ਓਟਵਾ, 13 ਅਗਸਤ (ਪੋਸਟ ਬਿਊਰੋ) : ਹੈਲਥ ਕੈਨੇਡਾ ਵੱਲੋਂ ਲੋਕਾਂ ਨੂੰ ਚੇਤਾਵਨੀ ਦਿੱਤੀ ਜਾ ਰਹੀ ਹੈ ਕਿ ਮੈਰੀਯੁਆਨਾ ਵਰਗੀਆਂ ਨਸ਼ੀਲੀਆਂ ਵਸਤਾਂ ਨੂੰ ਬੱਚਿਆਂ ਦੀ ਪਹੁੰਚ ਤੋਂ ਦੂਰ ਰੱਖਿਆ ਜਾਵੇ|
ਵਿਭਾਗ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਨਸ਼ੇ ਵਾਲੀਆਂ ਇਸ ਤਰ੍ਹਾਂ ਦੀਆਂ ਵਸਤਾਂ ਗਲਤੀ ਨਾਲ ਖਾਣ ਕਾਰਨ ਕਈ ਬੱਚਿਆਂ ਨੂੰ ਹਸਪਤਾਲ ਭਰਤੀ ਕਰਵਾਉਣਾ ਪੈਂਦਾ ਹੈ| ਇਹ ਮੈਰੀਯੁਆਨਾ ਵਾਲੀਆਂ ਕੈਂਡੀਜ਼, ਗੰਮੀ ਬੀਅਰਜ਼ ਜਾਂ ਹੋਰ ਫੂਡ ਆਮ ਕੈਂਡੀ ਵਰਗੇ ਹੀ ਨਜ਼ਰ ਆਉਂਦੇ ਹਨ| ਇਨ੍ਹਾਂ ਨੂੰ ਅਜਿਹੀਆਂ ਥਾਂਵਾਂ ਉੱਤੇ ਰੱਖਿਆ ਜਾਣਾ ਚਾਹੀਦਾ ਹੈ ਜਿੱਥੇ ਬੱਚੇ ਆਸਾਨੀ ਨਾਲ ਨਾ ਪਹੁੰਚ ਸਕਣ ਨਾ ਕਿ ਰੈਫਰੀਜਰੇਟਰ ਤੇ ਫਰੀਜ਼ਰਜ਼ ਆਦਿ ਵਿੱਚ, ਜਿੱਥੇ ਬੱਚੇ ਆਸਾਨੀ ਨਾਲ ਪਹੁੰਚ ਸਕਦੇ ਹਨ|
ਹੈਲਥ ਕੈਨੇਡਾ ਵੱਲੋਂ ਲੋਕਾਂ ਨੂੰ ਮੈਰੀਯੁਆਨਾ ਨਾਲ ਜੁੜੀਆਂ ਵਸਤਾਂ ਅਜਿਹੀ ਥਾਂ Aੁੱਤੇ ਰੱਖਣ ਲਈ ਆਖਿਆ ਜਾ ਰਿਹਾ ਹੈ ਜਿੱਥੇ ਬੱਚੇ ਉਨ੍ਹਾਂ ਨੂੰ ਲੱਭ ਨਾ ਸਕਣ| ਇਸ ਤੋਂ ਇਲਾਵਾ ਸਿਰਫ ਕਾਨੂੰਨੀ ਵਸਤਾਂ ਖਰੀਦਣ ਲਈ ਆਖਿਆ ਗਿਆ| ਇਸ ਤੋਂ ਇਲਾਵਾ ਇਨ੍ਹਾਂ ਵਸਤਾਂ ਦੀ ਪੈਕੇਜਿੰਗ ਸਧਾਰਨ ਰੱਖਣ ਦੀ ਵੀ ਅਪੀਲ ਕੀਤੀ ਜਾਂਦੀ ਰਹੀ ਹੈ ਤਾਂ ਕਿ ਬੱਚਿਆਂ ਨੂੰ ਆਕਰਸ਼ਕ ਨਾ ਲੱਗਣ|
ਜ਼ਿਕਰਯੋਗ ਹੈ ਕਿ ਕੈਨੇਡਾ ਵਿੱਚ ਮਨੋਰੰਜਨ ਲਈ ਮੈਰੀਯੁਆਨਾ ਨੂੰ ਅਕਤੂਬਰ 2018 ਵਿੱਚ ਕਾਨੂੰਨੀ ਜਾਮਾ ਪਹਿਨਾਇਆ ਗਿਆ| ਪਰ ਮੈਰੀਯੁਆਨਾ ਵਾਲੇ ਫੂਡ ਤੇ ਡਰਿੰਕਜ਼ ਸਿਰਫ ਪਿਛਲੇ ਸਾਲ ਦੇ ਅੰਤ ਵਿੱਚ ਹੀ ਮਿਲਣ ਲਗੇ|