ਓਟਵਾ, 15 ਸਤੰਬਰ (ਪੋਸਟ ਬਿਊਰੋ) : ਬਲਾਕ ਕਿਊਬਿਕੁਆ ਦੇ ਆਗੂ ਯਵੇਸ ਫਰੈਂਕੌਇਸ ਬਲਾਂਸੇæ ਤੇ ਉਨ੍ਹਾਂ ਦਾ ਸਮੁੱਚਾ ਕਾਕਸ ਹੀ ਸੈਲਫ ਆਈਸੋਲੇਟ ਹੋ ਗਿਆ ਹੈ| ਬਲਾਂਸ਼ੇ ਦੇ ਆਫਿਸ ਦੇ ਇੱਕ ਕਰਮਚਾਰੀ ਦੇ ਕੋਵਿਡ-19 ਪਾਜ਼ੀਟਿਵ ਪਾਏ ਜਾਣ ਤੋਂ ਬਾਅਦ ਇਹ ਫੈਸਲਾ ਲਿਆ ਗਿਆ|
ਪਾਰਟੀ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਵਿੱਚ ਆਖਿਆ ਗਿਆ ਕਿ ਬਲਾਂਸੇæ ਤੇ ਬਲਾਕ ਦੇ 31 ਹੋਰ ਐਮਪੀਜ਼ ਦੇ ਟੈਸਟ ਕਰਵਾਏ ਜਾਣਗੇ ਤੇ ਇਨ੍ਹਾਂ ਸਾਰਿਆਂ ਵੱਲੋਂ ਪਬਲਿਕ ਹੈਲਥ ਪ੍ਰੀਕਾਸ਼ਨਜ਼ ਲਈਆਂ ਜਾਣਗੀਆਂ| ਇਹ ਵੀ ਆਖਿਆ ਗਿਆ ਕਿ ਸਾਰੇ ਵਰਚੂਅਲੀ ਕੰਮ ਕਰਨਾ ਜਾਰੀ ਰੱਖਣਗੇ| ਗਰੁੱਪ ਵੱਲੋਂ ਨਿਜੀ ਤੌਰ ਉੱਤੇ ਕੀਤੀ ਗਈ ਮੀਟਿੰਗ ਤੋਂ ਬਾਅਦ ਹੀ ਇਹ ਕਰਮਚਾਰੀ ਪਾਜ਼ੀਟਿਵ ਆਇਆ ਸੀ| ਬਲਾਕ ਕਿਊਬਿਕੁਆ ਦੀ ਤਰਜ਼ਮਾਨ ਕੈਰੋਲੇਨ ਲੈਂਡਰਾਇ ਨੇ ਇੱਕ ਬਿਆਨ ਜਾਰੀ ਕਰਕੇ ਆਖਿਆ ਕਿ ਸਾਡੇ ਵੱਲੋਂ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲਿਆ ਜਾ ਰਿਹਾ ਹੈ|
ਪਾਰਲੀਆਮੈਂਟ ਦੀ ਕਾਰਵਾਈ ਸੁæਰੂ ਹੋਣ ਤੋਂ ਇੱਕ ਹਫਤੇ ਪਹਿਲਾਂ ਕਾਕਸ ਕੁਆਰਨਟੀਨ ਕਰ ਰਿਹਾ ਹੈ| ਇਸ ਵਾਰੀ ਪਾਰਲੀਆਮੈਂਟ ਵਿੱਚ ਕਈ ਤਰ੍ਹਾਂ ਦੀ ਅਹਿਮ ਬਹਿਸ ਹੋਣੀ ਹੈ ਤੇ 23 ਸਤੰਬਰ ਨੂੰ ਲਿਬਰਲਾਂ ਵੱਲੋਂ ਰਾਜ ਭਾਸ਼ਣ ਤੋਂ ਬਾਅਦ ਵੋਟਾਂ ਵੀ ਪੈਣੀਆਂ ਹਨ| ਹੁਣ ਤੱਕ ਮਹਾਂਮਾਰੀ ਕਾਰਨ ਹਾਊਸ ਆਫ ਕਾਮਨਜ਼ ਦਾ ਕੰਮਕਾਜ ਕਿਸ ਤਰ੍ਹਾਂ ਚਲਾਇਆ ਜਾਣਾ ਹੈ ਇਸ ਬਾਰੇ ਪਾਰਟੀਆਂ ਕਿਸੇ ਸਮਝੌਤੇ ਉੱਤੇ ਨਹੀਂ ਪਹੁੰਚੀਆਂ ਹਨ|