ਟੋਰਾਂਟੋ, 10 ਸਤੰਬਰ (ਪੋਸਟ ਬਿਊਰੋ) : ਇੱਕ ਮਹਿਲਾ ਦੇ ਡਰਿੰਕ ਵਿੱਚ ਕੋਈ ਨਸ਼ੀਲਾ ਪਦਾਰਥ ਮਿਲਾਉਣ ਵਾਲੇ ਵਿਅਕਤੀ ਨੂੰ ਟੋਰਾਂਟੋ ਪੁਲਿਸ ਵੱਲੋਂ ਗ੍ਰਿਫਤਾਰ ਕੀਤਾ ਗਿਆ ਹੈ|
ਅਧਿਕਾਰੀਆਂ ਨੇ ਦੱਸਿਆ ਕਿ ਐਡੀਲੇਡ ਤੇ ਜੌਹਨ ਸਟਰੀਟ ਨੇੜੇ ਸਥਿਤ ਇੱਕ ਬਾਰ ਵਿੱਚ ਬੀਤੇ ਦਿਨੀਂ ਇਹ ਘਟਨਾ ਵਾਪਰੀ| ਪੁਲਿਸ ਨੇ ਦੱਸਿਆ ਕਿ ਇਹ ਵਿਅਕਤੀ ਡੇਟਿੰਗ ਐਪ ਰਾਹੀਂ ਸਬੰਧਤ ਮਹਿਲਾ ਨੂੰ ਮਿਲਿਆ ਸੀ| ਫਿਰ ਦੋਵਾਂ ਨੇ ਡੇਟ ਕਰਨ ਲਈ ਸਹਿਮਤੀ ਪ੍ਰਗਟਾਈ| ਇਹ ਦੋਸ਼ ਲਾਇਆ ਗਿਆ ਹੈ ਕਿ ਜਦੋਂ ਮਹਿਲਾ ਵਾਸ਼ਰੂਮ ਗਈ ਤਾਂ ਇਸ ਵਿਅਕਤੀ ਨੇ ਉਸ ਦੇ ਡਰਿੰਕ ਵਿੱਚ ਕੋਈ ਹਾਨੀਕਾਰਕ ਚੀਜ਼ ਮਿਲਾ ਦਿੱਤੀ|
ਪੁਲਿਸ ਨੇ ਦੱਸਿਆ ਕਿ ਜਦੋਂ ਮਹਿਲਾ ਪਰਤੀ ਤਾਂ ਬਾਰ ਦੇ ਕਰਮਚਾਰੀਆਂ ਵੱਲੋਂ ਉਸ ਨੂੰ ਉਹ ਡਰਿੰਕ ਨਾ ਪੀਣ ਲਈ ਆਖਿਆ ਗਿਆ| ਇਸ ਸਬੰਧ ਵਿੱਚ ਟੋਰਾਂਟੋ ਦੇ 32 ਸਾਲਾ ਨਿੱਕੀ ਸ਼ਕੇਰੀ ਨੇ ਪੁਲਿਸ ਅੱਗੇ ਆਤਮ ਸਮਰਪਣ ਕਰ ਦਿੱਤਾ| ਉਸ ਉੱਤੇ ਸ਼ਰਾਰਤ ਕਰਨ ਤੇ ਹਾਨੀਕਾਰਕ ਪਦਾਰਥ ਦੀ ਵਰਤੋਂ ਕਰਨ ਸਬੰਧੀ ਚਾਰਜ ਲਾਇਆ ਗਿਆ ਹੈ| ਇਸ ਮਾਮਲੇ ਦੀ ਜਾਂਚ ਅਜੇ ਚੱਲ ਰਹੀ ਹੈ|