ਓਟਵਾ, 7 ਸਤੰਬਰ (ਪੋਸਟ ਬਿਊਰੋ) : ਓਟਵਾ ਪਬਲਿਕ ਹੈਲਥ ਅਧਿਕਾਰੀਆਂ ਵੱਲੋਂ ਕੋਵਿਡ-19 ਦੇ 25 ਨਵੇਂ ਮਾਮਲਿਆਂ ਦੀ ਪੁਸ਼ਟੀ ਕੀਤੀ ਗਈ ਹੈ ਇਨ੍ਹਾਂ ਵਿੱਚੋਂ ਕੁੱਝ ਮਾਮਲੇ ਸਕੂਲਾਂ ਨਾਲ ਜੁੜੇ ਹੋਏ ਹਨ ਤੇ ਉਟਾਉਏ ਵਿੱਚ ਇੱਕ ਮੌਤ ਹੋਣ ਦੀ ਵੀ ਖਬਰ ਮਿਲੀ ਹੈ|
ਇਸ ਸਮੇਂ ਓਟਵਾ ਵਿੱਚ ਮਹਾਂਮਾਰੀ ਸ਼ੁਰੂ ਹੋਣ ਤੋਂ ਲੈ ਕੇ ਹੁਣ ਤੱਕ ਕੋਵਿਡ-19 ਦੇ 3098 ਮਾਮਲੇ ਸਾਹਮਣੇ ਆ ਚੁੱਕੇ ਹਨ| ਇਨ੍ਹਾਂ ਮਾਮਲਿਆਂ ਵਿੱਚੋਂ 85 ਫੀ ਸਦੀ ਲੋਕ ਠੀਕ ਹੋ ਗਏ ਮੰਨੇ ਜਾ ਰਹੇ ਹਨ| ਓਟਵਾ ਪਬਲਿਕ ਹੈਲਥ (ਓਪੀਐਚ) ਅਨੁਸਾਰ ਸੋਮਵਾਰ ਨੂੰ ਸਾਹਮਣੇ ਆਏ ਮਾਮਲਿਆਂ ਵਿੱਚ 25 ਵਿੱਚੋਂ 14 ਆਪਣੇ 30ਵਿਆਂ ਤੋਂ ਉੱਪਰ ਦੇ ਲੋਕ ਸਨ|
ਦੇਸ਼ ਦੀ ਰਾਜਧਾਨੀ ਵਿੱਚ ਕਰੋਨਾਵਾਇਰਸ ਦੇ ਇਸ ਸਮੇਂ 211 ਐਕਟਿਵ ਕੇਸ ਹਨ, ਜੋ ਕਿ ਪਿਛਲੇ ਸੋਮਵਾਰ ਦੇ ਮੁਕਾਬਲੇ ਸੱਤ ਘੱਟ ਹਨ| ਸਿਟੀ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ 267 (ਪਹਿਲਾਂ ਵਾਲੀ ਹੀ) ਉੱਤੇ ਹੀ ਬਰਕਰਾਰ ਹੈ| ਲਾਂਗ ਟਰਮ ਕੇਅਰ ਫੈਸਿਲਿਟੀਜ਼ ਤੇ ਚਾਈਲਡ ਕੇਅਰ ਸੈਂਟਰਜ਼ ਆਦਿ ਵਰਗੇ ਲੋਕਲ ਇੰਸਟੀਚਿਊਟਸ ਵਿੱਚ 16 ਆਊਟਬ੍ਰੇਕਸ ਹੋ ਚੁੱਕੀਆਂ ਹਨ|
ਸੋਮਵਾਰ ਨੂੰ ਓਟਵਾ ਪਬਲਿਕ ਹੈਲਥ ਵੱਲੋਂ ਪੰਜ ਸਕੂਲਾਂ ਵਿੱਚ ਕੋਵਿਡ-19 ਦੇ ਪਾਜ਼ੀਟਿਵ ਮਾਮਲੇ ਪਾਏ ਜਾਣ ਦੀ ਪੁਸ਼ਟੀ ਕੀਤੀ ਗਈ| ਨੈਪੀਅਨ ਦੇ ਕਾਲੇਜ ਕੈਥੋਲਿਕ ਫਰੈਂਕੋ ਓਏਸਟ ਦਾ ਇੱਕ ਮੁਲਾਜ਼ਮ ਕੋਵਿਡ-19 ਪਾਜ਼ੀਟਿਵ ਪਾਇਆ ਗਿਆ| ਇਸ ਤੋਂ ਇਲਾਵਾ ਕਨਾਟਾ ਦੇ ਇਕੋਲ ਐਲੀਮੈਂਟੇਅਰ ਕੈਥੋਲਿਕ ਰੌਜਰ ਸੇਂਟ ਡੈਨਿਸ, ਨੈਪੀਅਨ ਦੇ ਇਕੋਲ ਐਲੀਮੈਂਟੇਅਰ ਕੈਥੋਲਿਕ ਲੌਰੀਅਰ ਕੈਰੀਅਰ, ਲੋਅਰਟਾਊਨ ਦੇ ਇਕੋਲ ਐਲੀਮੈਂਟੇਅਰ ਕੈਥੋਲਿਕ ਸੇਂਟ ਐਨ ਤੇ ਹਿੰਟਨਬਰਗ ਦੇ ਇਕੋਲ ਐਲੀਮੈਂਟੇਅਰ ਕੈਥੋਲਿਕ ਸੇਂਟ ਫਰੈਂਕੌਇਸ ਡੀ ਐਸਿਸ ਸਕੂਲਾਂ ਵਿੱਚ ਵੀ ਕੋਵਿਡ-19 ਦੇ ਇੱਕ ਇੱਕ ਮਾਮਲੇ ਪਾਏ ਗਏ|
ਇਹ ਸਾਰੇ ਐਲੀਮੈਂਟਰੀ ਸਕੂਲ ਕੌਂਸੇਲ ਡੈਸ ਇਕੋਲਜ ਕੈਥੋਲਿਕਜ਼ ਡੂ ਸੈਂਟਰ-ਐਸਟ, ਫਰੈਂਚ ਕੈਥੋਲਿਕ ਬੋਰਡ ਦਾ ਹਿੱਸਾ ਹਨ ਤੇ ਇਨ੍ਹਾਂ ਸਕੂਲਾਂ ਵੱਲੋਂ 3 ਸਤੰਬਰ ਤੋਂ ਕਲਾਸਾਂ ਸ਼ੁਰੂ ਕੀਤੀਆਂ ਗਈਆਂ ਸਨ| ਇਸ ਤੋਂ ਇਲਾਵਾ ਵੈਸਟਰਨ ਕਿਊਬਿਕ ਹੈਲਥ ਅਥਾਰਟੀ ਵੱਲੋਂ ਸੋਮਵਾਰ ਨੂੰ ਇੱਕ ਮੌਤ ਤੇ ਸੱਤ ਨਵੇਂ ਮਾਮਲਿਆਂ ਦੀ ਪੁਸ਼ਟੀ ਕੀਤੀ ਗਈ|