰ ਮਿਲੇ ਸਨ। ਉਹ ਅਪਰੈਲ 2013 ਵਿਚ ਫਿਰ ਮਿਲੇ ਅਤੇ ਓਦੋਂ ਬਾਅਦ ਸ਼ੀ ਜਿਨਪਿੰਗ ਚੀਨ ਦੇ ਰਾਸ਼ਟਰਪਤੀ ਬਣੇ ਸਨ। ਚੀਨ ਦੇ ਵਿਦੇਸ਼ ਮੰਤਰਾਲੇ ਨੇ ਵੀ ਬ੍ਰੈਂਸਟੈਡ ਨੂੰ ਚੀਨ ਦਾ ਪੁਰਾਣਾ ਦੋਸਤ ਦੱਸਿਆ ਸੀ।