ਲੰਡਨ, 11 ਸਤੰਬਰ (ਪੋਸਟ ਬਿਊਰੋ)- ਹੈਂਪਸ਼ਾਇਰ ਇਲਾਕੇ ਵਿੱਚ ਇੱਕ ਭਾਰਤੀ ਮੂਲ ਦੇ ਪਰਵਾਰ `ਤੇ ਕੁਝ ਲੋਕਾਂ ਨੇ ਹਮਲਾ ਕੀਤਾ, ਜਿਸ ਦੌਰਾਨ ਮਮਤਾ ਮਾਥੁਰ ਨਾਂਅ ਦੀ ਔਰਤ ਜ਼ਖ਼ਮੀ ਹੋ ਗਈ।
ਬਾਸਿੰਗਸਟੋਕ ਦੇ ਸਾਊਥ ਵਿਊ ਦੀ ਕੌਮਵਿੱਲ ਰੋਡ ਦੇ ਇੱਕ ਘਰ ਵਿੱਚ ਕੱਲ੍ਹ ਸ਼ਾਮੀ 8.30 ਵਜੇ ਮਮਤਾ ਮਾਥੁਰ `ਤੇ ਦੋ ਲੋਕਾਂ ਨੇ ਹਮਲਾ ਕਰ ਦਿੱਤਾ। ਪਰਵਾਰ ਦੇ ਅਨੁਸਾਰ ਹਮਲਾਵਰ ਗੋਰੇ ਸਨ ਅਤੇ ਉਨ੍ਹਾਂ ਨੇ ਏਸ਼ੀਅਨ ਹੋਣ ਕਰਕੇ ਹਮਲਾ ਕੀਤਾ। ਉਹ ਸੋਚਦੇ ਸਨ ਕਿ ਉਨ੍ਹਾਂ ਕੋਲ ਸੋਨਾ ਹੋਵੇਗਾ। 44 ਸਾਲਾ ਮਮਤਾ ਨੇ ਕਿਹਾ ਕਿ ਇੱਕ ਹਮਲਾਵਰ ਦੇ ਹੱਥ ਵਿੱਚ ਲੋਹੇ ਦੀ ਰਾਡ ਅਤੇ ਸਪਰੇਅ ਦਾ ਕੈਨ ਸੀ। ਮਮਤਾ ਨੇ ਹਮਲਾਵਰ ਦਾ ਬਹਾਦਰੀ ਨਾਲ ਮੁਕਾਬਲਾ ਕੀਤਾ ਅਤੇ ਰੌਲਾ ਪਾਇਆ। ਇਸ ਮੌਕੇ ਉਸ ਦਾ ਪਤੀ ਡਾ. ਰਾਜੀਵ ਤੇ ਤਿੰਨ ਬੱਚੇ ਵੀ ਘਰ ਵਿੱਚ ਦੂਜੇ ਕਮਰੇ ਵਿੱਚ ਸਨ। ਮਮਤਾ ਨੇ ਕਿਹਾ ਕਿ ਉਸ ਨੇ ਵੇਖਿਆ ਕਿ ਉਸ ਦਾ ਪਰਵਾਰ, ਪਤੀ ਤੇ ਬੱਚੇ ਵੀ ਖ਼ਤਰੇ ਵਿੱਚ ਹਨ। ਉਸ ਦਾ ਪਤੀ ਜਦੋਂ ਹਮਲਾਵਰਾਂ ਵੱਲ ਵਧਿਆ ਤਾਂ ਉਹ ਭੱਜ ਗਏ। ਮਮਤਾ ਦੀ ਬੇਟੀ ਨੇ ਪੁਲਸ ਨੂੰ ਫੋਨ ਕਰਕੇ ਬੁਲਾਇਆ। ਹਮਲੇ ਵਿੱਚ ਮਮਤਾ ਦੇ ਸਿਰ ਅਤੇ ਬਾਂਹ `ਤੇ ਸੱਟਾਂ ਲੱਗੀਆਂ, ਜਿਸ ਕਾਰਨ ਉਸਨੂੰ ਦੋ ਦਿਨ ਹਸਪਤਾਲ ਰਹਿਣਾ ਪਿਆ। ਇਸ ਹਮਲੇ ਵਿਚ ਤਿੰਨ ਵਿਅਕਤੀ ਸ਼ਾਮਲ ਦੱਸੇ ਜਾਂਦੇ ਹਨ, ਇੱਕ ਵਿਅਕਤੀ ਨੇ ਮਮਤਾ ਤੇ ਹਮਲਾ ਕੀਤਾ, ਦੂਜਾ ਘਰ ਦੇ ਅੰਦਰ ਖੜਾ ਰਿਹਾ ਅਤੇ ਇੱਕ ਕਾਰ ਵਿੱਚ ਇੰਤਜ਼ਾਰ ਕਰ ਰਿਹਾ ਸੀ। ਪੁਲਸ ਨੇ ਉਕਤ ਮਾਮਲੇ ਵਿੱਚ ਦੋਸ਼ੀਆਂ ਦੀ ਪਛਾਣ ਲਈ ਲੋਕਾਂ ਤੋਂ ਮਦਦ ਮੰਗੀ ਹੈ।