ਜੀਜੀ ਨੂੰ ਹਟਾਉਣ ਦਾ ਕੋਈ ਇਰਾਦਾ ਨਹੀਂ : ਟਰੂਡੋ
ਓਟਵਾ, 2 ਸਤੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਜੂਲੀ ਪੇਯੈਟ ਨੂੰ ਕਮਾਲ ਦੀ ਗਵਰਨਰ ਜਨਰਲ ਦੱਸਿਆ| ਉਨ੍ਹਾਂ ਆਖਿਆ ਕਿ ਹਾਲ ਦੀ ਘੜੀ ਉਨ੍ਹਾਂ ਦਾ ਕੋਈ ਇਰਾਦਾ ਨਹੀਂ ਹੈ ਕਿ ਉਹ ਰੀਡੋ ਹਾਲ ਵਿੱਚ ਤੰਗ ਪਰੇਸ਼ਾਨ ਕੀਤੇ ਜਾਣ ਦੇ ਲਾਏ ਜਾ ਰਹੇ ਦੋਸ਼ਾਂ ਦੇ ਚੱਲਦਿਆਂ ਮਹਾਰਾਣੀ ਐਲਿਜ਼ਾਬੈੱਥ ਨੂੰ ਪੇਯੈਟ ਦੀ ਥਾਂ ਕਿਸੇ ਹੋਰ ਨੂੰ ਗਵਰਨਰ ਜਨਰਲ ਥਾਪਣ ਲਈ ਆਖਣ|
ਟਰੂਡੋ ਨੇ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਰੀਡੋ ਹਾਲ ਵਿੱਚ ਕੰਮਕਾਜ ਦੇ ਹਾਲਾਤ ਦਾ ਜਾਇਜ਼ਾ ਲੈਣ ਤੇ ਹਕੀਕਤ ਦਾ ਪਤਾ ਲਾਉਣ ਲਈ ਪ੍ਰਿਵੀ ਕਾਉਂਸਲ ਆਫਿਸ ਨੇ ਪਹਿਲਾਂ ਹੀ ਤੀਜੀ ਧਿਰ ਤੋਂ ਮੁਲਾਂਕਣ ਕਰਵਾਉਣ ਦਾ ਫੈਸਲਾ ਕੀਤਾ ਹੈ| ਟਰੂਡੋ ਨੇ ਆਖਿਆ ਕਿ ਇਸ ਸਮੇਂ ਸਾਡੇ ਕੋਲ ਕਮਾਲ ਦੀ ਗਵਰਨਰ ਜਨਰਲ ਹੈ| ਮਹਾਂਮਾਰੀ ਦੌਰਾਨ ਹੋਰ ਕਿਸੇ ਤਰ੍ਹਾਂ ਦੀ ਕੋਈ ਗੱਲ ਕਿਸੇ ਨੂੰ ਨਹੀਂ ਸੁੱਝ ਰਹੀ ਤੇ ਨਾ ਹੀ ਕਿਸੇ ਨੂੰ ਵੀ ਸੰਵਿਧਾਨਕ ਸੰਕਟ ਨਜ਼ਰ ਆ ਰਿਹਾ ਹੈ|
ਜ਼ਿਕਰਯੋਗ ਹੈ ਕਿ ਪਬਲਿਕ ਸਰਵੈਂਟਸ ਤੇ ਰੀਡੋ ਹਾਲ ਦੇ ਸਾਬਕਾ ਕਰਮਚਾਰੀਆਂ ਸਮੇਤ 20 ਤੋਂ ਵੱਧ ਲੋਕਾਂ ਨੇ ਇਹ ਮੰਨਿਆ ਹੈ ਕਿ ਪੇਯੈਟ ਦੇ ਇਸ ਤਰ੍ਹਾਂ ਦੇ ਗਲਤ ਵਿਵਹਾਰ ਦੇ ਉਹ ਆਪ ਚਸ਼ਮਦੀਦ ਗਵਾਹ ਹਨ ਤੇ ਜਾਂ ਫਿਰ ਉਨ੍ਹਾਂ ਨਾਲ ਆਪ ਅਜਿਹਾ ਸਲੂਕ ਕੀਤਾ ਗਿਆ ਹੈ|