ਓਟਵਾ, 13 ਸਤੰਬਰ (ਪੋਸਟ ਬਿਊਰੋ) : ਐਲੀਨ ਕ੍ਰੈਚੀਅਨ ਸ਼ਾਇਦ ਸੱਭ ਤੋਂ ਪ੍ਰਭਾਵਸ਼ਾਲੀ ਮਹਿਲਾ ਸਿਆਸੀ ਸ਼ਖਸੀਅਤ ਹੋਵੇ ਜਿਸ ਨੂੰ ਕੈਨੇਡੀਅਨਜ਼ ਜਾਣਦੇ ਹੋਣਗੇ|
ਉਨ੍ਹਾਂ ਨੂੰ ਅਕਸਰ ਸਿਆਸੀ ਈਵੈਂਟਸ ਉੱਤੇ ਵੇਖਿਆ ਜਾ ਸਕਦਾ ਸੀ| ਪਤਲੀ ਜਿਹੀ ਪਰ ਬਹੁਤ ਹੀ ਪ੍ਰਭਾਵਸ਼ਾਲੀ ਸ਼ਖਸੀਅਤ ਦੀ ਮਾਲਕ ਐਲੀਨ ਨੂੰ ਅਕਸਰ ਆਪਣੇ ਪਤੀ ਸਾਬਕਾ ਪ੍ਰਧਾਨ ਮੰਤਰੀ ਜੀਨ ਕ੍ਰੈਚੀਅਨ ਨਾਲ ਵੇਖਿਆ ਗਿਆ ਪਰ ਉਨ੍ਹਾਂ ਨੇ ਜਨਤਕ ਤੌਰ ਉੱਤੇ ਕਦੇ ਸ਼ਾਇਦ ਹੀ ਕੁੱਝ ਬੋਲਿਆ ਹੋਵੇ| ਪਰ ਐਲੀਨ ਹਮੇਸ਼ਾਂ ਕ੍ਰੈਚੀਅਨ ਦੀ ਸੱਭ ਤੋਂ ਭਰੋਸੇਯੋਗ ਤੇ ਆਤਮਵਿਸ਼ਵਾਸ ਨਾਲ ਲਬਰੇਜ ਸਲਾਹਕਾਰ ਰਹੀ| ਕ੍ਰੈਚੀਅਨ ਹਮੇਸ਼ਾਂ ਉਨ੍ਹਾਂ ਨੂੰ ਆਪਣੀ ਜ਼ਿੰਦਗੀ ਦਾ ਥੰਮ੍ਹ ਦੱਸਦੇ ਰਹੇ ਹਨ|
ਪਰਿਵਾਰ ਦੇ ਬੁਲਾਰੇ ਨੇ ਦੱਸਿਆ ਕਿ ਐਲੀਨ ਕ੍ਰੈਚੀਅਨ ਦੀ ਮੌਤ ਸ਼ਨਿੱਚਰਵਾਰ ਸਵੇਰੇ ਉਨ੍ਹਾਂ ਦੇ ਸ਼ਵਿਨੀਗੈਨ, ਕਿਊਬਿਕ ਸਥਿਤ ਘਰ ਵਿੱਚ ਪਰਿਵਾਰਕ ਮੈਂਬਰਾਂ ਦੀ ਹਾਜ਼ਰੀ ਵਿੱਚ ਹੋਈ| ਉਹ 84 ਸਾਲਾਂ ਦੀ ਸੀ| ਮੌਤ ਦੇ ਕਾਰਨਾਂ ਦੀ ਜਾਣਕਾਰੀ ਨਹੀਂ ਦਿੱਤੀ ਗਈ| ਲੰਮੇਂ ਸਮੇਂ ਤੱਕ ਕ੍ਰੈਚੀਅਨ ਦੇ ਸਹਾਇਕ ਰਹੇ ਐਡੀ ਗੋਲਡਨਬਰਗ ਨੇ ਆਖਿਆ ਕਿ ਪ੍ਰਧਾਨ ਮੰਤਰੀ ਕ੍ਰੈਚੀਅਨ ਇਹ ਮੰਨਦੇ ਸਨ ਕਿ ਐਲੀਨ ਤੋਂ ਬਿਨਾਂ ਉਹ ਕਦੇ ਪ੍ਰਧਾਨ ਮੰਤਰੀ ਬਣਨ ਬਾਰੇ ਸੋਚ ਵੀ ਨਹੀਂ ਸਨ ਸਕਦੇ|
