ਸਾਨ ਫਰਾਂਸਿਸਕੋ, 11 ਸਤੰਬਰ (ਪੋਸਟ ਬਿਊਰੋ)- ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਰਾਬਰਟ ਸੀ ਓ ਬ੍ਰਾਇਨ ਨੇ ਕਿਹਾ ਹੈ ਕਿ ਵਾਸ਼ਿੰਗਟਨ ਪੋਸਟ ਦੇ ਸਹਿਯੋਗੀ ਸੰਪਾਦਕ ਬੌਬ ਵੁਡਵਰਡ ਦੀ ਨਵੀਂ ਪੁਸਤਕ ‘ਰੇਜ` ਰਾਸ਼ਟਰਪਤੀ ਟਰੰਪ ਦੇ ਅਹੁਦੇ ਲਈ ਸਭ ਤੋਂ ਵੱਡਾ ਰਾਸ਼ਟਰੀ ਸੁਰੱਖਿਆ ਖ਼ਤਰਾ ਹੋਵੇਗੀ।
ਡਿਪਟੀ ਨੈਸ਼ਨਲ ਸਕਿਓਰਟੀ ਸਲਾਹਕਾਰ ਮੈਥਿਊ ਪੋਟਿੰਗਰ ਵੀ ਇਸ ਗੱਲ ਨਾਲ ਸਹਿਮਤ ਹੋਏ ਹਨ ਅਤੇ ਉਨ੍ਹਾਂ ਦੱਸਿਆ ਕਿ ਚੀਨ ਦੇ ਕੋਰੋਨਾ ਦੇ ਸੰਪਰਕ ਵਿੱਚ ਜਾਣ ਤੋਂ ਬਾਅਦ ਸਪੱਸ਼ਟ ਹੋ ਗਿਆ ਸੀ ਕਿ ਸੰਸਾਰ ਨੂੰ 1918 ਵਿੱਚ ਫਲੂ ਦੀ ਮਹਾਂਮਾਰੀ ਦੇ ਬਰਾਬਰ ਇੱਕ ਸਿਹਤ ਸੰਕਟ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ, ਜਿਸ ਨੇ ਵਿਸ਼ਵ ਭਰ ਵਿੱਚ ਲੱਗਭਗ ਪੰਜ ਕਰੋੜ ਲੋਕਾਂ ਦੀ ਜਾਨ ਲੈ ਲਈ ਸੀ। ਦਸ ਦਿਨਾਂ ਬਾਅਦ ਟਰੰਪ ਨੇ ਵੁਡਵਰਡ ਨੂੰ ਬੁਲਾਇਆ ਅਤੇ ਦੱਸਿਆ ਕਿ ਉਸ ਨੂੰ ਲੱਗਦਾ ਸੀ ਕਿ ਸਥਿਤੀ ਜਨਤਕ ਤੌਰ `ਤੇ ਜਿੱਦਾਂ ਦੱਸੀ ਜਾ ਰਹੀ ਸੀ ਉਸ ਤੋਂ ਕਿਤੇ ਗੰਭੀਰ ਹੈ। ਉਸ ਵਕਤ ਟਰੰਪ ਆਪਣੇ ਦੇਸ਼ ਨੂੰ ਦੱਸ ਰਹੇ ਸਨ ਕਿ ਵਾਇਰਸ ਮੌਸਮੀ ਫਲੂ ਤੋਂ ਭੈੜਾ ਨਹੀਂ ਸੀ, ਉਹ ਭਵਿੱਖਬਾਣੀ ਕਰ ਰਹੇ ਸਨ ਕਿ ਇਹ ਜਲਦੀ ਖ਼ਤਮ ਹੋ ਜਾਵੇਗਾ ਅਤੇ ਜ਼ੋਰ ਦੇ ਕੇ ਕਿਹਾ ਸੀ ਕਿ ਕੋਰੋਨਾ ਅਮਰੀਕੀ ਸਰਕਾਰ ਦੇ ਪੂਰੀ ਤਰ੍ਹਾਂ ਕਾਬੂ ਹੇਠ ਹੈ।
ਡੋਨਾਲਡ ਟਰੰਪ ਨੇ 19 ਮਾਰਚ ਨੂੰ ਵੁਡਵਰਡ ਕੋਲ ਮੰਨਿਆ ਸੀ ਕਿ ਉਸ ਨੇ ਜਾਣਬੁੱਝ ਕੇ ਖ਼ਤਰੇ ਨੂੰ ਘੱਟ ਦੱਸਿਆ ਸੀ, ਕਿਉਂਕਿ ਉਹ ਹਮੇਸ਼ਾਂ ਲਈ ਇਸ ਦਾ ਨਿਪਟਾਰਾ ਕਰਨਾ ਚਾਹੁੰਦਾ ਸੀ। 19 ਮਾਰਚ ਦੇ ਇੰਟਰਵਿਊ `ਚ ਜਦੋਂ ਟਰੰਪ ਨੂੰ ਪੁੱਛਿਆ ਗਿਆ ਕਿ ਉਸ ਨੂੰ ਵਾਇਰਸ ਦੀ ਗੰਭੀਰਤਾ ਲਈ ਮੁੱਖ ਕਾਰਨ ਕਿਉਂ ਬਣਾਇਆ ਗਿਆ ਤਾਂ ਟਰੰਪ ਨੇ ਕਿਹਾ ਤੁਹਾਡੇ ਨਾਲ ਇਮਾਨਦਾਰ ਹੋਣ ਲਈ ਮੈਂ ਕਹਾਂ ਕਿ ਮੈਂ ਹਮੇਸ਼ਾਂ ਇਸ ਨੂੰ ਖਤਮ ਕਰਨਾ ਚਾਹੁੰਦਾ ਸੀ। ਟਰੰਪ ਦੀ ਮਹਾਂਮਾਰੀ ਨਾਲ ਨਜਿੱਠਣ ਦੀ ਪੜਚੋਲ ਤੋਂ ਇਲਾਵਾ ਵੁੱਡਵਰਡ ਦੀ ਨਵੀਂ ਕਿਤਾਬ ‘ਰੇਜ` ਵਿੱਚ ਨਸਲੀ ਸਬੰਧਾਂ, ਉਤਰੀ ਕੋਰੀਆ ਨਾਲ ਕੂਟਨੀਤੀ ਤੇ ਪਿਛਲੇ ਦੋ ਸਾਲਾਂ ਵਿਚ ਉੱਭਰੇ ਹੋਰ ਕਈ ਮੁੱਦਿਆਂ ਨੂੰ ਵਿਸਥਾਰ ਪੂਰਵਕ ਸ਼ਾਮਲ ਕੀਤਾ ਗਿਆ ਹੈ।