ਅਭਿਨੇਤਰੀ ਦਿਵਿਆ ਦੱਤਾ ਦਾ ਕਹਿਣਾ ਹੈ ਕਿ ਫਿਲਮ ਦੇ ਸੈੱਟ 'ਤੇ ਅਕੇਵਾਂ ਤੇ ਲੋੜ ਤੋਂ ਵੱਧ ਭਰੋਸਾ ਹੋਣ ਦੇ ਡਰੋਂ ਉਹ ਹਮੇਸ਼ਾ ਚੰਗੀਆਂ ਭੂਮਿਕਾਵਾਂ ਭਾਲਦੀ ਰਹਿੰਦੀ ਹੈ। ‘ਵੀਰ ਜ਼ਾਰਾ’, ‘ਦਿੱਲੀ-6’ ਅਤੇ ‘ਭਾਗ ਮਿਲਖਾ ਭਾਗ’ ਜਿਹੀਆਂ ਫਿਲਮਾਂ 'ਚ ਸ਼ਾਨਦਾਰ ਅਦਾਕਾਰੀ ਕਰਨ ਵਾਲੀ ਦਿਵਿਆ ਨੇ ਕਿਹਾ ਕਿ ਜੇ ਉਸ ਨੂੰ ਕੋਈ ਪਹਿਲਾਂ ਨਿਭਾਏ ਕਿਰਦਾਰ ਵਾਂਗ ਭੂਮਿਕਾ ਨਿਭਾਉਣ ਨੂੰ ਮਿਲਦੀ ਹੈ ਤਾਂ ਵੀ ਉਹ ਕੋਸ਼ਿਸ਼ ਕਰਦੀ ਹੈ ਕਿ ਉਹ ਇਸ ਨੂੰ ਨਵੇਂ ਸਿਰਿਓਂ ਪੇਸ਼ ਕਰ ਸਕੇ।
ਦਿਵਿਆ ਨੇ ਕਿਹਾ, ‘‘ਮੈਂ ਅਜਿਹੀ ਕੋਈ ਭੂਮਿਕਾ ਨਹੀਂ ਨਿਭਾਉਂਦੀ, ਜਿਸ ਬਾਰੇ ਮੈਨੂੰ ਲੋੜ ਤੋਂ ਵੱਧ ਭਰੋਸਾ ਹੋਵੇ। ਇਸ ਤੋਂ ਮੈਨੂੰ ਡਰ ਲੱਗਦਾ ਹੈ। ਇੱਕੋ ਜਿਹੇ ਕਿਰਦਾਰ ਨੂੰ ਦੁਬਾਰਾ ਵੱਖਰੇ ਢੰਗ ਨਾਲ ਪੇਸ਼ ਕਰਨ ਵਿੱਚ ਮੁਸ਼ਕਲ ਹੁੰਦੀ ਹੈ, ਪਰ ਮੈਂ ਇਸ ਨੂੰ ਨਵੇਂ ਢੰਗ ਨਾਲ ਪੇਸ਼ ਕਰਨ ਦੀ ਕੋਸ਼ਿਸ਼ ਕਰਦੀ ਹਾਂ।” ਦਿਵਿਆ ਦੱਤਾ ਨਿਤਿਨ ਕੱਕੜ ਦੇ ਨਿਰਦੇਸ਼ਨ ਵਿੱਚ ਬਣ ਰਹੀ ਫਿਲਮ ‘ਰਾਮ ਸਿੰਘ ਚਾਰਲੀ’ ਦਿਖਾਈ ਦੇਵੇਗੀ। ਇਹ ਫਿਲਮ ਇਹੋ ਜਿਹੇ ਵਿਅਕਤੀ (ਕੁਮੁਦ ਮਿਸ਼ਰਾ) ਦੀ ਕਹਾਣੀ ਹੈ, ਜੋ ਸਰਕਸ ਬੰਦ ਹੋਣ ਮਗਰੋਂ ਰਿਕਸ਼ਾ ਚਾਲਕ ਬਣ ਜਾਂਦਾ ਹੈ।