ਉਨ੍ਹਾਂ ਆਖਿਆ ਕਿ ਉਹ ਜਾਣਦੀ ਸੀ ਕਿ ਉਹ ਚੁਣੀ ਨਹੀਂ ਜਾਵੇਗੀ, ਇਸ ਲਈ ਉਸ ਨੇ ਕਦੇ ਅਜਿਹਾ ਕਰਨ ਦਾ ਸੋਚਿਆ ਵੀ ਨਹੀਂ| ਪਰ ਉਹ ਗੁਪਤ ਢੰਗ ਨਾਲ ਕ੍ਰੈਚੀਅਨ ਨੂੰ ਸਮੇਂ ਸਿਰ ਹਮੇਸ਼ਾਂ ਸਹੀ ਸਲਾਹ ਦਿੰਦੀ ਰਹੀ| ਕ੍ਰੈਚੀਅਨ ਨਾਲ ਵਿਆਹ ਕਰਵਾਉਣ ਤੋਂ ਬਾਅਦ ਉਨ੍ਹਾਂ ਘਰ ਰਹਿ ਕੇ ਆਪਣੇ ਤਿੰਨ ਬੱਚਿਆਂ ਧੀ ਫਰਾਂਸ ਤੇ ਬੇਟਿਆਂ ਹਬਰਟ ਤੇ ਮਾਈਕਲ ਨੂੰ ਪਾਲਣ ਦੀ ਜ਼ਿੰਮੇਵਾਰੀ ਬਾਖੂਬੀ ਨਿਭਾਈ|
ਐਨੀਆਂ ਜ਼ਿੰਮੇਵਾਰੀਆਂ ਦੇ ਬਾਵਜੂਦ ਉਨ੍ਹਾਂ ਕਦੇ ਪੜ੍ਹਾਈ ਦਾ ਪੱਲਾ ਨਹੀਂ ਛੱਡਿਆ| ਅੰਗਰੇਜ਼ੀ ਤੋਂ ਇਲਾਵਾ ਉਨ੍ਹਾਂ ਨੂੰ ਇਟੈਲੀਅਨ, ਸਪੈਨਿਸ਼ ਤੇ ਫਰੈਂਚ ਵਿੱਚ ਮਹਾਰਤ ਹਾਸਲ ਸੀ| ਰੌਇਲ ਕੰਜ਼ਰਵੇਟਰੀ ਆਫ ਮਿਊਜ਼ਿਕ ਤੋਂ ਉਨ੍ਹਾਂ ਉਮਦਾ ਪਿਆਨਿਸਟ ਬਣਨ ਦੀ ਤਾਲੀਮ ਲਈ| 2010 ਵਿੱਚ ਉਹ ਸਡਬਰੀ ਵਿੱਚ ਲਾਰੈਂਚੀਅਨ ਯੂਨੀਵਰਸਿਟੀ ਦੀ ਪਹਿਲੀ ਚਾਂਸਲਰ ਬਣੀ|
70 ਸਾਲਾਂ ਤੱਕ ਉਹ ਪਲ ਪਲ ਕ੍ਰੈਚੀਅਨ ਦੇ ਮੋਢੇ ਨਾਲ ਮੋਢਾ ਜੋੜ ਕੇ ਸਾਰੀਆ ਜ਼ਿੰਮੇਵਾਰੀਆਂ ਪੂਰੀਆਂ ਕਰਦੀ ਰਹੀ| ਐਲੀਨ ਤੇ ਜੀਨ ਕ੍ਰੈਚੀਅਨ ਨੇ 10 ਸਤੰਬਰ ਨੂੰ ਆਪਣੇ ਵਿਆਹ ਦੀ 63ਵੀਂ ਵਰ੍ਹੇਗੰਢ ਮਨਾਈ ਸੀ|