ਬੈਰੂਤ ਧਮਾਕੇ ਤੋਂ ਬਾਅਦ ਲੈਬਨਾਨ
ਕੈਬਨਿਟ ਨੇ ਦਿੱਤਾ ਅਸਤੀਫਾ

ਬੈਰੂਤ, 10 ਅਗਸਤ (ਪੋਸਟ ਬਿਊਰੋ) : ਪਿਛਲੇ ਹਫਤੇ ਬੈਰੂਤ ਵਿੱਚ ਹੋਏ ਧਮਾਕੇ ਤੋਂ ਬਾਅਦ ਲੋਕਾਂ ਦੇ ਫੁੱਟੇ ਰੋਹ ਮਗਰੋਂ ਲੈਬਨਾਨ ਸਰਕਾਰ ਨੇ ਸੋਮਵਾਰ ਨੂੰ ਅਸਤੀਫਾ ਦੇ ਦਿੱਤਾ| ਸੁਧਾਰਾਂ ਦੀ ਮੰਗ ਦੇ ਚੱਲਦਿਆਂ ਸਰਕਾਰ ਵੱਲੋਂ ਚੁੱਕੇ ਗਏ ਇਸ ਕਦਮ ਤੋਂ ਬਾਅਦ ਸਥਿਤੀ ਕਾਫੀ ਅਸਥਿਰਤਾ ਵਾਲੀ ਬਣ ਗਈ ਹੈ|
ਸਿਹਤ ਮੰਤਰੀ ਹਾਮਦ ਹਸਨ ਨੇ ਦੱਸਿਆ ਕਿ ਕੈਬਨਿਟ ਦੇ ਸਾਂਝੇ ਅਸਤੀਫੇ ਨੂੰ ਲੈ ਕੇ ਪ੍ਰਧਾਨ ਮੰਤਰੀ ਹਸਨ ਦਾਇਬ ਰਾਸ਼ਟਰਪਤੀ ਦੀ ਰਿਹਾਇਸ਼ਗਾਹ ਵੱਲ ਗਏ| 4 ਅਗਸਤ ਨੂੰ ਹੋਏ ਧਮਾਕੇ ਤੋਂ ਬਾਅਦ ਸਰਕਾਰ ਵਿਰੋਧੀ ਮੁਜ਼ਾਹਰਿਆਂ ਤੋਂ ਬਾਅਦ ਇਹ ਨਵਾਂ ਫੇਰਬਦਲ ਵੇਖਣ ਨੂੰ ਮਿਲ ਰਿਹਾ ਹੈ| ਉਸ ਧਮਾਕੇ ਵਿੱਚ ਵੱਡੀ ਪੱਧਰ ਉੱਤੇ ਤਬਾਹੀ ਮਚੀ ਸੀ ਤੇ 160 ਲੋਕ ਮਾਰੇ ਗਏ ਸਨ ਜਦਕਿ 6000 ਹੋਰ ਜ਼ਖ਼ਮੀ ਹੋ ਗਏ ਸਨ|
ਭ੍ਰਿਸ਼ਟਾਚਾਰ, ਅਸਮਰੱਥਾ ਤੇ ਕੁਪ੍ਰਬੰਧਾਂ ਕਾਰਨ ਅਕਤੂਬਰ ਤੋਂ ਹੀ ਇਸ ਸਰਕਾਰ ਖਿਲਾਫ ਮੁਜ਼ਾਹਰੇ ਚੱਲ ਰਹੇ ਸਨ| ਧਮਾਕੇ ਤੋਂ ਬਾਅਦ ਤਾਂ ਸਥਿਤੀ ਕਾਬੂ ਤੋਂ ਬਾਹਰ ਹੀ ਹੋ ਗਈ ਤੇ ਭਰੇ ਪੀਤੇ ਲੋਕਾਂ ਦਾ ਗੁੱਸਾ ਫੁੱਟ ਪਿਆ| ਜ਼ਿਕਰਯੋਗ ਹੈ ਕਿ 1990 ਵਿੱਚ ਖਤਮ ਹੋਈ ਖਾਨਾਜੰਗੀ ਤੋਂ ਬਾਅਦ ਤੋਂ ਹੀ ਕੁਲੀਨ ਤੰਤਰ ਸੱਤਾ ਉੱਤੇ ਕਬਜਾ ਜਮਾਈ ਬੈਠਾ ਸੀ| ਇੱਥੋਂ ਤੱਕ ਕਿ ਕਿਸੇ ਕਾਬਲ ਤੇ ਭਰੋਸੇਯੋਗ ਸਿਆਸੀ ਸ਼ਖਸੀਅਤ, ਜਿਸ ਦੇ ਇਨ੍ਹਾਂ ਨਾਲ ਸਬੰਧ ਨਾ ਹੋਣ, ਦਾ ਮਿਲ ਪਾਉਣਾ ਵੀ ਮੁਸ਼ਕਲ ਹੋਇਆ ਪਿਆ ਸੀ|
