ਮਿਸੀਸਾਗਾ, 8 ਸਤੰਬਰ (ਪੋਸਟ ਬਿਊਰੋ) : ਮਿਸੀਸਾਗਾ ਤੇ ਓਕਵਿੱਲ ਦੇ ਕਮਿਊਨਿਟੀ ਸੈਂਟਰਜ਼ ਅੱਜ ਤੋਂ ਖੁੱਲ੍ਹਣ ਜਾ ਰਹੇ ਹਨ| ਇਸ ਦੌਰਾਨ ਕੋਵਿਡ-19 ਸਬੰਧੀ ਸਖਤ ਮਾਪਦੰਡਾਂ ਦਾ ਪਾਲਣ ਕਰਨਾ ਹੋਵੇਗਾ|
ਮਿਸੀਸਾਗਾ ਵਿੱਚ ਕਮਿਊਨਿਟੀ ਸੈਂਟਰਜ਼, ਫਿੱਟਨੈੱਸ ਸੈਂਟਰਜ਼, ਇੰਡੋਰ ਪੂਲਜ਼ ਤੇ ਕੁੱਝ ਹੋਰ ਥਾਂਵਾਂ ਵੀ ਅੱਜ ਤੋਂ ਖੁੱਲ੍ਹ ਜਾਣਗੀਆਂ| ਪਰ ਹਾਲਾਤ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਇਨ੍ਹਾਂ ਦੇ ਪ੍ਰੋਗਰਾਮਜ਼ ਵਿੱਚ ਕੁੱਝ ਸੁਧਾਰ ਕੀਤਾ ਗਿਆ ਹੈ| ਕੁੱਝ ਸਿਟੀ ਸੇਵਾਵਾਂ ਵੀ ਅਪੁਆਂਟਮੈਂਟ ਤੋਂ ਬਾਅਦ ਉਪਲਬਧ ਹੋਣਗੀਆਂ| ਇਨ੍ਹਾਂ ਵਿੱਚ ਵਿਆਹ ਦਾ ਲਾਇਸੰਸ ਤੇ ਬਿਜ਼ਨਸ ਲਾਇਸੰਸ ਸ਼ਾਮਲ ਹੈ|
ਓਕਵਿੱਲ ਵੱਲੋਂ ਆਪਣੇ ਪੰਜ ਮੁੱਖ ਕਮਿਊਨਿਟੀ ਸੈਂਟਰ ਖੋਲ੍ਹੇ ਜਾ ਰਹੇ ਹਨ ਤੇ ਇਸ ਦੇ ਨਾਲ ਹੀ ਸਿਕਸਟੀਨ ਮਾਈਲ ਸਪੋਰਟਸ ਕਾਂਪਲੈਕਸ ਨੂੰ ਵੀ ਪਹਿਲਾਂ ਤੋਂ ਹੀ ਬੁੱਕ ਕੀਤੀਆਂ ਗਈਆਂ ਗਤੀਵਿਧੀਆਂ ਤੇ ਇਸ ਦੀ ਸੋਧੀ ਹੋਈ ਵਰਤੋਂ ਨਾਲ ਖੋਲ੍ਹਿਆ ਜਾਵੇਗਾ| ਇਨ੍ਹਾਂ ਫੈਸਿਲਿਟੀਜ਼ ਵਿੱਚ ਦਾਖਲ ਹੋਣ ਵਾਲੇ ਸਟਾਫ ਤੇ ਵਿਜ਼ਿਟਰਜ਼ ਦੀ ਪਹਿਲਾਂ ਸਕਰੀਨਿੰਗ ਕੀਤੀ ਜਾਵੇਗੀ| ਇਮਾਰਤ ਵਿੱਚ ਵੀ ਲੋਕ ਸੀਮਤ ਥਾਂਵਾਂ ਉੱਤੇ ਹੀ ਜਾ ਸਕਣਗੇ ਤੇ ਸੱਭ ਲਈ ਮਾਸਕ ਪਾਉਣੇ ਲਾਜ਼ਮੀ ਹੋਣਗੇ|