ਬੈਰੂਤ, 5 ਅਗਸਤ (ਪੋਸਟ ਬਿਊਰੋ) : ਲੈਬਨਾਨ ਦੀ ਰਾਜਧਾਨੀ ਵਿੱਚ ਹੋਏ ਜੋæਰਦਾਰ ਧਮਾਕੇ ਦਾ ਕਾਰਨ ਲੱਭਣ ਲਈ ਜਾਂਚਕਾਰਾਂ ਨੇ ਬੈਰੂਤ ਦੀ ਬੰਦਰਗਾਹ ਦੇ ਮਲਬੇ ਨੂੰ ਕੁਰੇਦਣਾ ਸ਼ੁਰੂ ਕਰ ਦਿੱਤਾ ਹੈ| ਇਸ ਮਾਮਲੇ ਵਿੱਚ ਅਣਗਹਿਲੀ ਹੋਣ ਦੇ ਸੰæਕੇ ਕਾਰਨ ਸਰਕਾਰ ਨੇ ਬੰਦਰਗਾਹ ਦੇ ਕੁੱਝ ਅਧਿਕਾਰੀਆਂ ਨੂੰ ਨਜ਼ਰਬੰਦ ਕਰਨ ਦੇ ਵੀ ਹੁਕਮ ਦਿੱਤੇ ਹਨ|
ਜਾਂਚ ਇਸ ਗੱਲ ਦੀ ਸ਼ੁਰੂ ਕੀਤੀ ਗਈ ਹੈ ਕਿ ਕਿਸ ਤਰ੍ਹਾਂ 2,750 ਟੰਨ ਅਮੋਨੀਅਮ ਨਾਈਟ੍ਰੇਟ, ਜੋ ਕਿ ਬਹੁਤ ਹੀ ਧਮਾਕਾਖੇਜ਼ ਰਸਾਇਣ ਹੈ ਤੇ ਖਾਦ ਵਿੱਚ ਇਸ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਇਸ ਬੰਦਰਗਾਹ ਉੱਤੇ ਪਿਛਲੇ ਛੇ ਸਾਲਾਂ ਤੋਂ ਸਟੋਰ ਕਰਕੇ ਰੱਖਿਆ ਰਿਹਾ ਤੇ ਇਸ ਬਾਰੇ ਕੁੱਝ ਕਿਉਂ ਨਹੀਂ ਕੀਤਾ ਗਿਆ| ਮੰਗਲਵਾਰ ਨੂੰ ਹੋਏ ਇਸ ਜ਼ੋਰਦਾਰ ਧਮਾਕੇ ਤੋਂ ਬਾਅਦ ਸੰਘਰਸ਼ ਕਰ ਰਹੇ ਲੈਬਨਾਨ ਦੀ ਮਦਦ ਲਈ ਕੌਮਾਂਤਰੀ ਉਡਾਨਾਂ ਦੇਸ਼ ਪਹੁੰਚਣ ਲੱਗੀਆਂ ਹਨ|
ਇਸ ਧਮਾਕੇ ਵਿੱਚ 135 ਲੋਕ ਮਾਰੇ ਗਏ ਜਦਕਿ 5000 ਦੇ ਨੇੜੇ ਤੇੜੇ ਲੋਕ ਜ਼ਖ਼ਮੀ ਹੋ ਗਏ| ਇਹ ਜਾਣਕਾਰੀ ਸਿਹਤ ਮੰਤਰੀ ਹਾਮਦ ਹਸਨ ਨੇ ਦਿੱਤੀ| ਇਸ ਸ਼ਹਿਰ ਤੋਂ ਦੂਰ ਨੇੜੇ ਦੇ ਕਈ ਇਲਾਕਿਆਂ ਦੀਆਂ ਬਿਲਡਿੰਗਜ਼ ਨੂੰ ਭਾਰੀ ਨੁਕਸਾਨ ਪਹੁੰਚਿਆ| ਬੈਰੂਤ ਦੇ ਗਵਰਨਰ ਨੇ ਆਖਿਆ ਕਿ ਹਾਲਾਤ ਨੂੰ ਵੇਖਦਿਆ ਹੋਇਆਂ ਲੱਗਦਾ ਹੈ ਕਿ ਅੱਜ ਦੋ ਜਾਂ ਤਿੰਨ ਮਹੀਨੇ ਤੱਕ ਲੋਕ ਆਪਣੇ ਘਰਾਂ ਵਿੱਚ ਨਹੀਂ ਪਰਤ ਸਕਣਗੇ|