* ਕਸ਼ਮੀਰ, ਲੱਦਾਖ, ਜੂਨਾਗੜ੍ਹ ਨੂੰ ਆਪਣਾ ਹਿੱਸਾ ਕਰਾਰ ਦਿੱਤਾ
* ਭਾਰਤ ਨੇ ਪਾਕਿ ਦੇ ਨਵੇਂ ਨਕਸ਼ੇ ਨੂੰ ਹਾਸੋਹੀਣਾ ਆਖਿਆ
ਇਸਲਾਮਾਬਾਦ, 4 ਅਗਸਤ, (ਪੋਸਟ ਬਿਊਰੋ)-ਭਾਰਤ ਸਰਕਾਰ ਵੱਲੋਂ ਜੰਮੂ-ਕਸ਼ਮੀਰ ਤੋਂ ਧਾਰਾ 370 ਹਟਾਏ ਜਾਣ ਨੂੰ ਜਦੋਂ ਪੰਜ ਅਗਸਤ ਨੂੰ ਇਕ ਸਾਲ ਪੂਰਾ ਹੋਣ ਵਾਲਾ ਸੀ, ਇਸ ਤੋਂ ਇੱਕ ਦਿਨ ਪਹਿਲਾਂ ਚਾਰ ਅਗਸਤ ਨੂੰ ਪਾਕਿਸਤਾਨ ਨੇ ਇਸ ਦੇ ਵਿਰੋਧ ਦੀ ਚਾਲ ਚੱਲਦੇ ਹੋਏ ਆਪਣਾ ਨਵਾਂ ਨਕਸ਼ਾ ਜਾਰੀ ਕਰ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਨੇਪਾਲ ਨੇ ਏਦਾਂ ਦਾ ਨਕਸ਼ਾ ਜਾਰੀ ਕੀਤਾ ਸੀ, ਜਿਸ ਨੂੰ ਲੈਣ ਤੋਂ ਯੂ ਐੱਨ ਓ ਨੇ ਇਨਕਾਰ ਕਰ ਦਿੱਤਾ ਸੀ। ਓਸੇ ਰਾਹ ਉੱਤੇ ਚੱਲ ਕੇ ਇਮਰਾਨ ਖਾਨ ਦੀ ਸਰਕਾਰ ਨੇ ਇਕ ਹੋਰ ਵੱਡਾ ਵਿਵਾਦ ਖੜਾ ਕਰਨ ਦੀ ਕੋਸ਼ਿਸ਼ ਸ਼ੁਰੂ ਕਰ ਦਿੱਤੀ ਹੈ।
ਪਾਕਿਸਤਾਨ ਨੇ ਅੱਜ ਮੰਗਲਵਾਰ ਨੂੰ ਆਪਣਾ ਨਵਾਂ ਸਿਆਸੀ ਨਕਸ਼ਾ ਜਾਰੀ ਕਰ ਕੇ ਭਾਰਤ ਦੇ ਕਈ ਖੇਤਰਾਂ ਨੂੰ ਆਪਣਾ ਕਿਹਾ ਹੈ। ਪਾਕਿ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਇਕ ਬੈਠਕ ਵਿੱਚ ਇਹਨਵਾਂ ਨਕਸ਼ਾ ਪੇਸ਼ ਕੀਤਾ, ਜਿਸ ਵਿਚ ਜੰਮੂ-ਕਸ਼ਮੀਰ, ਲੱਦਾਖ ਦਾ ਸਿਆਚਿਨ ਖੇਤਰਅਤੇ ਗੁਜਰਾਤ ਦੀ ਸਾਬਕਾ ਜੂਨਾਗੜ੍ਹ ਰਿਆਸਤ ਨੂੰ ਆਪਣਾ ਕਿਹਾ ਹੈ। ਇਮਰਾਨ ਖਾਨ ਵੱਲੋਂਦੇਸ਼ ਦਾ ਨਵਾਂ ਸਿਆਸੀ ਨਕਸ਼ਾ ਜਾਰੀ ਕਰਨ ਪਿੱਛੋਂ ਪਾਕਿਸਤਾਨੀ ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਨੇ ਦਾਅਵਾ ਕੀਤਾ ਕਿ ਭਾਰਤ ਨੇ ਇਥੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਉਸਾਰੀ ਕਰਵਾਈ ਹੈ। ਪਾਕਿਸਤਾਨ ਨੇ ਇਹ ਮੰਨਦੇ ਹੋਏ ਕਿ ਸਰ ਕ੍ਰੀਕ ਵਿਚ ਭਾਰਤ ਦੇ ਨਾਲ ਉਸ ਦਾ ਵਿਵਾਦ ਹੈ, ਸਾਫ ਕਿਹਾ ਕਿ ਉਸ ਨੇ ਇਹ ਇਲਾਕਾ ਆਪਣੇ ਨਕਸ਼ੇ ਵਿਚ ਮਿਲਾ ਲਿਆ ਹੈ। ਇਸ ਤੋਂ ਪਹਿਲਾਂ ਜੰਮੂ-ਕਸ਼ਮੀਰ ਤੇ ਲੱਦਾਖ ਉੱਤੇ ਪਾਕਿਸਤਾਨ ਦਾਅਵਾ ਕਰਦਾ ਰਿਹਾ ਹੈ। ਖਾਸ ਗੱਲ ਇਹ ਕਿ ਇਸ ਵਾਰ ਉਸ ਨੇ ਗੁਜਰਾਤ ਦੇ ਜੂਨਾਗੜ੍ਹ ਨੂੰ ਆਪਣੇ ਵਿਚ ਸ਼ਾਮਲ ਕਰ ਕੇ ਨਕਸ਼ਾ ਜਾਰੀ ਕੀਤਾ ਹੈ। ਇਸ ਮੌਕੇ ਪਾਕਿਸਤਾਨ ਨੇ ਉਨ੍ਹਾਂ ਖੇਤਰਾਂ ਨੂੰ, ਜਿਨ੍ਹਾਂ ਬਾਰੇ ਚੀਨ ਤੇ ਭਾਰਤ ਦਾ ਵਿਵਾਦ ਚੱਲਦਾ ਹੈ, ‘ਅਨਡਿਫਾਈਨਡ ਫਰੰਟੀਅਰ` ਆਖਿਆ ਹੈ। ਅੱਗੋਂ ਪਾਕਿਸਤਾਨ ਇਹ ਨਕਸ਼ਾ ਯੂ ਐੱਨ ਓ ਕੋਲ ਪੇਸ਼ ਕਰਨ ਦੀ ਤਿਆਰੀ ਵਿਚ ਹੈ।
ਇਸ ਤੋਂ ਪਹਿਲਾਂ ਭਾਰਤ ਨਾਲ ਸਰਹੱਦੀ ਵਿਵਾਦ ਕਾਰਨ ਨੇਪਾਲ ਨੇ ਵੀ ਏਸੇ ਤਰ੍ਹਾਂ ਕੀਤਾ ਸੀ। ਉਸ ਨੇ ਲਿਪੁਲੇਖ, ਕਾਲਾਪਾਣੀ ਤੇ ਲਿੰਪਿਆਧੁਰਾ ਨੂੰ ਆਪਣਾ ਦੱਸ ਕੇ ਨੇਪਾਲ ਦਾ ਨਵਾਂ ਨਕਸ਼ਾ ਜਾਰੀ ਕੀਤਾ ਤੇ ਇਸ ਨੂੰ ਪਾਰਲੀਮੈਂਟਤੋਂਪਾਸ ਕਰਵਾ ਲਿਆ ਸੀ ਤੇ ਪਿਛਲੇ ਦਿਨੀਂ ਨੇਪਾਲ ਦੇ ਵਿਦੇਸ਼ ਮੰਤਰੀ ਪ੍ਰਦੀਪ ਗਯਾਵਲੀ ਨੇ ਕਿਹਾ ਹੈ ਕਿ ਦੇਸ਼ ਦਾ ਚੀਨ ਦੇ ਨਾਲ ਕੋਈ ਸਰਹੱਦੀ ਵਿਵਾਦ ਨਹੀਂ ਹੈ, ਸਿਰਫ ਭਾਰਤ ਨਾਲ ਹੈ।
ਪਾਕਿਸਤਾਨ ਦੀ ਅੱਜ ਵਾਲੀ ਕਾਰਵਾਈ ਉੱਤੇ ਭਾਰਤ ਨੇ ਤਿੱਖੀ ਪ੍ਰਤੀਕਿਰਿਆ ਜਤਾਈ ਅਤੇ ਇਸ ਨੂੰ ‘ਹਾਸੋਹੀਣਾ` ਕੰਮ ਆਖਿਆ ਹੈ, ਜਿਸ ਦੀ ਨਾ ਕਾਨੂੰਨੀ ਅਤੇ ਨਾ ਅੰਤਰਰਾਸ਼ਟਰੀ ਮਾਨਤਾ ਹੈ। ਭਾਰਤੀ ਵਿਦੇਸ਼ ਮੰਤਰਾਲਾ ਨੇ ਨਵੀਂ ਦਿੱਲੀ ਤੋਂ ਬਿਆਨ ਜਾਰੀ ਕੀਤਾ ਹੈ ਕਿ ਅਸੀਂ ਪਾਕਿਸਤਾਨ ਦਾ ਕਥਿਤ ਸਿਆਸੀ ਨਕਸ਼ਾ ਦੇਖ ਲਿਆ ਹੈ, ਜਿਹੜਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਜਾਰੀ ਕੀਤਾ ਹੈ। ਇਹ ਸਿਆਸੀ ਮੂਰਖਤਾ ਦਾ ਕੰਮ ਹੈ, ਜਿਸ ਵਿਚ ਭਾਰਤੀ ਸੂਬੇ ਗੁਜਰਾਤ ਤੇ ਕੇਂਦਰੀ ਸ਼ਾਸਿਤ ਪ੍ਰਦੇਸ਼ ਜੰਮੂ-ਕਸ਼ਮੀਰ ਤੇ ਲੱਦਾਖ ਉੱਤੇ ਬੇਤੁਕਾ ਦਾਅਵਾ ਕੀਤਾ ਗਿਆ ਹੈ। ਭਾਰਤ ਨੇ ਕਿਹਾ ਕਿ ਇਨ੍ਹਾਂ ਮੂਰਖਤਾਪੂਰਨ ਗੱਲਾਂ ਦੀ ਨਾ ਕੋਈ ਕਾਨੂੰਨੀ ਮਾਨਤਾ ਤੇ ਨਾ ਅੰਤਰਰਾਸਟਰੀ ਭਰੋਸਗੀਹੈ। ਇਹ ਨਵੀਂ ਕੋਸ਼ਿਸ਼ ਸਿਰਫ ਇਹ ਪੁਸ਼ਟੀ ਕਰਦੀ ਹੈ ਕਿ ਪਾਕਿਸਤਾਨ ਸਰਹੱਦ ਪਾਰ ਦੇ ਅੱਤਵਾਦ ਰਾਹੀਂ ਇਨ੍ਹਾਂ ਖੇਤਰਾਂ ਨੂੰ ਹਾਸਲ ਕਰਨਾ ਚਾਹੁੰਦਾ ਹੈ।