ਕਿਸਮਤ ਕਦੋਂ ਚਮਕ ਜਾਏ ਤੇ ਇੱਕ ਚੰਗੀ ਫਿਲਮ ਮਿਲ ਜਾਏ, ਇਹ ਇੰਡਸਟਰੀ ਵਿੱਚ ਕਿਹਾ ਨਹੀਂ ਜਾ ਸਕਦਾ। ਸ਼ਰਮਨ ਜੋਸ਼ੀ ਦੇ ਕਰੀਅਰ ਦੀ ਸਭ ਤੋਂ ਵੱਡੀ ਫਿਲਮ ‘ਥ੍ਰੀ ਇਡੀਅਟਸ’ ਹੀ ਲੈ ਲਓ। ਸ਼ਰਮਨ ਨੂੰ ਇਹ ਫਿਲਮ ਵਾਸ਼ਰੂਮ ਵਿੱਚ ਆਫਰ ਹੋਈ ਸੀ। ਇੱਕ ਲਾਈਵ ਚੈਟ ਦੌਰਾਨ ਸ਼ਰਮਨ ਨੇ ਦੱਸਿਆ ਕਿ ਉਹ ਰਾਜਕੁਮਾਰ ਹਿਰਾਨੀ ਨੂੰ ਇੱਕ ਥੀਏਟਰ ਵਿੱਚ ਅਚਾਨਕ ਮਿਲੇ ਸਨ। ਸ਼ਰਮਨ ਮੁਤਬਾਕ ‘ਮੇਰੀ ਇੱਕ ਮੀਟਿੰਗ ਸੀ ਅਤੇ ਮੀਟਿੰਗ ਵਿੱਚ ਸਮਾਂ ਸੀ। ਮੈਂ ਫਿਲਮ ਦੇਖਣ ਥੀਏਟਰ ਚਲਾ ਗਿਆ। ਉਥੇ ਰਾਜ ਕੁਮਾਰ ਹਿਰਾਨੀ ਸਰ ਕੁਝ ਲੋਕਾਂ ਨਾਲ ਗੱਲਾਂ ਕਰ ਰਹੇ ਸਨ। ਦਰਅਸਲ ਉਹ ਆਪਣੀ-ਆਪਣੀ ਫਿਲਮ ਦਾ ਟ੍ਰੇਲਰ ਵੱਡੀ ਸਕਰੀਨ 'ਤੇ ਦੇਖਣ ਆਏ ਸਨ। ਮੈਂ ਉਨ੍ਹਾਂ ਨੂੰ ਡਿਸਟਰਬ ਕਰਨਾ ਠੀਕ ਨਹੀਂ ਸਮਝਿਆ। ਟਿਕਟ ਕਾਊਂਟਰ 'ਤੇ ਗਿਆ, ਉਥੇ ਟਿਕਟ ਨਹੀਂ ਮਿਲੀ।
ਮੈਂ ਵਾਪਸ ਜਾਣ ਲੱਗਾ ਤਾਂ ਰਾਜ ਕੁਮਾਰ ਸਰ ਨੇ ਮੇਰਾ ਨਾਂਅ ਲੈ ਕੇ ਬੁਲਾਇਆ। ਮੈਂ ਖੁਸ਼ ਹੋਇਆ ਕਿ ਮੇਰਾ ਨਾਂਅ ਉਨ੍ਹਾਂ ਨੂੰ ਪਤਾ ਹੈ। ਉਨ੍ਹਾਂ ਕਿਹਾ ਕਿ ਤੇਰਾ ਕੰਮ ਮੈਨੂੰ ਪਸੰਦ ਆਇਆ ਹੈ। ਇੱਕ ਫਿਲਮ ਲਈ ਤੇਰੇ ਨਾਲ ਗੱਲ ਕਰਨੀ ਹੈ। ਮੈਂ ਸੰਪਰਕ ਕਰਾਂਗਾ। ਚਾਰ-ਪੰਜ ਮਹੀਨੇ ਬੀਤ ਗਏ। ਫਿਰ ਇੱਕ ਆਡੀਟੋਰੀਅਮ ਦੇ ਵਾਸ਼ਰੂਮ ਵਿੱਚ ਅਸੀਂ ਮਿਲੇ। ਉਨ੍ਹਾਂ ਨੇ ਕਿਹਾ ਕਿ ਇੱਕ ਫਿਲਮ ਹੈ, ਜਿਸ ਲਈ ਤੇਰੇ ਬਾਰੇ ਸੋਚ ਰਿਹਾ ਹਾਂ। ਫਿਰ ਦੋ-ਤਿੰਮਨ ਮਹੀਨੇ ਨਿਕਲ ਗਏ। ਅਜੀਬ ਗੱਲ ਇਹ ਹੈ ਕਿ ਸਾਡੀ ਮੁਲਾਕਾਤ ਫਿਰ ਤੋਂ ਉਸੇ ਆਡੀਟੋਰੀਅਮ ਦੇ ਵਾਸ਼ਰੂਮ ਵਿੱਚ ਹੋਈ। ਉਸ ਦਿਨ ਉਨ੍ਹਾਂ ਨੇ ਕਿਹਾ ਕਿ ਦਫਤਰ ਆ ਜਾਓ। ਮੈਂ ਆਡੀਸ਼ਨ ਦਿੱਤਾ ਅਤੇ ਇਹ ਫਿਲਮ ਮੈਨੂੰ ਮਿਲ ਗਈ।”