ਰੋਮ, 10 ਸਤੰਬਰ (ਪੋਸਟ ਬਿਊਰੋ)- ਜਿਹੜੇ ਲੋਕ ਧੀਆਂ ਦਾ ਕੁੱਖ ਵਿੱਚ ਕਤਲ ਕਰ ਦਿੰਦੇ ਹਨ, ਇਹ ਖਬਰ ਉਨ੍ਹਾਂ ਲਈ ਵਿਸ਼ੇਸ਼ ਹੈ ਕਿ ਇਟਲੀ ਦੀ ਇੱਕ ਪੰਜਾਬਣ ਨੇ ਆਪਣੀ ਯੋਗਤਾ ਦੇ ਦਮ `ਤੇ ਆਪਣੇ ਮਾਪਿਆਂ ਦਾ ਨਾਂਅ ਇਟਲੀ ਵਿੱਚ ਰੁਸ਼ਨਾਇਆ ਹੀ ਨਹੀਂ, ਅੰਤਰਰਾਸ਼ਟਰੀ ਪੱਧਰ `ਤੇ ਮਾਣ-ਸਨਮਾਨ ਦਾ ਵੀ ਸਬੱਬ ਬਣੀ ਹੈ।
ਇਸ ਹੋਣਹਾਰ ਪੰਜਾਬਣ ਦਾ ਨਾਂਅ ਹੈ ਮੇਘਨਾ ਚੌਧਰੀ, ਜਿਸ ਨੂੰ ਪਿੱਛੇ ਜਿਹੇ ਅੰਤਰ ਰਾਸ਼ਟਰੀ ਹਵਾਬਾਜ਼ੀ ਕਾਨੂੰਨ ਦੇ ਕੇਸਾਂ ਨੂੰ ਆਪਣੀ ਸਹਾਇਤਾ ਦੇਣ ਲਈ ਸਲਾਹਕਾਰ ਨਿਯੁਕਤ ਕੀਤਾ ਗਿਆ ਹੈ। ਇਹ ਨਿਯੁਕਤੀ ਵਾਟਸਨ ਫਾਰਲੀ ਐਂਡ ਵਿਲੀਅਮਜ਼ ਇੰਟਰਨੈਸ਼ਨਲ ਲਾਅ ਫਰਮ ਨੇ ਮੇਘਨਾ ਚੌਧਰੀ ਦੀ ਯੋਗਤਾ ਨੂੰ ਦੇਖਦੇ ਹੋਏ ਕੀਤੀ ਹੈ। ਮੇਘਨਾ ਚੌਧਰੀ ਆਪਣੇ ਪਿਤਾ ਜਗਦੀਪ ਰਾਣਾ ਅਤੇ ਮਾਤਾ ਪਾਮੀਲਾ ਦੇਵੀ ਨਾਲ ਵਿਰੋਨਾ ਜ਼ਿਲ੍ਹਾ ਦੇ ਕਸਬਾ ਨੰਗਰੋਲਾ ਰੋਕਾ ਵਿਖੇ ਰਹਿ ਰਹੀ ਹੈ, ਜਿਸ ਨੇ ਲਾਅ ਦੀ ਪੜ੍ਹਾਈ ਦੀ ਸ਼ੁਰੂਆਤ ਵਿਰੋਨਾ ਤੋਂ ਕੀਤੀ ਅਤੇ ਫਿਰ ਇੰਟਰਨੈਸ਼ਨਲ ਲਾਅ ਦੇ ਦਾਅ-ਪੇਚ ਸਿੱਖਣ ਦੀ ਮੁਹਾਰਤ ਬਰਤਾਨੀਆ ਅਤੇ ਫਿਨਲੈਂਡ ਜਾ ਕੇ ਹਾਸਲ ਕੀਤੀ ਸੀ।
ਮੇਘਨਾ ਚੌਧਰੀ ਪੰਜਾਬ ਦੇ ਜ਼ਿਲ੍ਹਾ ਰੋਪੜ ਦੇ ਸ਼ਹਿਰ ਮੋਰਿਡਾ ਨਾਲ ਸਬੰਧਤ ਹੈ ਜੋ ਇਟਲੀ ਦੀ ਪਹਿਲੀ ਪੰਜਾਬਣ ਹੈ ਜਿਸ ਨੂੰ ਅੰਤਰਰਾਸ਼ਟਰੀ ਹਵਾਬਾਜ਼ੀ ਕਾਨੂੰਨ ਦੇ ਕੇਸਾਂ ਨੂੰ ਸਹਾਇਤਾ ਦੇਣ ਲਈ ਸਲਾਹਕਾਰ ਨਿਯੁਕਤ ਕੀਤਾ ਗਿਆ ਹੈ। ਵਾਟਸਨ ਫਾਰਲੀ ਐਂਡ ਵਿਲੀਅਮਜ਼ ਨੇ ਚਾਰ ਨਵੇਂ ਵਕੀਲ ਮੈਟੀਓ ਕੈਸੀਨੀ, ਅਲੇਸੈਂਡ੍ਰੋ ਡੀ ਕਾਰਲੋ, ਆਇਰੀਨ ਡੀ ਬੇਨੀ ਅਤੇ ਮੇਘਨਾ ਚੌਧਰੀ ਨੂੰ ਸ਼ਾਮਲ ਕੀਤਾ ਹੈ ਜਦਕਿ ਹਵਾਬਾਜ਼ੀ ਕਾਨੂੰਨ, ਕਾਰੋਬਾਰੀ ਅੰਤਰ ਰਾਸ਼ਟਰੀਕਰਨ ਅਤੇ ਮੁਕੱਦਮੇਬਾਜ਼ੀ ਵਿੱਚ ਮਾਹਰ ਵਕੀਲ ਡੀ ਕਾਰਲੋ ਸੀਨੀਅਰ ਸਹਾਇਕ ਵਜੋਂ ਕੰਮ ਕਰਨਗੇ।