ਓਨਟਾਰੀਓ, 10 ਸਤੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦਾ ਕਹਿਣਾ ਹੈ ਕਿ ਫੈਡਰਲ ਕੁਆਰਨਟੀਨ ਆਰਡਰਜ਼ ਨੂੰ ਸਹੀ ਢੰਗ ਨਾਲ ਲਾਗੂ ਕਰਵਾਉਣ ਲਈ ਫੈਡਰਲ ਸਰਕਾਰ ਨੂੰ ਕੋਈ ਠੋਸ ਉਪਰਾਲਾ ਕਰਨਾ ਚਾਹੀਦਾ ਹੈ|
ਫੋਰਡ ਨੇ ਆਖਿਆ ਕਿ ਉਹ ਇਸ ਲਈ ਪਰੇਸ਼ਾਨ ਹਨ ਕਿਉਂਕਿ ਮਾਰਚ ਤੋਂ ਹੀ ਓਨਟਾਰੀਓ ਵਿੱਚ 622 ਅਜਿਹੇ ਵਿਅਕਤੀਆਂ ਨੁੰ ਪੁਲਿਸ ਫੜ੍ਹ ਚੁੱਕੀ ਹੈ ਜਿਹੜੇ ਕੁਆਰਨਟੀਨ ਹੁਕਮਾਂ ਦੀ ਅਣਦੇਖੀ ਕਰ ਰਹੇ ਸਨ| ਪਰ ਇਨ੍ਹਾਂ ਵਿੱਚੋਂ ਬਹੁਤਿਆਂ ਨੂੰ ਕੋਈ ਜੁਰਮਾਨਾ ਨਹੀਂ ਲਾਇਆ ਗਿਆ| ਫੋਰਡ ਨੇ ਆਖਿਆ ਕਿ ਸਿਸਟਮ ਟੁੱਟ ਚੁੱਕਿਆ ਹੈ| ਉਨ੍ਹਾਂ ਆਖਿਆ ਕਿ ਉਹ ਚਾਹੁੰਦੇ ਹਨ ਕਿ ਫੈਡਰਲ ਸਰਕਾਰ ਇਸ ਸਿਸਟਮ ਵਿੱਚ ਸੋਧ ਕਰੇ ਜਾਂ ਇਸ ਨੂੰ ਬਦਲੀ ਕਰੇ|
ਉਨ੍ਹਾਂ ਆਖਿਆ ਕਿ ਇਸ ਦੀ ਤਾਂ ਕੋਈ ਤੁਕ ਨਹੀਂ ਬਣਦੀ ਕਿ ਪੁਲਿਸ ਪਹਿਲਾਂ ਇਹ ਵੇਖਣ ਜਾਵੇ ਕਿ ਲੋਕ ਕੁਆਰਨਟੀਨ ਨਿਯਮਾਂ ਦੀ ਪਾਲਣਾ ਕਰ ਰਹੇ ਹਨ ਜਾਂ ਨਹੀਂ ਤੇ ਫਿਰ ਉਲੰਘਣਾਂ ਕਰਨ ਵਾਲਿਆਂ ਉੱਤੇ ਕੋਈ ਚਾਰਜ ਲਾਏ ਬਿਨਾਂ ਮੁੜ ਆਵੇ|