ਟਿੰਮ ਹੌਰਟਨਜ਼ ਦੀ ਕਮਾਈ ਨੂੰ ਲੱਗੀ ਵੱਡੀ ਢਾਹ

ਓਟਵਾ, 6 ਅਗਸਤ (ਪੋਸਟ ਬਿਊਰੋ) : ਰੈਸਟੋਰੈਂਟ ਬ੍ਰੈਂਡਜ਼ ਇੰਟਰਨੈਸ਼ਨਲ ਇਨਕਾਰਪੋਰੇਸ਼ਨ ਦਾ ਕਹਿਣਾ ਹੈ ਕਿ ਮਹਾਂਮਾਰੀ ਨੇ ਦੂਜੀ ਤਿਮਾਹੀ ਵਿੱਚ ਉਨ੍ਹਾਂ ਦੀ ਕਮਾਈ ਨੂੰ ਕਾਫੀ ਢਾਹ ਲਾਈ ਹੈ| ਇਹ ਵੀ ਦੱਸਿਆ ਗਿਆ ਕਿ ਕੰਪਨੀ ਦੀ ਵਿੱਕਰੀ 21 ਫੀ ਸਦੀ ਘਟੀ ਹੈ|
ਟਿੰਮ ਹੌਰਟਨ ਤੇ ਬਰਗਰ ਕਿੰਗ ਦੀ ਪੇਰੈਂਟ ਕੰਪਨੀ ਦਾ ਕਹਿਣਾ ਹੈ ਕਿ 30 ਜੂਨ ਨੂੰ ਮੁੱਕੀ ਦੂਜੀ ਤਿਮਾਹੀ ਵਿੱਚ ਉਨ੍ਹਾਂ ਦੀ ਆਮਦਨ ਘਟ ਕੇ 163 ਮਿਲੀਅਨ ਅਮਰੀਕੀ ਡਾਲਰ ਰਹਿ ਗਈ ਜਦਕਿ ਇਸੇ ਅਰਸੇ ਦੌਰਾਨ ਇੱਕ ਸਾਲ ਪਹਿਲਾਂ ਕੰਪਨੀ ਦੀ ਕਮਾਈ 257 ਮਿਲੀਅਨ ਡਾਲਰ ਸੀ| ਆਰਬੀਆਈ ਨੇ ਆਖਿਆ ਕਿ ਪਿਛਲੀ ਤਿਮਾਹੀ ਵਿੱਚ ਆਮਦਨ ਵਿੱਚ 25 ਫੀ ਸਦੀ ਕਮੀ ਆਈ ਹੈ|
ਟੋਰਾਂਟੋ ਸਥਿਤ ਆਰਬੀਆਈ ਦਾ ਕਹਿਣਾ ਹੈ ਕਿ ਕੋਵਿਡ-19 ਮਹਾਂਮਾਰੀ ਕਾਰਨ ਦੋ ਵੱਡੇ ਬ੍ਰਾਂਡਾਂ ਦੀ ਆਮਦਨ ਵਿੱਚ ਬਹੁਤ ਤਿੱਖੀ ਗਿਰਾਵਟ ਦਰਜ ਕੀਤੀ ਗਈ ਹੈ| ਟਿੰਮ ਹੌਰਟਨਜ਼ ਤੇ ਬਰਗਰ ਕਿੰਗ ਦੀ ਵਿੱਕਰੀ ਕ੍ਰਮਵਾਰ ਇੱਕ ਤਿਹਾਈ ਤੇ ਇੱਕ ਚੌਥਾਈ ਘਟੀ ਹੈ| ਦੂਜੇ ਪਾਸੇ ਪੌਪੇਅਜ਼ ਦੀ ਵਿੱਕਰੀ ਵਿੱਚ ਹੋਏ ਵਾਧੇ ਨਾਲ ਸਥਿਤੀ ਥੋੜ੍ਹੀ ਸੰਭਲੀ ਲੱਗਦੀ ਹੈ| ਆਰਬੀਆਈ ਨੇ ਆਖਿਆ ਕਿ ਇਸ ਦੀਆਂ ਸਾਰੀਆਂ 27000 ਰੈਸਟੋਰੈਂਟਸ ਲੋਕੇਸ਼ਨਜ਼ ਵਰਚੂਅਲੀ ਖੋਲ੍ਹੀਆਂ ਜਾ ਚੁੱਕੀਆਂ ਹਨ|