ਹਾਲਾਂਕਿ ਇਸ ਤਬਾਹੀ ਤੋਂ ਬਾਅਦ ਦਾਇਬ ਦਾ ਅਸਤੀਫਾ ਕੋਈ ਮਾਇਨੇ ਨਹੀਂ ਰੱਖਦਾ ਤੇ ਉਹ ਹਾਲ ਦੀ ਘੜੀ ਅਹੁਦਾ ਛੱਡਣਾ ਵੀ ਨਹੀਂ ਸਨ ਚਾਹੁੰਦੇ ਕਿਉਂਕਿ ਦੋ ਦਿਨ ਪਹਿਲਾਂ ਹੀ ਟੀਵੀ Aੁੱਤੇ ਦਿੱਤੇ ਭਾਸ਼ਣ ਵਿੱਚ ਉਨ੍ਹਾਂ ਆਖਿਆ ਸੀ ਕਿ ਉਹ ਦੋ ਮਹੀਨੇ ਆਪਣੇ ਅਹੁਦੇ ਉੱਤੇ ਬਣੇ ਰਹਿਣਗੇ ਤਾਂ ਕਿ ਵੱਖ ਵੱਖ ਧੜੇ ਸੁਧਾਰਾਂ ਲਈ ਰੋਡਮੈਪ ਤਿਆਰ ਕਰਨ ਉੱਤੇ ਸਹਿਮਤ ਹੋ ਸਕਣ| ਪਰ ਇਸ ਵਾਰੀ ਉਨ੍ਹਾਂ ਦੀ ਦਾਲ ਨਹੀਂ ਗਲੀ ਕਿਉਂਕਿ ਉਨ੍ਹਾਂ ਦੇ ਆਪਣੇ ਕੈਬਨਿਟ ਵੱਲੋਂ ਹੀ ਉਨ੍ਹਾਂ ਉੱਤੇ ਕਾਫੀ ਦਬਾਅ ਪਾਇਆ ਗਿਆ ਲੱਗਦਾ ਸੀ ਜਿਸ ਕਾਰਨ ਅਨਮਨੇ ਮਨ ਨਾਲ ਉਨ੍ਹਾਂ ਨੂੰ ਅਸਤੀਫਾ ਦੇਣਾ ਪਿਆ|
ਦਾਇਬ ਦੀ ਸਰਕਾਰ ਉਸ ਸਮੇਂ ਸੱਤਾ ਵਿੱਚ ਆਈ ਜਦੋਂ ਉਨ੍ਹਾਂ ਦੇ ਪੂਰਵਜ਼ ਸਾਦ ਹਰੀਰੀ ਨੇ ਅਕਤੂਬਰ ਵਿੱਚ ਲੋਕਾਂ ਦੇ ਰੋਹ ਤੋਂ ਬਾਅਦ ਆਪਣਾ ਅਹੁਦਾ ਛੱਡਿਆ| ਬੜੇ ਜੋੜ ਤੋੜ ਤੋਂ ਬਾਅਦ ਸਾਰਿਆਂ ਦੀ ਸਹਿਮਤੀ ਦਾਇਬ ਉੱਤੇ ਬਣੀ| ਉਨ੍ਹਾਂ ਦੀ ਸਰਕਾਰ ਨੂੰ ਹਿਜਬੁਲ੍ਹਾ ਤੇ ਉਸ ਦੇ ਸਹਿਯੋਗੀਆਂ ਦਾ ਥਾਪੜਾ ਸੀ ਤੇ ਇਸ ਨੂੰ ਇੱਕਪਾਸੜ ਸਰਕਾਰ ਮੰਨਿਆ ਜਾਂਦਾ ਸੀ| ਇਨ੍ਹਾਂ ਕੋਈ ਸੁਧਾਰ ਤਾਂ ਕੀ ਕਰਨਾ ਸੀ ਸਗੋਂ ਸੁਧਾਰ ਦੀ ਮੰਗ ਕਰਨ ਵਾਲੇ ਸਾਰੇ ਧੜਿਆਂ ਨੂੰ ਸੱਤਾ ਤੋਂ ਬਾਹਰ ਕਰ ਦਿੱਤਾ|