ਟੋਰਾਂਟੋ, 10 ਸਤੰਬਰ (ਪੋਸਟ ਬਿਊਰੋ): ਕਾਉਂਸਲੇਟ ਜਨਰਲ ਆਫ ਇੰਡੀਆ ਵੱਲੋਂ 90 ਸਾਲ ਤੋਂ ਵੱਧ ਉਮਰ ਦੇ ਐਕਸ ਸਰਵਿਸਮੈੱਨ (ਜਿਹੜੇ ਕਾਉਂਸਲੇਟ ਜਨਰਲ ਆਫ ਇੰਡੀਆ, ਟੋਰਾਂਟੋ ਦੀ ਜਿਊਰਿਸਡਿਕਸ਼ਨ ਵਿੱਚ ਰਹਿੰਦੇ ਹਨ) ਦਾ ਸਨਮਾਨ ਕਰਨ ਲਈ ਨਵੀਂ ਪਹਿਲਕਦਮੀ “ਵਰਿਸ਼ਠ ਯੋਧਾ” ਸੁ਼ਰੂ ਕੀਤੀ ਗਈ ਹੈ। ਇਹ ਐਕਸ ਸਰਵਿਸਮੈੱਨ ਭਾਰਤੀ ਫੌਜ, ਨੇਵੀ ਤੇ ਏਅਰ ਫੋਰਸ ਵਿੱਚ ਸੇਵਾ ਨਿਭਾਅ ਚੁੱਕੇ ਹਨ ਤੇ ਫਿਰ ਕੈਨੇਡਾ ਮਾਈਗ੍ਰੇਟ ਕਰ ਚੁੱਕੇ ਹਨ।
ਕੋਵਿਡ-19 ਮਹਾਂਮਾਰੀ ਦੇ ਚੱਲਦਿਆਂ ਸੋਸ਼ਲ ਡਿਸਟੈਂਸਿੰਗ ਸਬੰਧੀ ਦਿਸ਼ਾ ਨਿਰਦੇਸ਼ਾਂ ਦਾ ਪਾਲਣ ਕਰਦਿਆਂ ਤੇ ਇਨ੍ਹਾਂ ਵੈਟਰਨਜ਼ ਦੀ ਸਿਹਤ ਨੂੰ ਧਿਆਨ ਵਿੱਚ ਰੱਖਦਿਆਂ ਕਾਉਂਸਲ ਜਨਰਲ ਤੇ ਕਾਉਂਸਲੇਟ ਦੇ ਅਧਿਕਾਰੀਆਂ ਵੱਲੋਂ ਇਨ੍ਹਾਂ ਵੈਟਰਨਜ਼ ਨੂੰ ਉਨ੍ਹਾਂ ਦੇ ਘਰਾਂ ਵਿੱਚ ਜਾ ਕੇ ਸਨਮਾਨਿਤ ਕੀਤਾ ਗਿਆ। ਕਾਉਂਸਲ ਜਨਰਲ ਅਪੂਰਵਾ ਸ੍ਰੀਵਾਸਤਵ ਵੱਲੋਂ ਦੇਸ਼ ਲਈ ਨਿਭਾਈ ਗਈ ਸੇਵਾ ਬਦਲੇ ਇਨ੍ਹਾਂ ਸਾਬਕਾ ਸੈਨਿਕਾਂ ਨੂੰ ਮੋਮੈਂਟੋ ਤੇ ਸ਼ਾਲ ਦੇ ਕੇ ਸਨਮਾਨਿਤ ਕੀਤਾ ਗਿਆ।
ਇਸ ਦੌਰਾਨ ਸੱਤ ਵੈਟਰਨਜ਼ ਦੀ ਚੋਣ ਕੀਤੀ ਗਈ ਜਿਨ੍ਹਾਂ ਵਿੱਚ ਕੈਪਟਨ ਬਖਸ਼ੀਸ਼ ਸਿੰਘ ਰੰਧਾਵਾ ਤੋਂ ਇਲਾਵਾ ਕਮਾਂਡਰ ਜੋਗਿੰਦਰ ਗੇਈ, ਮੇਜਰ ਦਰਸ਼ਨ ਸਿੰਘ ਸੰਘੇੜਾ, ਕੈਪਟਨ ਮੋਹਿੰਦਰ ਸਿੰਘ, ਸੂਬੇਦਾਰ ਮੇਜਰ ਪ੍ਰੀਤਮ ਸਿੰਘ ਧਾਲੀਵਾਲ, ਸੂਬੇਦਾਰ ਗੱਜਣ ਸਿੰਘ ਮਾਵੀ ਅਤੇ ਨਾਇਬ ਸੂਬੇਦਾਰ ਗੁਰਦਿਆਲ ਸਿੰਘ ਗਰੇਵਾਲ ਨੂੰ ਸਨਮਾਨਿਤ ਕੀਤਾ ਗਿਆ।
ਇੱਥੇ ਦੱਸਣਾ ਬਣਦਾ ਹੈ ਕਿ ਬਖਸ਼ੀਸ਼ ਸਿੰਘ ਰੰਧਾਵਾ, ਗੋਬਿੰਦਰ ਸਿੰਘ ਰੰਧਾਵਾਂ ਦੇ ਪਿਤਾ ਹਨ, ਜੋ ਓਨਟਾਰੀਓ ਸਿੱਖਜ਼ ਕਾਉਂਸਲ ਦੇ ਪ੍ਰਧਾਨ ਤੇ ਮੌਜੂਦਾ ਇੱਕ ਤਰ੍ਹਾਂ ਦੇ ਸਪੋਕਸਪਰਸਨ ਵੀ ਹਨ, ਉਹ ਡਾਊਨਟਾਊਨ ਨਗਰ ਕੀਰਤਨ ਦੀ ਸਟੇਜ ਤੋਂ ਪ੍ਰੇੱਸ ਰਲੀਜ਼ ਜਾਰੀ ਕਰਦਿਆਂ ਸਿੱਖਾਂ ਲਈ ਵੱਖਰੇ ਰਾਜ ਦੀ ਮੰਗ ਦਾ ਮੁੱਦਾ ਉਠਾ ਚੁੱਕੇ ਹਨ ਤੇ ਸਕਾਰਬਰੋ ਗੁਰਦੁਆਰਾ ਸਾਹਿਬਾਨ ਵਿਖੇ ਭਾਰਤੀ ਕਾਉਂਸਲ ਜਨਰਲ ਨੂੰ ਸਟੇਜ ਦੇਣ ਦਾ ਵਿਰੋਧ ਵੀ ਕਰਦੇ ਰਹੇ ਹਨ ਅਤੇ ਕਿਸੇ ਸਮੇਂ ਡਬਲਿਊਐਸਓ ਨਾਲ ਰਲ ਕੇ ਖਾਲਿਸਤਾਨ ਦੀ ਮੰਗ ਕਰਨ ਵਾਲੇ ਮੋਢੀਆਂ ਵਿੱਚੋਂ ਹਨ।