ਓਟਵਾ, 13 ਸਤੰਬਰ (ਪੋਸਟ ਬਿਊਰੋ) : ਭਰੋਸੇ ਦੇ ਵੋਟ ਦਾ ਸਾਹਮਣਾ ਕਰਨ ਤੋਂ ਪਹਿਲਾਂ ਕੈਨੇਡੀਅਨ ਹਥਿਆਰਬੰਦ ਸੈਨਾਵਾਂ ਦੇ ਨਵੇਂ ਕਮਾਂਡਰ ਦੀ ਚੋਣ ਕਰਨ ਦਾ ਮੁੱਦਾ ਫੈਡਰਲ ਸਰਕਾਰ ਲਈ ਇਸ ਸਮੇਂ ਕਾਫੀ ਅਹਿਮ ਬਣਿਆ ਹੋਇਆ ਹੈ| ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇ ਚੋਣਾਂ ਕਰਵਾਉਣੀਆਂ ਵੀ ਪੈਂਦੀਆਂ ਹਨ ਤਾਂ ਇਸ ਤਰ੍ਹਾਂ ਕੀਤੀ ਜਾ ਰਹੀ ਦੇਰੀ ਸਦਕਾ ਫੌਜ ਨੂੰ ਸੇਧ ਦੇਣ ਵਾਲਾ ਕੋਈ ਨਹੀਂ ਬਚੇਗਾ|
ਜਨਰਲ ਜੌਨਾਥਨ ਵਾਂਸ ਦਾ ਜਾਨਸ਼ੀਨ ਕੌਣ ਬਣੇਗਾ ਅਤੇ ਚੀਫ ਆਫ ਡਿਫੈਂਸ ਸਟਾਫ ਦੀ ਕਮਾਨ ਕੌਣ ਸਾਂਭੇਗਾ ਅਜੇ ਤੱਕ ਇਸ ਬਾਰੇ ਕਿਸੇ ਦੀ ਚੋਣ ਨਹੀਂ ਕੀਤੀ ਗਈ ਹੈ| ਹਾਲਾਂਕਿ ਇੱਕ ਸਪਸ਼ਟ ਬਦਲ ਨਜ਼ਰ ਆ ਰਿਹਾ ਹੈ ਪਰ ਸ਼ਾਇਦ ਕੋਈ ਹੋਰ ਲਿਬਰਲਾਂ ਨੂੰ ਵਧੇਰੇ ਮੁਆਫਕ ਬੈਠੇ, ਇਸ ਲਈ ਅਜੇ ਇਸ ਪਾਸੇ ਕੋਈ ਜੋæਰ ਨਹੀਂ ਲਾਇਆ ਜਾ ਰਿਹਾ|
ਕੈਨੇਡੀਅਨ ਫੋਰਸਿਜ਼ ਕਾਲਜ ਪ੍ਰੋਫੈਸਰ ਐਲਨ ਓਕਰੌਸ ਨੇ ਆਖਿਆ ਕਿ ਆਮ ਤੌਰ ਉੱਤੇ ਇਹ ਮੰਨਿਆ ਜਾਂਦਾ ਹੈ ਕਿ ਜਿਸ ਸ਼ਖਸ ਨੇ ਤਿੰਨ ਸਟਾਰ ਹਾਸਲ ਕਰਨ ਤੱਕ ਦਾ ਮੁਕਾਮ ਹਾਸਲ ਕੀਤਾ ਹੋਵੇ ਉਹ ਇਸ ਅਹੁਦੇ ਨੂੰ ਚੰਗੀ ਤਰ੍ਹਾਂ ਸਾਂਭ ਸਕਦਾ ਹੈ| ਪਰ ਲਿਬਰਲਾਂ ਦੀ ਤਰਜੀਹ ਕਿਸ ਪਾਸੇ ਵੱਲ ਹੈ ਗੱਲ ਇੱਥੇ ਆ ਕੇ ਮੁੱਕਦੀ ਹੈ|
ਲਿਬਰਲ ਸਰਕਾਰ ਇਹ ਸੰਕੇਤ ਵੀ ਦੇ ਚੁੱਕੀ ਹੈ ਕਿ 23 ਸੰਤਬਰ ਨੂੰ ਰਾਜ ਭਾਸ਼ਣ ਤੋਂ ਪਹਿਲਾਂ ਉਹ ਨਵੇਂ ਚੀਫ ਆਫ ਡਿਫੈਂਸ ਸਟਾਫ ਦਾ ਐਲਾਨ ਕਰਨਾ ਚਾਹੁੰਦੀ ਹੈ| ਨੈਸ਼ਨਲ ਡਿਫੈਂਸ ਵਿਭਾਗ ਦੇ ਸੂਤਰਾਂ ਅਨੁਸਾਰ ਪਿਛਲੇ ਹਫਤੇ ਕੁੱਝ ਕੁ ਇੰਟਰਵਿਊਜ਼ ਵੀ ਇਸ ਸਬੰਧ ਵਿੱਚ ਕੀਤੀਆਂ ਗਈਆਂ ਹਨ| ਇਸ ਸਮੇਂ ਲਿਬਰਲ ਸਰਕਾਰ ਦੀ ਸਪਸ਼ਟ ਪਸੰਦ ਲੈਫਟੀਨੈਂਟ ਜਨਰਲ ਮਾਈਕ ਰੂਲੋ ਲੱਗ ਰਹੇ ਹਨ|
ਸਾਬਕਾ ਓਟਵਾ ਪੁਲਿਸ ਆਫੀਸਰ ਰਹਿ ਚੁੱਕੇ ਰੂਲੋ 9/11 ਤੋਂ ਬਾਅਦ ਮੁੜ ਸੈਨਾ ਵਿੱਚ ਸ਼ਾਮਲ ਹੋਏ ਤੇ ਉਨ੍ਹਾਂ 2014 ਵਿੱਚ ਕਮਾਂਡਰ ਆਫ ਕੈਨੇਡਾਜ਼ ਸਪੈਸ਼ਲ ਫੋਰਸਿਜ਼ ਬਣਨ ਤੋਂ ਪਹਿਲਾਂ ਕਈ ਸਾਲ ਇਸ ਖੇਤਰ ਵਿੱਚ ਬਿਤਾਏ| ਉਨ੍ਹਾਂ ਨੂੰ ਪਹਿਲਾਂ ਕੈਨੇਡੀਅਨ ਜੁਆਇੰਟ ਆਪਰੇਸ਼ਨਜ਼ ਕਮਾਂਡ ਦਾ ਕਮਾਂਡਰ ਥਾਪਿਆ ਗਿਆ ਤੇ ਪਿੱਛੇ ਜਿਹੇ ਉਹ ਵਾਂਸ ਦੇ ਸੈਕਿੰਡ ਇਨ ਕਮਾਂਡ ਬਣੇ|