ਸਾਬਕਾ ਮਿਸ ਇੰਡੀਆ ਪੂਜਾ ਬੱਤਰਾ ਦੀ ਪਹਿਲੀ ਹਿੰਦੀ ਫਿਲਮ ‘ਵਿਰਾਸਤ’ ਸੀ। ਇਹ ਇੱਕ ਤਮਿਲ ਫਿਲਮ ਦੀ ਰੀਮੇਕ ਸੀ। ਮੂਲ ਫਿਲਮ ਦੀ ਕਹਾਣੀ ਕਮਲ ਹਾਸਨ ਨੇ ਲਿਖੀ ਸੀ। ਪੂਜਾ ਨੇ ਇੱਕ ਲਾਈਵ ਚੈਟ ਦੌਰਾਨ ਦੱਸਿਆ, ‘ਅਨਿਲ ਕਪੂਰ, ਅਮਰੀਸ਼ ਪੁਰੀ, ਤੱਬੂ ਵਰਗੇ ਦਿੱਗਜ ਕਲਾਕਾਰਾਂ ਵਿੱਚ ਮੈਂ ਨਵੀਂ ਸੀ। ਸੈੱਟ 'ਤੇ ਮੈਨੂੰ ਕਿਸੇ ਨੇ ਕੁਝ ਨਹੀਂ ਦੱਸਿਆ ਸੀ। ਮੈਂ ਸਵੇਰੇ ਸੱਤ ਤੋਂ ਨੌਂ ਵਜੇ ਤੱਕ ਡ੍ਰੈੱਸ ਰਿਹਰਸਲ ਕਰਦੀ ਸੀ। ਅਸੀਂ ਡ੍ਰੈੱਸ ਪਹਿਨ ਕੇ ਮੈਦਾਨ ਵਿੱਚ ਦੌੜਦੇ-ਭੱਜਦੇ ਸੀ। ਕਦੇ ਮਟਕੀ ਤੋੜਦੀ, ਕਦੇ ਉਨ੍ਹਾਂ ਨੂੰ ਸਿਰ 'ਤੇ ਰੱਖਦੀ, ਪਾਣੀ ਪੀਣਾ ਵਰਗੇ ਕੰਮ ਕਰਦੀ ਸੀ। ਮੈਨੂੰ ਅੰਦਾਜ਼ਾ ਨਹੀਂ ਸੀ ਕਿ ਕੀ ਹੋ ਰਿਹਾ ਹੈ। ਦੁਪਹਿਰ ਵਿੱਚ ਅਸੀਂ ਸ਼ੂਟਿੰਗ ਕਰਦੇ ਸਾਂ। ਅਨਿਲ ਨੇ ਦੱਸਿਆ ਕਿ ਸਾਡੇ ਵਿੱਚ ਬ੍ਰੇਕਅਪ ਦਾ ਬਹੁਤ ਅਹਿਮ ਸੀਨ ਹੈ। ਅਸੀਂ ਕਮਰੇ ਵਿੱਚ ਜਾ ਕੇ ਰੋਣ ਦੀ ਰਿਹਰਸਲ ਕੀਤੀ। ਮੈਨੂੰ ਦੱਸਿਆ ਜਾਂਦਾ ਸੀ ਕਿ ਅਗਲੇ ਦਿਨ ਇਹ ਸੀਨ ਸ਼ੂਟ ਹੋਵੇਗਾ। ਬਾਅਦ ਵਿੱਚ ਪਤਾ ਲੱਗਾ ਕਿ ਦੌੜਨਾ-ਭੱਜਣਾ ਵਗੈਰਾ ‘ਢੋਲ ਬਜਨੇ ਲਗਾ...’ ਵਾਲਾ ਗਾਣਾ ਸੀ। ਉਂਜ ਓਦੋਂ ਤੱਕ ‘ਢੋਲ ਬਜਨੇ ਲਗਾ...’ ਗਾਣਾ ਬਣਿਆ ਹੀ ਨਹੀਂ ਸੀ। ਤਦ ਅਸੀਂ ਬਿਨਾਂ ਗਾਣੇ ਦੇ ਹੀ ਸੈੱਟ 'ਤੇ ਸੀ। ਮੈਂ ਅੱਜ ਜਦੋਂ ਫਿਲਮ ਦੇਖਦੀ ਹਾਂ ਤਾਂ ਲੱਗਦਾ ਹੈ ਕਿ ਉਨ੍ਹਾਂ ਨੇ ਕਈ ਸ਼ਾਟਸ ਇਕੱਠੇ ਜੋੜ ਕੇ ਗਾਣਾ ਬਣਾਇਆ ਸੀ।”
ਤੱਬੂ ਨਾਲ ਕੰਮ ਕਰਨ ਦੇ ਅਨੁਭਵ ਬਾਰੇ ਉਸ ਨੇ ਦੱਸਿਆ, ‘‘ਉਹ ਬਹੁਤ ਪ੍ਰੋਫੈਸ਼ਨਲ ਹਨ। ਮੇਰੇ ਨਾਲ ਉਨ੍ਹਾਂ ਦਾ ਦੋਸਤਾਨਾ ਵਿਹਾਰ ਸੀ। ਮੈਂ ਜਦ ਸ਼ੂਟਿੰਗ ਨਹੀਂ ਕਰਦੀ ਸੀ ਤਾਂ ਉਨ੍ਹਾਂ ਨੂੰ ਸ਼ੂਟਿੰਗ ਕਰਦੇ ਦੇਖਦੀ ਸੀ। ਉਹ ਕਿਵੇਂ ਪ੍ਰਫਾਰਮ ਕਰਦੀ ਹੈ। ਮੈਨੂੰ ਕਿਸੇ ਨੇ ਕਿਹਾ ਸੀ ਕਿ ਕੰਮ ਪ੍ਰਤੀ ਸਮਰਪਣ ਤੈਨੂੰ ਉਨ੍ਹਾਂ ਕੋਲੋਂ ਸਿੱਖਣਾ ਚਾਹੀਦਾ ਹੈ। ਮੈਂ ਤਦ ਬਾਕਾਇਦਾ ਕਾਗਜ਼ ਕਲਮ ਲੈ ਕੇ ਬੈਠਦੀ ਸੀ।”